ព័ត៌មានអន្ដរជាតិ

បុរសជនជាតិចិននិងកេនយ៉ា ត្រូវចាប់ខ្លួនពីបទរត់ពន្ធសត្វស្រមោច២០០០ក្បាលទៅចិន

បានផុស

៤ ខែ មុន

នៅ

ថ្ងៃពុធ ១៨ មីនា ២០២៦

ដោយ

បុរសជនជាតិចិនម្នាក់និងអ្នករត់ការជាជនជាតិកេនយ៉ាត្រូវចោទប្រកាន់ពីបទជួញដូរសត្វព្រៃខុសច្បាប់ បន្ទាប់ពីប៉ូលិសរកឃើញថា ពួកគេកំពុងព្យាយាមរត់ពន្ធសត្វស្រមោចក្នុងសួនច្បារមួយជាង ២ ០០០ក្បាលចេញពីប្រទេសកេនយ៉ា។

លោក Zhang Kequn ជនជាតិចិន ត្រូវប៉ូលិសចាប់ខ្លួននៅអាកាសយានដ្ឋានអន្តរជាតិក្នុងរដ្ឋធានី Nairobi នៃប្រទេសកេនយ៉ាកាលពីសប្តាហ៍មុន បន្ទាប់ពីអាជ្ញាធររកឃើញស្រមោចជាច្រើនក្បាលនៅក្នុងវ៉ាលីរបស់គាត់។ ស្រមោចទាំងនោះបានលាក់ក្នុងបំពង់សាក ឬរុំដោយក្រដាសជូតមាត់។ យោងតាមសារព័ត៌មាន BBC ផ្សាយថ្ងៃទី១៨ ខែមីនា ឆ្នាំ២០២៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអង្គារ តុលាការនៅទីក្រុង Nairobi ឱ្យដឹងថា៖ «លោក Zhang បានទិញស្រមោចពីលោក Charles Mwangi ក្នុងតម្លៃ៧៧ដុល្លារជាមួយស្រមោច១០០ក្បាល»។

ទោះបីយ៉ាងណា អាជ្ញាធរមិនទាន់ឆ្លើយថា នេះជាករណីដែលលោក Zhang ព្យាយាមយកសត្វល្អិតចេញពីប្រទេសឬអត់នោះទេ ប៉ុន្តែឥវ៉ាន់របស់លោកមានទិសដៅទៅកាន់ប្រទេសចិន។

បុរសទាំងពីរនាក់ក៏ត្រូវបានចោទប្រកាន់ពីបទឃុបឃិតគ្នាប្រព្រឹត្តបទឧក្រិដ្ឋផងដែរ។

មេធាវីរបស់ លោក Zhang គឺ លោក David Lusweti និយាយថា បុរសទាំងពីរមិនទាន់ប្រាកដថាពួកគេកំពុងបំពានច្បាប់នោះទេ។

មេធាវីប្រាប់សារព័ត៌មាន AP ថា៖ «ពួកគេរកឃើញមធ្យោបាយដែលអាចលក់ស្រមោចទាំងនេះទៅក្រៅប្រទេស ហើយពួកគេជឿថាអាចរកប្រាក់ចិញ្ចឹមជីវិតតាមរយៈស្រមោចទាំងនោះបាន»។

លោក Zhang និង Mwangi នឹងបង្ហាញខ្លួន ចំពោះមុខតុលាការម្តងទៀតនៅថ្ងៃទី២៧ ខែមីនា។

មន្ត្រីជាន់ខ្ពស់ម្នាក់នៅសួនសត្វព្រៃកេនយ៉ាប្រាប់ BBC កាលពីមុនថា៖ « ករណីចាប់ខ្លួនអាចកើនឡើង ខណៈក្រុមអ្នកស៊ើបអង្កេតបានពង្រីកការស៊ើបអង្កេតរបស់ពួកគេទៅកាន់ទីក្រុងផ្សេងទៀត សង្ស័យថាការប្រមូលផលស្រមោចកំពុងបន្ត»។

គួរបញ្ជាក់ថា កាលពីខែឧសភាឆ្នាំមុន តុលាការកេនយ៉ាកាត់ទោសបុរស៤នាក់ឱ្យជាប់ពន្ធនាគារមួយឆ្នាំ ឬពិន័យជាប្រាក់ចំនួន ៧ ៧០០ដុល្លារ ពីបទព្យាយាមរត់ពន្ធស្រមោចរាប់ពាន់ក្បាលចេញពីប្រទេស៕

ប្រែសម្រួល៖ ណឺ មិនា