ផ្សារមូលបត្រកម្ពុជាផ្តល់ឪកាសដល់វិនិយោគិនសាធារណជនរយៈពេល៣៣ថ្ងៃទិញហ៊ុនក្រុមហ៊ុនចុះបញ្ជីដោយពុំគិតកម្រៃសេវា

ភ្នំពេញ៖ ជាកិច្ចខិតខំប្រឹងប្រែងក្នុងការជំរុញសាធារណជនឱ្យងាកមកចាប់អារម្មណ៍វិនិយោគលើវិស័យមូលបត្រ ផ្សារមូលបត្រកម្ពុជា (CSX)បានដាក់ចេញនូវយន្តការថ្មីមួយដោយផ្តល់ឪកាសដល់វិយោគិននានាធ្វើការទិញភាគហ៊ុនក្រុមហ៊ុនចុះបញ្ជីដោយមិនគិតកម្រៃសេវាសម្រាប់រយៈ៣៣ថ្ងៃ។

លោក ហុង សុហួរ នាយកប្រតិបត្តិនៃ​CSX​បានថ្លែងនៅក្នុងសេចក្តីប្រកាសព័ត៌មានចុះថ្ងៃទី២៣ ខែឧសភាថា ដើម្បីតបស្នងដល់វិនិយោគិនចាស់ និងបង្កើនឪកាសដល់វិនិយោគិនថ្មីក្នុងការចាប់ផ្តើមវិនិយោគក្នុងទីផ្សារមូលបត្រក្នុងរដូវកាលបែងចែកភាគលាភក្នុងឆ្នាំ២០២៤នេះ CSX ផ្តល់ជូនកម្មវិធីដ៏ពិសេសដែលមិនធ្លាប់មានពីមុនមកគឺ«កម្មវិធីទិញភាគហ៊ុនទាំងអស់នៅផ្សារមូលបត្រកម្ពុជាដោយឥតកម្រៃជើងសា»។

កម្មវិធីនេះមានរយៈពេល៣៣ថ្ងៃគិតចាប់ពិថ្ងៃទី២៧ ខែឧសភាដល់ថ្ងៃទី២៨ខែមិថុនាឆ្នាំ២០២៤ ដោយវិនិយោគិនអាចទិញរាល់ភាគហ៊ុនដែលចុះបញ្ជីនៅCSX ដោយពុំមានការគិត​​  កម្រៃជើងសាពីក្រុមហ៊ុនឈ្មួញជើងសាមូលបត្រទាំងអស់ដែលជាសមាជិករបស់CSX។

លោកបានថ្លែងថា៖«កម្មវិធីមិនគិតកម្រៃសេវាទិញនេះ ត្រូវបានផ្តួចផ្តើមស្របពេលជាមួយនឹងរដូវកាលបែងចែកភាកលាភសម្រាប់ឆ្នាំ២០២៤ ជាពេលវេលាដែលក្រុមហ៊ុនបោះផ្សាយភាគច្រើននៅ CSXប្រកាសបែងចែកភាគលាភប្រចាំឆ្នាំជូនវិនិយោគិនដែលការណ៍នេះនឹងផ្តល់គុណប្រយោជន៍ទ្វេរដងជូនវិនិយោគិន ទាំងឪកាសទិញភាគហ៊ុនដោយឥតគិតថ្លៃសេវា និងឪកាសទទួលបានភាគលាភពីក្រុមហ៊ុនបោះផ្សាយ»។

