ទឹកប្រាក់ជាង២,៥០០​ពាន់លានដុល្លារត្រូវបានកម្ពុជាចំណាយ​លើការនាំចូល​សំភារៈ​សំណង់កាលពីឆ្នាំមុន

កម្ពុជាបានចំណាយប្រាក់ជាង២,៥១១ពាន់លានដុល្លារ​លើការនាំចូលសំភារៈសំណង់ក្នុងឆ្នាំ២០២៤កន្លងទៅនេះ កើនឡើងជិត​៣៦​ភាគារយ ធៀបនឹងឆ្នាំ២០២៣ ដែលទឹកប្រាក់ជាង​១,៨៤៩ពាន់លានដុល្លារ ខណៈអ្នកជំនាញបានលើកឡើងអំពីការងើបឡើងវិញសន្សឹមៗនៃវិស័យសំណង់ និងអចលនទ្រព្យកាលពីឆ្នាំមុននិងបន្តកាន់តែល្អសម្រាប់ឆ្នាំ២០២៥នេះ។

យោងតាមរបាយការណ៍ពីអគ្គនាយកដ្ឋានគយ និងរដ្ឋករកម្ពុជា ក្នុងចំណោមទឹកប្រាក់នាំចូលសំភារៈសំណង់ជាង ២,៥១១ ពាន់លានដុល្លារនេះ ក្នុងនោះការនាំចូលសំភារៈសំណង់ចាំបាច់នានាមានទឹកប្រាក់ជាង ១​,៦៥២ ពាន់លានដុល្លារកើនឡើងជាង២៤%; ការចំណាយលើការ​នាំចូល​ដែកនានាមានទឹកប្រាក់ជាង៨៤២លានដុល្លារ កើនឡើងជិត ៦៩% និងការចំណាយ​លើ​​ការនាំ​ចូលស៊ីម៉ង់ត៍មានទឹកប្រាក់ជិត ១៧លានដុល្លារថយចុះជិត១៧%។​

លោកបណ្ឌិត គីម ហ៊ាង អគ្គនាយកបុរី វិមានសំណាង បានលើកឡើងកាលពីពេលថ្មីៗ​កន្លងទៅនេះថា ស្ថានភាព​ទីផ្សារទិញ-លក់អចលនទ្រព្យ​បាន​ចាប់​​​​ផ្ដើម ​កម្រើកឡើងវិញនៅក្នុងឆ្នាំ ២០២៤ បន្ទាប់ពីបានឆ្លង​កាត់វិបត្តិជំងឺ​កូវីដ១៩ និង​សង្គ្រាម​។

លោកបណ្ឌិត គីម ហ៊ាងបញ្ជាក់ថា៖ «រឿងអាក្រក់បានកើតឡើងរួចហើយ បើនិយាយពី​ក្រុម​ហ៊ុន ឬបុគ្គលដែលពាក់ព័ន្ធនឹងវិស័យដីធ្លី អ្នកណា​ ដែលត្រូវក្ស័យធន គឺគាត់ក្ស័យរួចហើយ អ្នកណា​ដែលលំបាកគឺលំបាកហើយ អញ្ចឹងវាដល់ពេលមួយដែល​ញែក​ដាច់ថាតើនរណា ជាមនុស្ស​ដែលអាច​ឈរជើងបាន ហើយនរណាដែលត្រូវក្ស័យធន អញ្ចឹងន​រណាដែលអាច​ឈរជើងដល់បច្ចុប្បន្ន អ្នកនោះគឺគាត់ឆ្លងផុតវិបត្តិរួចហើយ»។

អ្នកវិភាគសេដ្ឋកិច្ចឯករាជ្យលោក ង៉ែត ជូ បានលើកឡើងថា ការទិញ លក់ ចាប់ផ្ដើម​មាន​សញ្ញាកម្រើកឡើងវិញ ប៉ុន្តែមិនច្រើនទេ។ ជាទូទៅ​នៅពេលដែលមានការផ្គត់ផ្គង់ច្រើន នោះតម្លៃនឹងល្អ ហើយអ្នកដែលមានលទ្ធភាពនៅ​ពេល​បច្ចុប្បន្ន អ្នកខ្លះក៏ចាប់យកឱកាស ហ៊ានវិនិយោគ ប៉ុន្តែក៏មានអ្នកប្រឈមនឹងជាប់គាំង​ក្នុង​ការលក់ចេញច្រើន ដោយសារ​តែទំ​ហំនៃការផ្គត់ផ្គង់នៅលើទីផ្សារ ដូចជា ផ្ទះ ដី និងសំណង់​អាគារ គឺសម្បូរមានអ្នកលក់។

