កីឡា

៣ប្រភេទកីឡាដែលគេនិយមលេងកម្សាន្តនៅឱកាសពិធីបុណ្យភ្ជុំបិណ្ឌ

បានផុស

១០ ខែ មុន

នៅ

ថ្ងៃព្រហស្បតិ៍ ២៥ កញ្ញា ២០២៥

ដោយ

ពិធីបុណ្យភ្ជុំបិណ្ឌដែលខ្មែរតែងតែប្រារព្ធជារៀងរាល់ឆ្នាំពិសេសទើបតែបញ្ចប់កាលពីថ្ងៃទី២២ ខែកញ្ញា ឆ្នាំ២០២៥ នេះគេឃើញតាមបណ្ដាខេត្តក្រុងផ្សេងៗមានលេងកីឡា ៣ប្រភេទ ដើម្បីកម្សាន្តសប្បាយ ជាការអបអរសារទរផង និងជាការជួបជុំមិត្តភក្តិជិតឆ្ងាយផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតប្រណាំងទូកង

ក្នុងចំណោម ៣ប្រភេទកីឡាដែលបណ្ដាប្រជាពលរដ្ឋនៅតាមស្រុកភូមិតែងតែលេងកម្សាន្តនោះរួមមាន៖

ទី១ កីឡាប្រណាំងទូក: កីឡាមួយប្រភេទនេះគឺភាគច្រើនជាការផ្ដួចផ្ដើមរៀបចំឡើងដោយព្រះសង្ឃតាមបណ្ដាវត្តនានាពិសេសវត្តដែលជាប់ដងទន្លេ ឬបឹងជាដើម។ ការរៀបចំប្រណាំងទូកងនេះជាទំនៀមទំលាប់ប្រពៃណីទៅហើយនៅតាមវត្តមួយចំនួននោះ។ ការប្រណាំងទូកនេះគឺដើម្បីឲ្យប្រជាពលរដ្ឋបានមកទស្សនាកម្សាន្តសប្បាយផង និងជាការរឹតចំណងមិត្តភាពជាមួយបណ្ដាវត្តផ្សេងៗដែលនៅជិតគ្នាបានមកប្រកួតលេងផង។

ការប្រកួតប្រណាំងទូកង

ទី២ កីឡាចំបាប់: កីឡាដ៏ចំណាស់របស់ខ្មែរមួយនេះក៏មានការគាំទ្រ និងមានអ្នកចូលប្រកួតលេងកម្សាន្តសប្បាយច្រើនដែរ។ កីឡាមួយនេះភាគច្រើនលេងនៅតាមខេត្ត ឬតំបន់ដើមកំណើតអ្នកចំបាប់ពីសង្គមដើមនោះទេដូចជានៅវិហារសួគ៌ ខេត្តកណ្ដាល កំពង់ឆ្នាំង និងពោធិ៍សាត់ សៀមរាប ជាដើម។ កីឡាចំបាប់នេះគេឃើញមានមហាជនចូលរួមប្រកួតផ្នែកចំបាប់បុរាណច្រើនដូចជាការរំលឹកក្បាច់គុនចាស់ៗរបស់គេឡើងវិញ និងមានអ្នកឈរទស្សនាយ៉ាងសប្បាយរីករាយច្រើនកុះករ។

ការប្រកួតចំបាប់បុរាណ

ទី៣ កីឡាប្រដាល់គុនខ្មែរ: កីឡាមួយប្រភេទនេះឥលូវក៏មានការគាំទ្រច្រើនដែរនៅរដូវបុណ្យភ្ជុំបិណ្ឌនេះពិសេសគឺតាមបណ្ដាវត្ត។ ពីមុនគឺមិនសូវមានការរៀបចំផុសផុលឡើយផ្នែកកីឡាប្រដាល់គុនខ្មែរនេះដោយសារតែមិនសូវសំបូរសម្ភារផង និងតម្រូវឲ្យមានអ្នកចេះ និងត្រូវរៀបចំច្រើនខុសពីកីឡាចំបាប់។

ការប្រកួតប្រដាល់នៅតាមវត្ត

រយៈពេលប៉ុន្មានឆ្នាំចុងក្រោយនេះគឺឃើញមានការប្រកួតតាមវត្តច្រើនទាំងនេះអាចដោយសារឥលូវសំបូរសម្ភារផង និងអ្នកចូលចិត្តកីឡានេះក៏ច្រើនថែមទៀត។ ការប្រកួតទាំងនោះគេឃើញមានអ្នកដែលបានហ្វឹកហាត់ខ្លះឡើងប្រកួតគ្នាផង និងមានមហាជនដែលស្ម័គ្រចិត្តឡើងប្រកួតលេងជាមួយគ្នាផង។ កីឡាមួយនេះក៏ទាក់ទាញមហាជនឲ្យមកទស្សនាច្រើនផងដែរនៅរដូវបុណ្យទានម្ដងៗ៕