លោក សោម ពិសិដ្ឋ៖ ធនាគារក្តាមសេះ ជួយឱ្យមានកំណើនក្តាមសមុទ្រ​ផ្គត់ផ្គង់ទីផ្សារក្នុងស្រុក

ធនាគារ​ក្តាមសេះ គឺជា​កន្លែង​ស្តុក​ក្តាម​ពង​រហូតដល់​ក្តាម​ពង​ចេញ និង​ភ្ញាស់​កូន​។ អ្នកនេសាទ​ដែល​ជា​សមាជិក ធនាគារ​ក្តាម​ពេល​នេសាទ​បាន​ក្តាមមាន​ពង​តម្រូវឱ្យ​យក​ក្តាម​នោះ ​មក​លក់​ឱ្យ​ធនាគារ​ក្តាមសេះ ដើម្បីឱ្យ​ក្តាម​ទាំងនោះ ​អាច​ញាស់​កូន បន្ទាប់មក កូន​ក្តាម​ទាំងអស់​ត្រូវ​លែង​ចូល​សមុទ្រ​។

លោក សោម ពិសិដ្ឋ អភិបាលខេត្តកែប បានលើកឡើងថា ធនារគារក្តាមសេះ បាននិងកំពុងកាត់បន្ថយការប្រើប្រាស់ ការចាប់នេសាទពីធម្មជាតិ។ លោកបញ្ជាក់ថា ធនាគារក្តាមសេះនេះ បានទិញក្តាមមានពងក្រៅសន្ទះទ្រូង យកមកលែង​ក្នុងកាឆាំង បែ ឬសំណាញ់ ដែលដាក់ធ្វើជាធនាគារក្តាម។

លោកបន្ថែមដូច្នេះថា« យើងទិញបានហើយ យកមកលែងរយៈពេល ៦ទៅ៧ថ្ងៃ ដើម្បីឱ្យកូនក្តាមជ្រុះកូនរាប់ម៉ឺន​រាប់លានក្បាល ឱ្យហែលទៅសមុទ្រទឹកជ្រៅទៅរកកន្លែងស្មៅសមុទ្រ ដើម្បីរស់។ ពេលជ្រុះកូននេះអស់ ទើបអាចយកមេក្តាមប្រើប្រាស់ ឬបរិភោគបាន»។

បើតាមលោក សោម ពិសិដ្ឋ គោលការណ៍ដែលធ្វើកន្លងមក គឺទទួលបានថវិកាពីដៃគូ ក្នុងការទិញក្តាមដែលមាន​ពងក្រៅសន្ទះទ្រូង។ សម្រាប់ប្រសិទ្ធភាពរបស់ធនាគារក្តាមសេះ គឺដើម្បីកាត់បន្ថយការនេសាទពីធម្មជាតិ។ លោកថា បច្ចុប្បន្ន ក្តាមធម្មជាតិ កើតមិនទាន់តមម្រូវការ ដោយសារបម្រែបម្រួលអាកាសធាតុ ធ្វើឱ្យធនធានធម្មជាតិប្រែប្រួល។ មួយវិញទៀតការនេសាទដែលប្រើឧបករណ៍ខុសច្បាប់ ធ្វើឱ្យប៉ះពាល់ដល់ធនធានធម្មជាតិ មច្ឆាជាតិ ធ្វើឱ្យកើត​មិនទាន់តម្រូវការ។

ទោះយ៉ាងណា លោកអភិបាលខេត្ត លើកឡើងថា អាជ្ញាធរបានជំរុញការធ្វើវារីវប្បកម្ម មិនត្រឹមតែទៅលើធនាគារក្តាមទេ គឺបង្កើត​ការចិញ្ចឹមត្រី បង្គា ក្តាមថ្ម ដើម្បីផ្គត់ផ្គង់ទីផ្សារឱ្យបានគ្រប់គ្រាន់ និងទប់ទល់ការឡើងថ្លៃទំនិញ នៅពេលដែល​មាន​​តម្រូវការ​ខ្ពស់។

សូមបញ្ជាក់ថា ការលើកឡើងរបស់លោក សោម ពិសិដ្ឋ ធ្វើឡើងនៅក្នុងសន្និសីទ ស្ដីពី “ភាពជោគជ័យក្នុងរយៈពេល ៥ឆ្នាំកន្លងមក” របស់រដ្ឋបាលខេត្តកែប រៀបចំដោយអង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី ១១ ខែ ឧសភា ឆ្នាំ ២០២៣៕