ស្វាយកែវ​ល្មៀត​គ្មាន​ទីផ្សារ ធ្វើ​ឱ្យ​ពលរដ្ឋ​ចាក់ចោល​រាប់តោន

ស្វាយកែវ​ល្មៀត​រាប់​តោន ត្រូវ​បានប្រជាពលរដ្ឋ​ដឹក​យក​ចាក់​ចោល​ពាស​វាល​ពាសកាល ខណៈ​ទីផ្សារ​របស់ស្វាយកែវមៀត តម្លៃ​ស្ទើរ​ស្មើសូន្យ ហើយ​សឹងតែគ្មានឈ្មួញទិញទាល់តែសោះ។

ប្រហែលមួយសប្តាហ៍ចុងក្រោយនេះ គេសង្កេតឃើញមានប្រជាពលរដ្ឋដឹកស្វាយកែវល្មៀត យកទៅចាក់ចោលពាសវាលពាសកាល ពិសេសគឺនៅត្រង់ចំណុច ភូមិព្រះពុទ្ធ ឃុំបឹងរាំង ស្រុកកំរៀង ខេត្តបាត់ដំបង ដែលការចាក់ចោលស្វាយរាប់តោនទាំងនេះ គឺ​មានន័យ​ថា ទីផ្សារស្វាយកែវល្មៀតរបស់ពួកគាត់គ្មានទីផ្សារទាល់តែសោះ។

អ្នកស្រី ឈឺន សាវ័ន រស់នៅភូមិលំផាត់ ឃុំអូរដា ស្រុកកំរៀង បានរៀបរាប់ថា បច្ចុប្បន្ន​ស្វាយ​របស់អ្នកស្រីចោលពេញចំការ ដោយមិនបានប្រមូលផល​សោះឡើយ ដោយសារតែគ្មានទីផ្សារ ហើយក៏គ្មានឈ្មួញណាម្នាក់ចុះទិញទាល់តែសោះ។

អ្នកស្រីបានបន្តថា សព្វថ្ងៃនៅមានឈ្មួញម្នាក់ដែលចុះទិញផ្លែស្វាយកែវល្មៀតទាំងនេះ ប៉ុន្តែការចុះទិញគឺគេជ្រើសរើសយកផ្លែស្វាយណាដែលមានទំហំស្មើនឹង ២ ទម្ងន់មួយគីឡូក្រាម.ឬ ៣ ផ្លែស្មើមួយគីឡូក្រាម បើចូលខ្នាត ៤ ស្មើ ១ គីឡូក្រាម គឺគេមិនទិញជាដាច់ខាត ហើយម្យ៉ាងវិញទៀតការជ្រើសរើសផ្លែ ដោយសំរាំងយកផ្លែធំៗដើម្បីទិញនេះ គឺបានតម្លៃត្រឹមតែ ១៥០ រៀល ក្នុងមួយគីឡូក្រាម តែប៉ុណ្ណោះ ហើយនៅក្នុងតម្លៃនេះ សឹងតែគ្មានអ្នកចុះទិញទាល់តែសោះ។

ដោយសារតែបញ្ហាបែបនេះហើយ ទើប​ធ្វើ​ឱ្យ​ប្រជាពលរដ្ឋ​ដែលជ្រុលខ្លួន​បេះផ្លែស្វាយទៅហើយនោះ មាន​តែ​ដឹក​ទៅ​ចាក់​ចោល​តាម​ទី​សាធារណៈ​តែ​ប៉ុណ្ណោះ ឯ​អ្នក​ដែល​មិនទាន់​បាន​បេះ​ គឺទុកចោលស្អុយរលួយនៅនឹងដើម គ្មាន​នរណាយកភ្នែកមើលនោះឡើយ។ អ្នកស្រីក៏បាន​ទទូច​សំណូមពរ​ដល់មន្ត្រីជំនាញ មេត្តាធ្វើយ៉ាងណាជួយរកទីផ្សារស្វាយកែវល្មៀត ឱ្យបាន​តម្លៃសមរម្យ​ផង ព្រោះ​បើ​មិន​ដូច្នេះ​ទេ​ប្រជាជន​ច្បាស់​ជា​វ័ណ្ឌក​ជា​មិនខាន​ដោយសារការ​ជំពាក់​បំណុល​គេ យកដើមមក​ប្រកបរបរ​កសិកម្ម​បែប​នេះ៕

អត្ថបទ ៖ សោ និយមរ័ត្ន