ឧកញ៉ា លឹម ហេង៖ កំណើនបង្កើតរោងចក្រ​នៅកម្ពុជា ជាសញ្ញាល្អ​សម្រាប់សេដ្ឋកិច្ចជាតិ

ដើមឆ្នាំ ២០២៣នេះ រាជរដ្ឋាភិបាល តាមរយៈក្រសួងពាណិជ្ជកម្ម និងក្រុមប្រឹក្សាអភិវឌ្ឍន៍កម្ពុជា បានសម្រេចចុះ​បញ្ជីក្រុមហ៊ុន និងអនុម័តឱ្យបង្កើតរោងចក្រជាបន្តបន្ទាប់នៅកម្ពុជា។

កំណើននៃការបង្កើតរោងចក្រជាលំដាប់នេះ ជាសញ្ញាល្អសម្រាប់កំណើនសេដ្ឋកិច្ចជាតិ។ នេះជាការបញ្ជាក់របស់​លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា។

លោកឧកញ៉ាមើលឃើញថា ការបើកប្រទេសឡើងវិញ ក្រោយវិបត្តិកូវីដ-១៩ ធ្វើឱ្យដំណើរការរោងចក្រមានភាព​ប្រក្រតីឡើងវិញ ជាពិសេសវត្ថុធាតុដើម ដែលនាំចូលពីប្រទេសផ្សេងៗ ដូចជា ចិនជាដើម បានធ្វើឱ្យដំណើរការ​សង្វាក់ផលិតកម្មកើនឡើងសម្រាប់នាំចេញល្អប្រសើរ។ លើសពីនេះទៀត លោកកត់សម្គាល់ឃើញថា ការរក្សាបាន​ស្ថិរភាពនយោបាយ ការទប់ស្កាត់ការឆ្លងរាលដាលជំងឺកូវីដ បានផ្តល់ទំនុកចិត្តដល់អ្នកវិនិយោគបរទេស ចូលមកវិនិ​យោគបង្កើតរោងចក្រសហគ្រាស នៅកម្ពុជា កាន់តែច្រើនឡើង។

ទន្ទឹមនឹងនេះ លោកថា កម្ពុជា ក៏បង្កើតបានកិច្ចព្រមព្រៀងសេរីពាណិជ្ជកម្ម EBA GSP ដែលអនុគ្រោះពន្ធនាំ​ចេញផលិត​ផលឧស្សាហកម្មកាត់ដេររោងចក្រផងដែរ។

បើតាមលោកឧកញ៉ា លឹម ហេង មើលឃើញថា ទៅថ្ងៃអនាគតកម្ពុជា កាន់តែមានការរីកចម្រើនផ្នែកឧស្សាហកម្ម រោចក្រ ក្រោយអនុវត្តកិច្ចព្រមព្រៀងសេរីពាណិជ្ជកម្មកម្ពុជា ចិន កូរ៉េ ក៏ដូចជា RCEP នឹងជំរុញកាន់តែខ្លាំង​ផ្នែកឧស្សាហកម្ម និងកសិកម្ម ពិសេសទៅលើធនធានធម្មជាតិ ដូចជា ធនធា​នរ៉ែ និងថាមពល ជាដើម។

ចំណែក ផ្នែកឧស្សាហកម្មរថយន្ត និងអេឡិចត្រូនិក ក៏នឹងអាចមានការកើនឡើងផងដែរ ដោយមានភាពអនុគ្រោះច្រើន តាមរយៈការលើកទឹកចិត្ត ច្បាប់វិនិយោគថ្មី ដែលជាភាពទាក់ទាញមួយ ជាពិសេសការចុះបញ្ជីមាន​ភាពងាយស្រួល​តាមរយៈថ្នាលបច្ចេកវិទ្យាព័ត៌មាន CamDX របស់ក្រសួងសេដ្ឋកិច្ច ក្រសួងពាណិជ្ជកម្ម និងក្រុមប្រឹកអភិវឌ្ឍន៍កម្ពុជា ដែលជាការទាក់ទាញអ្នកវិនិយោគពីបរទេសចូលមកអភិវឌ្ឍនៅកម្ពុជា។

គិតចាប់ពីខែមករា ដល់ថ្ងៃទី ១៤ ខែកុម្ភៈឆ្នាំ ២០២៣ ក្រុមប្រឹក្សាអភិវឌ្ឍន៍កម្ពុជា បានសម្រេចអនុម័តឱ្យបង្កើត​គម្រោង​រោងចក្រចំនួន ២១ នៅតាមគោលដៅមួយចំនួន មានដូចជា នៅរាជធានីភ្នំពេញ ខេត្តកណ្តាល ព្រះសីហនុ និងខេត្ត​កំពង់​ស្ពឺច្រើនជាងគេ ដែលបានផ្តល់ការងារជូនពលរដ្ឋក្នុងតំបន់រាប់ម៉ឺនកន្លែង។

អ្នកជំនាញសេដ្ឋកិច្ច បានលើកឡើងថា គម្រោងនៃការបង្កើតរោងចក្រថ្មីៗនេះ បានរួមចំណែកជំរុញកំណើនសេដ្ឋកិច្ចជាតិ តាមរយៈការនាំចេញ ផ្តល់ប្រាក់ចំណូលដល់ពលរដ្ឋ និងបង្កើនប្រាក់ចំណូលពន្ធផងដែរ៕