ការនាំចេញរថយន្តដឹកអ្នកដំណើររបស់ កូរ៉េខាងត្បូង ឡើងដល់កម្រិតខ្ពស់​បំផុតក្នុងត្រីមាសទី ៣

ទិន្នន័យគយកូរ៉េខាងត្បូងបានបង្ហាញថា ការនាំចេញរថយន្តដឹកអ្នកដំណើររបស់កូរ៉េខាងត្បូងបានឡើងដល់កម្រិតខ្ពស់បំផុតនៅក្នុងត្រីមាសទី ៣ ដោយសារតែតម្រូវការខ្ពស់សម្រាប់យានយន្តដែលមិនប៉ះពាល់ដល់បរិស្ថាន ។

ការនាំចេញរថយន្តនេះបានកើនឡើង ៣០.១ ភាគរយ បើប្រៀបធៀបនឹងឆ្នាំមុន ដែលជាការឈានដល់កម្រិតខ្ពស់ប្រចាំត្រីមាសថ្មី ពោលមានចំនួន ១២.៦៣ ពាន់លានដុល្លារអាមេរិក ចន្លោះខែកក្កដាដល់ខែកញ្ញា ។

ក្នុងនោះ ការនាំចេញរថយន្តដឹកអ្នកដំណើរ គឺទៅកាន់សហរដ្ឋអាមេរិក កាណាដា អូស្ត្រាលី អាល្លឺម៉ង់ អារ៉ាប៊ីសាអូឌីត និងអេស្បាញ ដោយតួលេខកើនឡើងចំនួន ២ ខ្ទង់នៅក្នុងត្រីមាសទី ៣ ហើយចំណែកការនាំចេញទៅកាន់ប្រទេសបារាំង វៀតណាម និងហូឡង់ វិញ បានធ្លាក់ចុះរហូតដល់ ២ ខ្ទង់ ។

ដោយឡែក ការនាំចូលរថយន្តដឹកអ្នកដំណើរវិញ បានកើនឡើង ១៧.៧ ភាគរយក្នុងឆ្នាំនេះ ពោលក្នុងទំហំទឹកប្រាក់ ៣.៥ ពាន់លានដុល្លារ ស្ថិតក្នុងត្រីមាសទី ៣ ។

ចំពោះ ការនាំចូលរថយន្តដឹកអ្នកដំណើរដែលមិនប៉ះពាល់ដល់បរិស្ថាន ក៏បានកើនឡើងផងដែរ ពោល ២៩.៣ ភាគរយ ដោយកើនដល់ ១.៧៩ ពាន់លានដុល្លារ ៕

ប្រែសម្រួលដោយ ៖ នាង រតនៈ

ប្រភព ៖ Xinhua

ចុចអាន ៖ សាក្សី ៖ ហ្វូងមនុស្សក្នុងបុណ្យ Halloween គិតថា ជាការសម្ដែងជាន់គ្នា​ស្លាប់ ទើបរាំសប្បាយនៅមុខរថយន្តសង្គ្រោះបន្ទាន់