​កម្ពុជា​ចំណាយ​ជាង​ ៦០០ ​លានដុល្លារ ​នាំចូល​សម្ភារសំណង់​នៅក្នុងត្រីមាសទី១ ​ឆ្នាំនេះ

កម្ពុជា​នាំចូល​សម្ភារសំណង់​មាន​ទំហំទឹកប្រាក់​ជាង ​៦៣១​ លានដុល្លារ​ នៅក្នុងរយៈពេល ៣ ខែ (មករា-មីនា) ២០២៦ ​កើនឡើង ១៧,៤៥% ​ធៀបនឹងរយៈពេលដូចគ្នា ​កាលពីឆ្នាំមុន​ដែលមានតម្លៃ ៥៣៧ លាន​ដុល្លារ។ ​នេះបើយោងតាមរបាយការណ៍របស់ក្រសួងពាណិជ្ជកម្ម។ ​

របាយការណ៍ដដែលបង្ហាញថា ​គិត​ចាប់​ពី​ខែមករា ​ដល់​ខែមីនា​ ​២០២៦ ប្រទេសដែលកម្ពុជានាំចូលសម្ភារសំណង់ច្រើនជាងគេមានប្រទេសចិន ៤៥២ លានដុល្លារ កើន ១៨,៦០% ប្រទេស, វៀតណាមជាង ៥៧ លានដុល្លារ កើនជិត ៣៤% និងម៉ាឡេស៊ី ៣៦ លានដុល្លារ កើន ១៤៤%។ ការនាំចូលដែក ​និង​ដែក​ថែប ​មានតម្លៃ​ប្រ​មាណ ​២៩៨ ​លានដុល្លារ ​កើនឡើង ​១០,២០%។

​រាជរដ្ឋាភិបាល​កំពុងយកចិត្តទុកដាក់ក្នុងការជំរុញ​ទីផ្សារអចល​នទ្រព្យឱ្យងើបឡើងវិញ ​ខណៈវិស័យ​សំណង់​នៅកម្ពុជានៅតែមានកំណើនជាប្រចាំជា​ពិសេស​គម្រោងថ្មីៗ ​ដែល​បាន​ស្នើសុំ។

​យោងតាមធនាគារជាតិ ​តម្លៃ​គម្រោង​សំណង់​ទទួល​បាន​ការអនុម័តកើនឡើង ៤៨,៣% នៅឆ្នាំ ២០២៥ ដែលក្នុងនោះសំណង់ក្នុងវិស័យកម្មន្តសាល កើនជាង១ ដង សំណង់លំនៅឋាន កើនឡើង ៦៦,៥% និងសំណង់ក្នុងវិស័យទេស​ចរណ៍កើន ៧២,១% ខណៈសំណង់ក្នុងវិស័យពាណិជ្ជកម្ម និង​សាធារណៈថយចុះ ៤២,៥% និង ៣៩,៤% រៀងគ្នា។​

​លោក គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី និងអគ្គនាយកនៃអគ្គនាយកដ្ឋានគយ និងរដ្ឋាករ​កម្ពុជា ​មានប្រ​សា​សន៍ថា ​តាមការវាយតម្លៃវិស័យអចលនទ្រព្យនៅឆ្នាំ ​២០២៥ ​មានកំណើនត្រឹម ២,៤% ​ប៉ុន្តែចំណូល​ពន្ធដែល​ប្រមូល​បានពីការនាំចូលសម្ភារសំណង់មានចំណែក​រហូតដល់ ៣៣% ​នៃចំណូលសរុបជាង ៣ ពាន់លានដុល្លារ។​

នៅក្នុងឆ្នាំ ២០២៥ កម្ពុជា​នាំចូលសម្ភារសំណង់ មានតម្លៃ ២,៦ ពាន់លានដុល្លារ កើន ៣០,៤២% ប្រៀបធៀបនឹងឆ្នាំ ២០២៤៕ ​

អត្ថបទ៖ ឡេង ដេត