អានុទីន បង្ហាញគោលនយោបាយសេដ្ឋកិច្ចទៅសភាថៃ ​ផ្ដោតលើ​បំណុលគ្រួសារ និងវិបត្តិទេសចរណ៍​

​នាយករដ្ឋមន្ត្រី​ថៃ​ លោក អានុទីន ឆានវីរៈគុល (​ Anutin Charnvirakul) ​នៅថ្ងៃចន្ទនេះ បាន​បង្ហាញ​គោល​នយោបាយសេដ្ឋកិច្ចរដ្ឋាភិបាលថ្មីរបស់លោកទៅកាន់សភាថៃ ដោយ​ផ្ដោតលើការស្រោចស្រង់សេដ្ឋកិច្ច ដែល​បន្តកំណើនដើរអូសជើងដោយសារតែបញ្ហរួមរឹតផ្សេងៗ។

គោលនយោបាយរបស់លោករួមមានវិធានការកាត់បន្ថយកំណើន​ថ្លៃរស់នៅ ដោះស្រាយបញ្ហា​បំណុលគ្រួសារ និងសង្រ្គាមពាណិជ្ជកម្ម​ និងជំរុញវិស័យ​ទេសចរណ៍ដែលកំពុង​ធ្លាក់ចុះ​ ចំពេលដែល​សេដ្ឋកិច្ចថៃបច្ចុប្បន្ន ប្រឈមមុខ​នឹង​ពន្ធ​គយ​របស់សហរដ្ឋអាមេរិក បំណុលគ្រួសារខ្ពស់​ កម្សោយ​តម្រូវការក្នុងស្រុក​ និងកំណើនប្រាក់បាតជាដើម។

ទីភ្នាក់ងារសារព័ត៌មាន​សារព័ត៌មាន​រ៉យទ័រ បាន​ស្រង់សម្ដីរបស់លោក អានុទីន ដែលថ្លែងប្រាប់សភាយ៉ាងដូច្នេះថា៖ «ដោយសារពេលវេលាមានកំណត់ ហើយ​​រដ្ឋាភិបាល(ថ្មី)នេះមិនអាចរៀបចំកញ្ចប់​ថវិកា ក៏ដូចជា​មានសម្លេងភាគតិចក្នុងរដ្ឋបាល រដ្ឋាភិបាល​ត្រូវតែដោះស្រាយបញ្ហា​ផ្សេងៗជាបន្ទាន់ ដែលប្រទេសកំពុងប្រឈមមុខ»។

តាមការចុះផ្សាយរបស់កាសែតបាងកកប៉ុស្តិ៍ លោក អានុទីន បាន​ឱ្យដឹងថា ដើម្បីដោះស្រាយសង្រ្គាមពាណិជ្ជកម្ម ​លោកនឹង​បង្កើត «ក្រុមការងារថៃ» ​​ក្នុងបំណង​គាំទ្រដល់ប្រតិបត្តិករអាជីវកម្ម និងជំរុញបរិយាកាសវិនិយោគ​ប្រកបដោយ​ការប្រកួតប្រជែង។

ហើយ​ដើម្បី​​ដោះស្រាយកំណើនថ្លៃសម្រាប់ការរស់នៅ ​លោក​បាន​សន្យា​បង្កើន​ប្រាក់​ចំណូល កាត់​បន្ថយ​ការ​ចំណាយ ដោះស្រាយ​បញ្ហា​បំណុល លើក​កម្ពស់​សាច់​ប្រាក់​ងាយ​ស្រួល និង​លើក​កម្ពស់​ការ​សន្សំ។ ត្រង់ចំណុចនេះ រដ្ឋាភិបាលថ្មីរបស់លោក​ នឹងជួយដល់បុគ្គលដែលមានបំណុលមិនលើសពី ១០០ ០០០ បាត (៣ ១០៣ ដុល្លារ) ​និងផ្តល់សាច់ប្រាក់ងាយស្រួលរហូតដល់ ១ លានបាតសម្រាប់អាជីវកម្មខ្នាតតូច។ នេះបើតាមរ៉យទ័រ។

ការប្ដេជ្ញារបស់លោក អានុទីន នៅថ្ងៃចន្ទនេះ ធ្វើឡើងបន្ទាប់ពីរដ្ឋាភិបាលថ្មីរបស់លោក​កាលពីថ្ងៃសុក្រ បាន​ប្រកាសថានឹងចាប់ផ្តើមឡើងវិញ នូវ​ «គម្រោង​ចំណាយប្រាក់រួមគ្នា» ​តម្លៃ​ ៤៧ ប៊ីលាន​បាត (១,៤៦ ប៊ីលាន​ដុល្លារ)។ ក្រោម​គោលនយោបាយនេះ​ រដ្ឋាភិបាល​នឹង​ជួយ​ទូទាត់ការចំណាយរបស់ពលរដ្ឋដែលមាន​សិទ្ធិ​រហូតដល់ ៦០ ភាគរយ ​​ចំពោះ​រាល់​ការ​ទិញម្ហូបអាហារ និងទំនិញប្រើប្រាស់មួយចំនួន​។

​ក្រៅពីនេះ អាទិភាពផ្សេងៗទៀតរួមមានការដោះស្រាយ​ភាព​តានតឹងព្រំដែនជាមួយ​កម្ពុជាដោយ​សន្តិវិធី​ ការប្រយុទ្ធប្រឆាំងនឹងការលេងល្បែងស៊ីសងខុសច្បាប់ និងការបង្កើនការត្រៀមខ្លួនសម្រាប់គ្រោះមហន្តរាយតាមរយៈការប្រើប្រាស់ប្រព័ន្ធព្រមានកម្រិតខ្ពស់។

គេមើលឃើញថា រដ្ឋាភិបាល​របស់លោក អានុទីន មាន​ពេលតិចតួចក្នុងការអនុវត្តវិធានការសេដ្ឋកិច្ចរបស់ខ្លួន។ កាលពីសប្ដាហ៍មុន លោកបាន​ប្រកាសថា លោក​នឹង​រំលាយ​សភានៅចុងខែមករា ដោយ​ឆ្ពោះទៅរកការបោះឆ្នោតថ្មីនៅចុងខែមីនា ឬដើមខែមេសា។ ​

គួរគូសបញ្ជាក់ថា សេដ្ឋកិច្ចថៃបាន​កើនឡើងប្រមាណ ២,៤ ភាគរយ កាលពីឆ្នាំមុន ​ដែលនេះជាកំណើនទាបជាងគេធៀប​នឹង​ដៃគូប្រជែងសំខាន់ៗក្នុងតំបន់​ ពោលគឺជាអ្វីដែលសេដ្ឋវិទូហៅថាជាការដើរអូសជើងនៃសេដ្ឋកិច្ច។ រដ្ឋាភិបាលរំពឹងថាសេដ្ឋកិច្ចឆ្នាំនេះ​ នឹង​កើនឡើងត្រឹមចម្លោះ ១,៨-២,៣ ភាគរយ នៅឆ្នាំ ២០២៥ នេះ ដោយ​អាចចុះខ្សោយខ្លាំងនៅចុងឆ្នាំ ដោយសារតែផលប៉ះពាល់ពន្ធលើការនាំចេញថៃ៕

​

​