លោក ឃួង ស្រេងអភិបាលរាជធានីភ្នំពេញ បានលើកឡើងនៅក្នុងពិធីបើកការតាំងពិព័រណ៍ឧស្សាហកម្មសំណង់កម្ពុជា-អន្តរ​ជាតិ ឆ្នាំ២០២៤ នៅថ្ងៃទី ០៥ ខែធ្នូ ឆ្នាំ ២០២៤ថា​ គិតត្រឹមរយៈពេល ១០ ខែ ឆ្នាំ ២០២៤ រាជធានីភ្នំពេញទទួលបានគម្រោងសាងសង់ចំនួន ៥១៦ គម្រោងជាមួយទុន​វិនិ​យោគប្រមាណ ១ ពាន់លានដុល្លារអាមេរិក។ ក្នុងនោះ វិស័យសំណង់នៅរាជធានីភ្នំពេញ មាន​ការ​រីកចម្រើន ដែលមាន​អា​គារ​ពាណិជ្ជកម្ម សណ្ឋា​គារ ខុនដូប្រណីត ត្រូវបានសាងសង់ឡើងបន្តបន្ទាប់ ដែលសរុប​ជាសំណង់បុរី និងផ្ទះ​ល្វែង​ចំនួន ៤៤៨ កន្លែង និងអាគារខ្ពស់ៗ ចំនួន ១ ៨៤៩ អាគារ។​

​​កាលពីពេលថ្មីៗកន្លងទៅនេះ ធនាគារជាតិនៃកម្ពុជា និងក្រសួងដែនដី នគររូបណីយកម្ម និងសំណង់ បានជួបប្រជុំជាមួយគ្រឹះស្ថានធនាគារ និងមីក្រូហិរញ្ញវត្ថុ​ដោយស្នើរឱ្យ​បញ្ចុះអត្រាការប្រាក់កម្ចីសម្រាប់អតិថិជនលើការបង់រំលង់ផ្ទះនានា។

លោក តូច ចៅចេក ប្រធាននាយកប្រតិបត្តិធនាគារប្រៃសណីយ៍កម្ពុជា មានប្រសាសន៍ថា យន្ត​ការនេះគឺល្អទាំងសង​ខាង ដោយសារតែអ្នកដែលប្រើប្រាស់ ការបង់រំលោះនៅបុរី​នោះជួន​កាល គាត់​​​អាចមានការប្រាក់ថ្លៃ ហើយម្ចាស់បុរីមានសាច់ប្រាក់មានកម្រិត គាត់ត្រូវការ​លុយ​ដើម្បី​ធ្វើ​បន្តទៀត ដូច្នេះបើគាត់ត្រឡប់មកប្រើលុយហ្នឹងជាមួយធនាគារវិញ គឺល្អប្រសើរ។

លោក តូច ចៅចេកមានប្រសាសន៍ថា៖ «ខាងធនាគារជាតិ ក៏ដូចជាក្រសួងរៀបចំដែនដី ចង់​ស្វះ​​ស្វែងឱ្យធនាគារទាំងអស់ ជួយសហការ​ផ្ដល់​កម្ចីក្នុងអត្រាការ​ប្រាក់មួយដែលល្អប្រសើរ​សម​រម្យត្រឹម ៧% ទៅ ៨% ធនា​គារ​មិនពិ​បាក​ក្នុងារផ្ដល់ជូនទេ»។ ​

យោងតាមធនាគារជាតិ គិតត្រឹមខែតុលា ឆ្នាំ២០២៤ ឥណទានផ្តល់ដោយគ្រឹះស្ថានធនាគារ និងហិរញ្ញវត្ថុទៅក្នុង​វិស័យ​អចល​នទ្រព្យមានប្រមាណ ៦,២០ ពាន់លានដុល្លារ ឬស្មើនឹង ១០%​នៃទំហំឥណទាន​ជាង ៦១​​ ​ពាន់លានដុល្លារ មានកំណើន ១៧,៨% ធៀបនឹងរយៈពេលដូចគ្នា ក្នុងឆ្នាំ ២០២៣៕