ក្រុមហ៊ុនធំៗពីរចាប់ដៃគ្នាបង្កើត​មជ្ឈមណ្ឌលចែកចាយពហុឧស្សាហកម្ម និង​ទាញការវិនិយោគលើវិស័យអចលនទ្រព្យ និងសំណង់នៅកម្ពុជា

ក្រុមហ៊ុន Prince Real Estate Group (PRE) ដែលជាបុត្រសម្ព័ន្ធ​របស់ក្រុមហ៊ុន  ​ Prince Holding Group និងក្រុមហ៊ុន Nong Chuang Gang (NCG) ដែលជាក្រុមហ៊ុនចែកចាយទំនិញ​មានមូលដ្ឋាននៅក្នុងខេត្ត Shandong ​ប្រទេសចិនបានចាប់ដៃគ្នាក្នុងភាពយុទ្ធសាស្ត្រ​ដើម្បីបង្កើតមជ្ឈមណ្ឌលចែកចាយពហុឧស្សាហកម្មក្នុងគោលបំណងលើកកម្ពស់ពាណិជ្ជកម្មឆ្លងព្រំដែន និងធ្វើឱ្យកម្ពុជាក្លាយជាគោលដៅវិនិយោគដ៏សំខាន់នៅក្នុងតំបន់អាស៊ីអាគ្នេយ៍។

ការសម្រេចបាននូវភាពជាដៃគូរយុទ្ធសាស្រ្តនៃក្រុមហ៊ុនទាំងនេះត្រូវធ្វើឡើងតាមរយៈការចុះហត្ថលេខាលើអនុស្សរណៈនៃការយោគយល់គ្នា (MOU​កាលពីល្ងាចថ្ងៃទី០៩តុលានៅទីស្នាក់ការកណ្តាលរបស់ក្រុមហ៊ុន Prince Holding Group ក្នុងរាជធានីភ្នំពេញ។

លោក Edward Lee អគ្គនាយកប្រតិបត្តិនៃក្រុមហ៊ុន Prince Real Estate Group មានប្រសាសន៍នៅក្នុងកម្មវិធីនោះថា   ​ ក្នុងនាមជាដៃគូដ៏សំខាន់នៅក្នុងគំនិតផ្តួចផ្តើមនេះ NCG នឹងដឹកនាំកិច្ចខិតខំប្រឹងប្រែងក្នុងការជំរុញការវិនិយោគ ប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកឆ្លងព្រំដែន និងការគ្រប់គ្រងអាជីវកម្មនាំចូល-នាំចេញអន្តរជាតិ។

លោកបានថ្លែងថា៖«យើងមានសេចក្តីរំភើបរីករាយក្នុងការសហការលើគម្រោងផ្លាស់ប្តូរថ្មីនេះ ដែលនឹងបម្រើជាកាតាលីករសម្រាប់កំណើនសេដ្ឋកិច្ច និងការបង្កើតថ្មីនៅកម្ពុជា។ ភាពជាដៃគូជាមួយ NCG ស្របតាមបេសកកម្មរបស់យើងក្នុងការទាក់ទាញវិនិយោគិនអន្តរជាតិ កាត់បន្ថយការចំណាយប្រតិបត្តិការសម្រាប់អាជីវកម្ម និងកំណត់ស្តង់ដារថ្មីសម្រាប់ការអភិវឌ្ឍន៍អចលនទ្រព្យលើសពីគម្រោងប្រពៃណី»។

ជាមួយគ្នានោះដែរ លោកស្រី Yanling Mei នាយកប្រតិបត្តិនៃក្រុមហ៊ុន Nong Chuang Gang បានមានប្រសាសន៍ថា​តាមរយៈការបង្កើតមជ្ឈមណ្ឌលចែកចាយ និងភស្តុភារដ៏ទូលំទូលាយ យើងអាចប្រើប្រាស់ភាពខ្លាំងរបស់ទាំង PRE និង NCG ដើម្បីផ្តល់នូវតម្លៃប្រកួតប្រជែងសម្រាប់ទំនិញ និងដំណោះស្រាយដឹកជញ្ជូនប្រកបដោយប្រសិទ្ធភាព។បន្ថែមពីនេះគំនិតផ្តួចផ្តើមនេះនឹងផ្តល់ផលប្រយោជន៍មិនត្រឹមតែប្រទេសកម្ពុជាប៉ុណ្ណោះទេ ថែមទាំងទីផ្សារអាស៊ីអាគ្នេយ៍ដ៏ធំទូលាយផងដែរ។

លោកស្រីថា៖«យើងជឿជាក់ថាភាពជាដៃគូនេះនឹងបើកឱកាសថ្មីសម្រាប់សហគ្រាសដែលកំពុងស្វែងរកការចូលទៅក្នុងទីផ្សារកម្ពុជា»។   ​

នៅក្នុងរយៈពេល ៩ ខែ គិតចាប់ពីខែមករា ដល់ខែកញ្ញា ឆ្នាំ ២០២៤ កម្ពុជាសម្រេចបាន​ទឹក​ប្រាក់​ជាង ១៩,៨៣ ពាន់ លានដុល្លារ ពីការ​នាំទំនិញចេញទៅក្រៅប្រទេស ​កើន​ឡើង ១៧ ភាគរយ បើធៀបនឹងរយៈ​ពេលដូចគ្នាក្នុង ២០២៣ ដែលមានទំហំទឹកប្រាក់ ១៦,៩៤ ពាន់​លានដុល្លារ។ នេះ​បើយោងតាម​ទិន្ន​​ន័យ​របស់អគ្គនាយកដ្ឋាន​គយ និង​រដ្ឋាករ​កម្ពុជា ​(GDCE)។

ទិន្នន័យរបស់ GDCE បានបង្ហាញថា ការនាំចេញទំនិញ​របស់កម្ពុជាមានទំហំទឹកប្រាក់ ១៩,៨៣ ពាន់លានដុល្លារ កើន​ឡើង ១៧% ចំណែកឯការនាំទំនិញចូលមកវិញមានទំហំទឹកប្រាក់ ២១,១០ ពាន់លានដុល្លារ កើនឡើង ១៥,៩%។

គម្រោងវិនិយោគចំនួន ២៨ ដែលមានទុនវិនិយោគចំនួន ៤៤៣ លានដុល្លារត្រូវបានអនុម័ត ដោយក្រុមប្រឹក្សាអភិវឌ្ឍន៍កម្ពុជាក្នុងខែកញ្ញា ឆ្នាំ ២០២៤។ក្រុមប្រឹក្សាអភិវឌ្ឍកម្ពុជាបានប្រកាសនៅថ្ងៃទី ០៧ ខែកញ្ញា ឆ្នាំ ២០២៤ នេះថា គម្រោងវិនិយោគទាំង ២៨ អាចបង្កើតការងារបានប្រមាណ ២៥ ពាន់កន្លែង។

ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសចំនួន ៦ គម្រោង និងគម្រោងវិនិយោគដែលមានទីតាំងក្នុងតំបន់សេដ្ឋកិច្ចពិសេសមានចំនួន ២២ គម្រោង៕

​