ព័ត៌មានអន្ដរជាតិ

វិស័យផលិតកម្មវៀតណាមស្ទុះងើបឡើងវិញ ក្រោយធ្លាក់ចុះដោយទីហ្វុងយ៉ាកជី

បានផុស

១ ខែ មុន

នៅ

ថ្ងៃសុក្រ ១ វិច្ឆិកា ២០២៤

ដោយ

វិស័យផលិតកម្មរបស់ប្រទេសវៀតណាមនៅក្នុងខែតុលា បានស្ទុះងើបឡើងវិញ ក្រោយធ្លាក់ចុះដោយសារតែព្យុះទីហ្វុងយ៉ាកជី ដែលបានវាយប្រហារភាគខាងជើងប្រទេសនេះនៅដើមខែកញ្ញា។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វៀតណាមបានកត់ត្រាពីកំណើនជាថ្មីទាំងទិន្នផល និងការបញ្ជាទិញថ្មី។ ទិន្នន័យស្ដីពីសន្ទស្សន៍អ្នកគ្រប់គ្រងការបញ្ជាទិញ (PMI) របស់ក្រុមហ៊ុនស្រាវជ្រាវទីផ្សារ S&P Global បានបង្ហាញថា PMI របស់វៀតណាម បានកើនដល់ ៥១,២ ពិន្ទុ នៅខែតុលា ដោយកើនឡើងពី ៤៧,៣ ពិន្ទុ នៅខែកញ្ញា។

ក្រុមហ៊ុន S&P Global បាននិយាយថា លក្ខខណ្ឌអាជីវកម្មវៀតណាមមានភាពរឹងមាំក្នុងរយៈពេល៧ខែចុងក្រោយ លើកលែងតែខែកញ្ញា ប៉ុន្តែភាពប្រសើរឡើងនៅខែតុលា ក៏នៅមានកម្រិតផងដែរ។

ទាំងផលិតកម្ម និងការបញ្ជាទិញថ្មីក្នុងវិស័យផលិតកម្ម បានវិលមករកកំណើនវិញ ក្នុងដំណើរស្ទុះងើបចេញពីផលប៉ះពាល់ដោយព្យុះយ៉ាកជី។ ប៉ុន្តែមិនរឹងមាំដូចនៅប៉ុន្មានខែមុនពេលព្យុះវាយប្រហារនោះទេ ដោយសារតែការរំខានលើខ្សែចង្វាក់ផ្គត់ផ្គង់ក្រោយព្យុះ និងទឹកជំនន់ដែលពាក់ព័ន្ធក្រោយមកទៀត។

S&P Global បានគូសបញ្ជាក់ផងដែរថា វៀតណាមរំពឹងថានឹងមានកំណើននៃផលិតកម្មក្នុងរយៈពេលប៉ុន្មានខែខាងមុខ៕