លោកបានថ្លែងពន្យល់ទៀតថា CSX យល់ឃើញថា វិនិយោគិនគ្រប់រូបជាពិសេសប្រជាពលរដ្ឋកម្ពុជា គួរមានឪកាសទទួលបានបទពិសោធន៍អំពីការវិនិយោគភាគហ៊ុន និងទទួលបានអត្ថប្រយោជន៍ពីកំណើននៃទីផ្សារមូលបត្រកម្ពុជា ក៏ដូចជាកំណើននៃសេដ្ឋកិច្ចកម្ពុជា។ ជាមួយនឹងកម្មវិធីទិញភាគហ៊ុនដោយមិនគិតកម្រៃជើងសានេះ CSX មានគោលបំណងបង្កើនលទ្ធភាពជាអតិបរមាដល់ពលរដ្ឋគ្រប់រូប ក្នុងការចូលរួមវិនិយោគជាមួយក្រុមហ៊ុនប្រកបដោយសក្តានុពល ដើម្បីបង្កើនទ្រព្យតាមរយៈទីផ្សារមូលបត្រ។

«ជាមួយនឹងការកាត់បន្ថយរបាំងក្នុងការចូលរួមក្នុងទីផ្សារ យើងក៏រំពឹងថានឹងមានកំណើនសន្ទនីយភាព និងទំហំជួយដូរផងដែរ។ វិនិយោគិនក៏អាចមានភាពបត់បែនក្នុងការអនុវត្តយុទ្ធសាស្រ្តជួញដូររបស់ខ្លួនបានដោយប្រសិទ្ធភាព និងទទួលបានអត្ថប្រយោជន៍ពីទីផ្សារដ៏សកម្ម។ ជាងនេះទៅទៀត កំណើននៃការចួលរួមវិនិយោគក្នុងទីផ្សារតាមរយៈកម្មវិធីនេះរំពឹងថា នឹងអាចជួយឱ្យភាគហ៊ុនជួញដូរនៅថ្លៃដ៏ទាក់ទាញមួយ ដែលអាចឱ្យវិនិយោគិនរំពឹងទុកនូវកំណណើនតម្លៃផលបត្ររបស់លោកអ្នក»។ នេះបើយោងតាមលោក ហុង សុហួរ។​

​​បានបើយោងតាម CSX ​​ គិត​ត្រឹម​ចុងខែ​ធ្នូ ឆ្នាំ ២០២៣ មាន​ក្រុមហ៊ុន​ចុះបញ្ជី​ចំនួន ២២ ដែល​រួម​ក្រុមហ៊ុន​១១ ចុះបញ្ជី​មូល​ប​ត្រ​កម្ម​សិទ្ធ និង​ក្រុមហ៊ុន​ចំនួន ១១ ចុះបញ្ជី​សញ្ញា​បណ្ណ​សាជីវកម្ម​។ ក្រុមហ៊ុន​ទាំង ២២ នេះ​បាន​ប្រមូល​មូលនិធិ​សរុប​ប្រមាណ ៣៥៩ លាន​ដុល្លារ​ពី​ទីផ្សារ​មូលធន​។ ទន្ទឹមនឹង​នេះដែរ គិត​ត្រឹម​ខែវិច្ឆិកា ឆ្នាំ ២០២៣ ទំហំ​ជួញដូរ​ប្រចាំ​ថ្ងៃជា​មធ្យម​មាន​ប្រមាណ ១៣០ ០០០ ភាគហ៊ុន ដែលមាន​តម្លៃ​ជួញដូរ​ប្រចាំ​ថ្ងៃជា​មធ្យម​ប្រហែល ២១០ ០០០​ដុល្លារ​។​

​លោកហុង សុហួរ​ថ្លែងថា​៖ «​ចំនួន​គណនី​ជួញដូរ​បានបង្ហាញ​ពី​កំណើន​យ៉ាងខ្លាំង ដែល​កើនឡើង​ពី​ប្រមាណ ៣៥០០០ គណនី​ដល់ ៤៧ ០០០ គណនី​។ មហិច្ឆតា​របស់ CSX នឹង​ឈានដល់​ចំនួន​គណនី​ជួញដូរ​រហូតដល់ ១០០ ០០០ គណនី​នៅ​ឆ្នាំ ២០២៤ ជាមួយនឹង​តម្លៃ​ជួញដូរ​ប្រចាំ​ថ្ងៃជា​មធ្យម ១០០ លាន​ដុល្លារ​ត្រឹម​ឆ្នាំ ២០៣០»​៕

​