អ្នកឧកញ៉ា ម៉ុង ឫទ្ធី បង្ហាញភស្តុតាង លោក មិនគេចវេសក្នុងការទទួលខុសត្រូវ រឿងលេចធ្លាយសារធាតុពុលពីរោងចក្រប្រេងដូង

អ្នកឧកញ៉ា ម៉ុង ឫទ្ធី នៅថ្ងៃទី ០៥ ខែវិច្ឆិកានេះ បានបង្ហាញភស្ដុតាងថា លោក មិនបានគេចវេសក្នុងការទទួលខុសត្រូវ ករណីរោងចក្រចម្រាញ់ដូងប្រេងរបស់លោកនៅខេត្តព្រះសីហនុ បញ្ចេញកាកសំណល់រាវ ចូលទឹកធ្វើឱ្យងាប់ត្រី។

អ្នកឧកញ៉ា ម៉ុង ឫទ្ធី អះអាងបន្ទាប់ពីមជ្ឈដ្ឋានមួយចំនួនបានចោទប្រកាន់ថា លោកគេចវេសមិនទទួលខុសត្រូវ ជុំវិញការលេចធ្លាយកាកសំណល់រាវ។

អ្នកឧកញ៉ា ម៉ុង ឫទ្ធី បានឱ្យដឹងថា៖ «ចាប់ពី ឆ្នាំ១៩៩៦-២០២៤ គុណដ៏ធំធេងដែលលោកបានកសាង លើវិស័យកសិកម្ម កសិឧស្សាហកម្មមកលើជាតិ និងប្រជាជនកម្ពុជា គ្រាន់តែមានករណីនេះកើតឡើងភ្លាម មានអ្នកស្នេហាជាតិច្រើនណាស់ ទាំងគ្នាឯងផង ទាំងគ្នាគេផងមកសាកសួរជីកឬស ជីកគល់ក្នុងគោលបំណងបំផ្លាញតែម្តង តែខ្ញុំមិនមានប្រតិកម្មតបតទៅវិញអ្វីទាំងអស់»។

អ្នកឧកញ៉ា ម៉ុង ឫទ្ធី បានទុកពេលឱ្យសាមីក្រសួង ដែលមានការពាក់ព័ន្ធដោះស្រាយទៅតាមនិតិវិធី និងផ្ដាំឱ្យអ្នករិះគន់លោក​ កុំតាំងខ្លួនឯងជាអ្នកស្រឡាញ់ជាតិ និងប្រជាជនកម្ពុជា។

អ្នកឧកញ៉ា ម៉ុង ឫទ្ធី បានឱ្យដឹងថា បច្ចុប្បន្ន​ ក្រុមហ៊ុន ម៉ុង ឫទ្ធី វិនិយោគទុនដំណាំដូងកម្ពុជា បានផ្តល់ការងារ​ដោយផ្ទាល់​ដល់​បុគ្គលិក​ កម្មករ​ប្រមាណ​ជាង២,000នាក់​ និងដោយ​ប្រយោល​ប្រមាណជាង៨,០០០នាក់។

អ្នកឧកញ៉ា ម៉ុង ឫទ្ធី៖ «នៅពេលនេះយេីងបានទប់​ទំនប់ដែលបានបាក់​រួចរាល់​ជាស្ថាពរ​ ធ្វើ​ឱ្យស្ថានភាព​ងាកមក​រកភាពប្រក្រតី​ឡេីងវិញ​ ព្រមទាំង​សងសំណង​ការខូចខាតដល់រដ្ឋ​ និងប្រជាជន​ ប្រកបដោយ​ការទទួល​ខុសត្រូវ​ខ្ពស់បំផុត​»។

ក្រសួងបរិស្ថានបានអនុវត្តវិធានការដោយពិន័យប្រាក់ ៤០ លានរៀល ទៅលើក្រុមហ៊ុនចម្រាញ់ដូងប្រេងរបស់អ្នកឧកញ៉ា ម៉ុង ឫទ្ធី ស្ថិតនៅភូមិអន្លង់ក្រពើ ឃុំតានៃ ស្រុកព្រៃនប់ ខេត្តព្រះសីហនុ បន្ទាប់ពីរោងចក្រនេះ បានបញ្ចេញកាកសំណល់រាវចូលទៅក្នុងស្ទឹងព្រែក កំពង់សីលា បង្កការពុលទឹក និងងាប់ត្រី៕