លោក ពូទីន អះអាងថា ទណ្ឌកម្មលោកខាងលិច មិនអាចធ្វើអ្វី រុស្ស៊ី បានទេ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃអង្គារថា សេដ្ឋកិច្ចរុស្ស៊ីអាចទប់ទល់នឹងការដាក់ទណ្ឌកម្មរបស់លោកខាងលិចបាន ហើយអនុវត្តយ៉ាងខ្លាំងក្លាជាងអ្វីដែលលោកខាងលិចគិតទៅទៀត ។

នៅក្នុងសុន្ទរកថាប្រចាំឆ្នាំទៅកាន់សភាសហព័ន្ធ លោក ពូទីន ថ្លែងថា រុស្ស៊ីធានាបានស្ថិរភាពនៃស្ថានភាពសេដ្ឋកិច្ច ការការពារប្រជាពលរដ្ឋ និងការងារដែលបានរក្សាទុក ក៏ដូចជាការពារការខ្វះខាតទីផ្សារ រួមទាំងទំនិញសំខាន់ៗ និងគាំទ្រដល់ប្រព័ន្ធហិរញ្ញវត្ថុ និងសហគ្រិនជាច្រើន ។

ជាមួយទិន្នន័យចុងក្រោយបំផុតបានបង្ហាញថា GDP របស់រុស្ស៊ីបានធ្លាក់ចុះ ២.១ ភាគរយក្នុងឆ្នាំ ២០២២ ដោយបានផ្តួលការធ្លាក់ចុះសេដ្ឋកិច្ចពី ២០ ទៅ ២៥ ភាគរយដែលត្រូវបានព្យាករណ៍ដោយអ្នកវិភាគលោកខាងលិចកាលពីដើមឆ្នាំមុន ។

ចំណែកភាគហ៊ុននៃប្រាក់រូបិ៍នៅអន្តរជាតិរបស់រុស្ស៊ី បានកើនឡើងទ្វេដង បើធៀបនឹងខែធ្នូ ឆ្នាំ ២០២១ ។ លោក ពូទីន បញ្ជាក់ថា ទីក្រុងមូស្គូនឹងបន្តធ្វើការជាមួយដៃគូដើម្បីបង្កើតប្រព័ន្ធទូទាត់សកលប្រកបដោយស្ថិរភាព និងសុវត្ថិភាព ដោយមិនគិតពីប្រាក់ដុល្លារអាមេរិក និងរូបិយប័ណ្ណលោកខាងលិចផ្សេងទៀតទេ ។

ជាចុងក្រោយលោក ពូទីន សង្កត់ធ្ងន់ថា អ្នកផ្តួចផ្តើមគំនិតដាក់ទណ្ឌកម្ម គឺកំពុងដាក់ទណ្ឌកម្មខ្លួនឯង ហើយប្រទេសទាំងនោះបានជំរុញឲ្យមានអតិផរណានៅក្នុងប្រទេសរបស់ពួកគេ ជាពិសេសធ្វើឲ្យពលរដ្ឋបាត់បង់ការងារ ការបិទសហគ្រាស និងវិបត្តិថាមពលជាដើម ប៉ុន្តែពួកគេបែរជាប្រាប់ពលរដ្ឋរបស់ពួកគេថា ត្រូវតែដាក់បន្ទុក ឬទម្លាក់កំហុសទៅពលរដ្ឋរុស្ស៊ីទៅវិញ ៕

ប្រែសម្រួលដោយ៖ នាង រតនៈ

ប្រភព ៖ Xinhua

ចុចអាន ៖ លោក ពូទីន ថា រុស្ស៊ី នឹងកាន់តែខ្លាំងជាងមុន បើបង្រួបបង្រួមជាមួយតំបន់ Donbass