ផ្លូវ៦០ម៉ែត្រទៀតហើយ! រថយន្ដ៣គ្រឿងបុកគ្នា រុញផ្ទប់របាំងថ្មរងការខូចខាត

ករណីគ្រោះថ្នាក់ចរាចរណ៍រវាងរថយន្ដតូចធំចំនួន៣គ្រឿងនៅលើផ្លូវ៦០ម៉ែត្របណ្ដាលឲ្យរងការខូចខាត ខណៈរបាំងថ្មពុះចែកទ្រូងផ្លូវចំនួន៥ផ្ទាំងក៏ខូចខាតផងដែរ។

ហេតុការណ៍នេះបង្កភ្ញាក់ផ្អើលកាលពីវេលាម៉ោង០២និង៣០នាទីរសៀលថ្ងៃទី១៧ ខែកញ្ញា ឆ្នាំ២០២៥ នៅចំណុចមុខផ្សារទំនើប អុីអន៣ តាមបណ្តោយផ្លូវ ៦០ម៉ែត្រ សង្កាត់ជើងឯក ខណ្ឌដង្កោ រាជធានីភ្នំពេញ។

តាមប្រភពព័ត៍មានពីប្រជាពលរដ្ឋបានប្រាប់អោយដឹងថា មុនកើតហេតុគេបានឃើញបុរសម្នាក់បើករថយន្តមួយគ្រឿងម៉ាក FORD EVEREST ពណ៌ស ពាក់ស្លាកលេខ ភ្នំពេញ 2BU-4015 ក្នុងល្បឿនលឿនក្នុងទិសដៅត្បូងទៅជើង ខណៈមកដល់ចំណុចកើតហេតុ បានជ្រុលទៅបុកពីក្រោយរថយន្តម៉ាក Pruis ពណ៌ កណ្តុរប្រមេះ ពាក់ស្លាកលេខ ភ្នំពេញ 2CC-9134 ដែលកំពុងឈប់រង់ចាំភ្លើងសញ្ញា រុញចូលទៅផ្លូវម្ខាងទៀត បណ្ដាលអោយរថយន្តដឹកទំនិញបុកបន្ថែមទៀត។ ស្របពេលនោះ រថយន្តធន់ធំខាងលើក៏បានរ៉េចង្កូតគេចអ្នកដំណើរលើដងផ្លូវ ទៅបុកនឹងរបាំងថ្មចែកទ្រូងផ្លូវខូចខាតអស់ចំនួន៥ផ្ទាំង សំណាងគ្មានមនុស្សណាម្នាក់រងរបួសនោះឡើយ។ ចំណែកម្ចាស់រថយន្តហ្វត បានចុះពីលើរថយន្តរួចរត់គេចខ្លួនបាត់ស្រមោល។ ភ្លាមៗ សមត្ថកិច្ចមូលដ្ឋានបានចុះមកដល់ទីតាំងគ្រោះថ្នាក់ដើម្បីអន្តរាគមន៍។

ក្រោយកើតហេតុ សមត្ថកិច្ចចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បានចុះវាស់វែងយករថយន្តទាំង ៣គ្រឿង ទៅរក្សាទុករង់ចាំដោះស្រាយពេលក្រោយ៕

អត្ថបទ៖ រដ្ឋា