កម្ពុជា ត្រូវបានអង្គសន្និបាតសម្ព័ន្ធភាពសម្រាប់បេតិកភណ្ឌវប្បធម៌អាស៊ី បោះឆ្នោតឱ្យធ្វើជាអគ្គលេខាធិការសម្រាប់អាណត្តិដំបូងរបស់សម្ព័ន្ធភាពសម្រាប់បេតិកភណ្ឌវប្បធម៌អាស៊ី។ សន្និបាតសម្ព័ន្ធភាពសម្រាប់បេតិកភណ្ឌ ត្រូវបានរៀបចំឡើងនៅទីក្រុងស៊ីអាន ខេត្តសានស៊ី សាធារណរដ្ឋប្រជាមានិតចិន ចាប់ពីថ្ងៃទី២៤-២៥ ខែមេសា ឆ្នាំ២០២៣។

ជាមោទកភាពសម្រាប់កម្ពុជា លោក គង់ វីរៈ អនុរដ្ឋលេខាធិការ ក្នុងនាមក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា និងជាតំណាងបណ្ឌិតសភាចារ្យរដ្ឋមន្ត្រី លោកត្រូវបានអង្គសន្និបាត បោះឆ្នោតឱ្យធ្វើជាអគ្គលេខាធិការសម្រាប់អាណត្តិដំបូងរបស់សម្ព័ន្ធភាពសម្រាប់បេតិកភណ្ឌវប្បធម៌អាស៊ី នាអាណត្តិឆ្នាំ ២០២៣-២០២៤ ដោយសម្លេងភាគច្រើន។

សន្និបាតសម្ព័ន្ធភាពសម្រាប់បេតិកភណ្ឌ មានប្រទេសចំនួន ២២ និងអង្គការអន្តរជាតិចំនួន ៣ ចូលរួម។ សន្និបាតនេះ មានរបៀបវារៈសំខាន់ៗចំនួន៤គឺ ១. ការអនុម័តលើសេចក្តីព្រាងលក្ខន្តិកៈ, ២. គ្រោងការងារសម្រាប់ឆ្នាំ២០២៣-២០២៤, ៣. ការបោះឆ្នោតជ្រើសរើសអគ្គលេខាធិការ និង៤. ការអនុម័តសេចក្តីប្រកាសទីក្រុងស៊ីអាននៃសម្ព័ន្ធភាពសម្រាប់បេតិកភណ្ឌវប្បធម៌អាស៊ី។

គួរបញ្ជាក់ថា កម្ពុជាគឺជាប្រទេសមួយក្នុងចំណោមប្រទេសចំនួន ១០ ដែលជាស្ថាបនិករបស់សម្ព័ន្ធភាពសម្រាប់បេតិកភណ្ឌវប្បធម៌អាស៊ី។ ហើយសម្ព័ន្ធភាពនេះបង្កើតឡើងក្នុងគោលបំណង រៀបចំយន្តការអន្តររដ្ឋាភិបាលសម្រាប់កិច្ចសហប្រតិបត្តិការបេតិកភណ្ឌវប្បធម៌ក្នុងចំណោមប្រទេសអាស៊ី៕