វៀតណាម ដាក់បញ្ចូលភាសាខ្មែរ ក្នុងកម្មវិធីសិក្សារបស់ខ្លួន

ប្រទេសវៀតណាម បានប្រកាសពីការដាក់បញ្ចូលភាសាខ្មែរទៅក្នុងកម្មវិធីសិក្សារបស់ខ្លួន ដោយចាប់អនុវត្តពីឆ្នាំ២០២៨ទៅ។ នេះបើតាមការផ្សាយរបស់ VN Express កាលពីថ្ងៃអាទិត្យទី១៤ខែកញ្ញាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងអប់រំវៀតណាម Nguyen Kim Son បានឲ្យដឹងថា កម្មវិធីសិក្សាភាសាបរទេសនេះ គឺជាផ្នែកនៃគម្រោងសិក្សារបស់វៀតណាម ដែលប្រកាសកាលពីសប្តាហ៍មុន។ 

កម្មវិធីនេះនឹងចាប់អនុវត្តពីឆ្នាំ២០២៦ដល់ឆ្នាំ២០៣៥ ក្នុងគោលបំណងរឹតចំណងមិត្តភាពនិងបំពេញតាមកិច្ចព្រមព្រៀងដែលមានស្រាប់រវាងវៀតណាមជាមួយប្រទេសជិតខាង។

យ៉ាងណា មិនមែនមានត្រឹមតែភាសាខ្មែរទេ ភាសាបណ្តាប្រទេសនៅអាស៊ីអាគ្នេយ៍ដទៃទៀត ក៏ត្រូវដាក់បញ្ចូលដែរ ដូចជាឡាវ ថៃនិងឥណ្ឌូណេស៊ីជាដើម។

ក្នុងគម្រោង ភាសាឡាវនឹងបង្រៀនដល់សិស្សវៀតណាមមុនគេ ពោលគឺចាប់ឆ្នាំ២០២៦ទៅ ខណៈភាសាខ្មែរ នឹងចាប់បង្រៀនក្នុងឆ្នាំ២០២៨ ចំណែកភាសាថៃនិងឥណ្ឌូណេស៊ី ក្នុងឆ្នាំ២០៣០។  

ទោះបែបនេះ ជំហានដំបូង វៀតណាមនឹងបង្រៀនភាសានៅតាមសាលាក្នុងខេត្ត ជាប់ព្រំដែនរបស់ប្រទេសនីមួយៗសិន រួចទើបពង្រីកទៅតំបន់ផ្សេងៗ។

សូមជម្រាបថា បច្ចុប្បន្ននេះភាសាបរទេសដែលសិស្សសាលាវៀតណាមមានសិទ្ធជ្រើសរើសរៀន មានដូចជាភាសាអង់គ្លេស បារាំង រុស្ស៊ី ចិន អាល្លឺម៉ង់ ជប៉ុននិងកូរ៉េ៕

អត្ថបទ៖ សុខ សុវណ្ណ

ចុចអាន៖ វៀតណាម នឹងដោះលែងអ្នកទោសជិត១ម៉ឺន៤ពាន់នាក់ នៅមុនថ្ងៃបុណ្យជាតិ