លោក គង់ វិបុល៖ ពន្ធដារប្រមូលចំណូល​លើសផែនការជាង ៦០០លានដុល្លារ ក្នុងឆ្នាំ ២០២២

អគ្គនាយកដ្ឋានពន្ធដារ ប្រមូលចំណូលបានចំនួន ៣៤៥៥លានដុល្លារ នៅក្នុងឆ្នាំ ២០២២កន្លងទៅ ដោយលើសផែន​ការប្រមាណ ៦០០លានដុល្លារ ស្មើនឹង ២២,៥៤ភាគរយ។ នេះបើតាមការលើកឡើងរបស់លោក គង់ វិបុល អគ្គនាយកដ្ឋានពន្ធដារ ថ្លែងនៅក្នុងកម្មវិធីពិសេសស្តីពី ពន្ធលើប្រាក់ចំណូល និងការផ្តល់សេវា របស់អគ្គនាយក​ដ្ឋានពន្ធដារ នាថ្ងៃទី ១៩ ខែ មករា។

លោក គង់ វិបុល បានបញ្ជាក់ថា នៅឆ្នាំ ២០២២ គឺជាឆ្នាំកើតមានវិបត្តិកូវីដ-១៩ និងសង្រ្គាមរវាងរូស្ស៊ី អ៊ុយក្រែន ធ្វើឱ្យប៉ះពាល់ដល់សេដ្ឋកិច្ចពិភពលោកធ្ងន់ធ្ងរ នាំឱ្យអតិផរមាឡើងខ្វះខាតការផ្គត់ផ្គង់ស្បៀងអាហារ និងសម្ភារប្រើ​ប្រាស់មួយចំនួន។

ទោះយ៉ាងណា ប្រធានពន្ធដារ បានសង្កត់ធ្ងន់ថា «យើងបានដើរឆ្លងផុតនូវគ្រោះទាំងនេះ ហើយបានប្រមូលចំណូល​ពន្ធដារ​ទទួលបានលទ្ធផលល្អប្រសើរ ដែលនឹកស្មានមិនដល់»។ លោក គង់ វិបុល បានលើកឡើងថា លទ្ធផលល្អប្រ​សើរនេះ កើតចេញពីការខិតខំប្រឹងប្រែងរបស់ប្រទេសជាតិទាំងមូល ក្រោមការដឹកនាំប្រកប​ដោយគតិបណ្ឌិត​របស់សម្តេចតេជោ ហ៊ុន សែន នាយករដ្ឋមន្រ្តី ដោយបានដឹកនាំវាយឈ្នះសមរភូមិកូវីដ និងឆ្លងកាត់ការលំបាក​គ្រប់បែបយ៉ាង ដែលប្រទេសជាតិជួបប្រទះ នៅក្នុងរយៈពេលកូវីដ និងសង្គ្រាមដែលធ្វើឱ្យប៉ះពាល់​ផ្នែកសេដ្ឋកិច្ច​របស់កម្ពុជា​ផងដែរ។

ជាមួយគ្នានេះ ការដឹកនាំរបស់រដ្ឋមន្រ្តីក្រសួងសេដ្ឋកិច្ច ក៏បានតម្រង់ទិសនៃអង្គភាពពន្ធដារនេះ ឱ្យបានរីកចម្រើនផងដែរ។ នេះជាការបន្ថែមរបស់លោក គង់ វិបុល៕