ព័ត៌មានជាតិ

មិនចង់ឈ្មួញកណ្តាលកាត់ចំណេញពីលើ កសិករអាចដឹកផលកសិកម្មមកលក់ដល់រោងចក្រផលិតចំណីសត្វក្រុមហ៊ុន ម៉ុង ឫទ្ធី

បានផុស

៤ ខែ មុន

នៅ

ថ្ងៃចន្ទ ២ មីនា ២០២៦

ដោយ

រោងចក្រផលិតចំណីសត្វរបស់ក្រុមហ៊ុន ម៉ុង ឫទ្ធី ដែលមានទីតាំងនៅស្រុកព្រៃនប់ ខេត្តព្រះសីហនុ អនុញ្ញាតឲ្យកសិករអាចដឹកផលកសិកម្មមានពោត ដំឡូងមីមករោងចក្រដោយផ្ទាល់ដើម្បីពង្រីកទីផ្សារលក់ឱ្យបានកាន់តែទូលំទូលាយ។

អ្នកឧកញ៉ា ម៉ុង ឫទ្ធី បានឲ្យដឹងថា ជាទូទៅកសិករខ្នាតតូចដែលមិនមានមធ្យោបាយដឹកជញ្ជូន ច្រើនលក់បន្តទៅឱ្យឈ្មួញកណ្តាល ដើម្បីប្រមូលទិញដឹកមកកាន់រោងចក្រ។ ប៉ុន្តែកសិករក៏អាចដឹកកសិផលមកលក់ដោយផ្ទាល់នៅរោងចក្របានយ៉ាងសេរី ដោយមិនចាំបាច់រត់ការស្មុគស្មាញឡើយ ប៉ុន្តែត្រូវគោរពតាមស្តង់ដារគុណភាព និងកម្រិតសំណើមដែលក្រុមហ៊ុនបានប្រកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ាបានបញ្ជាក់ថា «ក្រុមហ៊ុនមានក្រុមការងារលទ្ធកម្ម សម្រាប់សម្របសម្រួលក្នុងការប្រមូលទិញផលកសិកម្មពីកសិករដើម្បីយកមកផលិតក្នុងរោងចក្រ»។

រោងចក្រផលិតចំណីសត្វរបស់ក្រុមហ៊ុន ម៉ុង ឫទ្ធី មានសមត្ថភាពផលិតចំណីសត្វកែច្នៃពីវត្ថុធាតុដើមក្នុងស្រុកមានពោត ចុងអង្ករបានប្រមាណ ៥០ តោនក្នុងមួយម៉ោង ដែលគិតជាមធ្យមអាចផលិតចំណីសត្វបាន ៣៥០ ០០០ តោនក្នុងមួយឆ្នាំ។ ផលិតផលចំណីសត្វដែលរោងចក្រផលិតរួមមានចំណីសម្រាប់ ជ្រូក ត្រី មាន់ និងទាជាដើម។

អ្នកឧកញ៉ា ម៉ុង ឫទ្ធី បានអះអាងថា ក្នុងមួយឆ្នាំៗក្រុមហ៊ុនទម្លាក់ថវិកាប្រហែល ៤ លានដុល្លារ ដើម្បីប្រមូលទិញផលកសិកម្មក្នុងស្រុកចន្លោះពី ១២ ទៅ ១៣ ម៉ឺនតោន។ ក្នុងនោះបរិមាណពោតដែលទិញមានប្រមាណ ៨ ទៅ ៩ ម៉ឺនតោន ក្នុងមួយឆ្នាំ។ ក្រៅពីពោត ក្រុមហ៊ុនក៏ប្រើប្រាស់ចុងអង្ករជាវត្ថុធាតុដើម ដោយសារវាជាផលិតផលដែលអាចប្រើជំនួសគ្នាបាន។

ក្នុងដំណើរទស្សនកិច្ចនៅតំបន់អភិវឌ្ឍកសិឧស្សាហកម្មក្រុមហ៊ុន ម៉ុង ឫទ្ធី ឆ្លើយតបសំនួរបន្ថែមរបស់កម្ពុជាថ្មីពីយន្តការកំណត់ទីផ្សារតម្លៃកសិផល អ្នកឧកញ៉ា ម៉ុង ឫទ្ធី បានឆ្លើយតបថា តម្លៃកសិផលមិនមែនក្រុមហ៊ុនជាអ្នកកំណត់បានតាមចិត្តនោះទេ ប៉ុន្តែផ្អែកលើតម្លៃស្តង់ដារអន្តរជាតិ។ ក្រុមហ៊ុនក៏មិនចង់ទិញក្នុងតម្លៃទាបពេកដែលធ្វើឱ្យកសិករខាតបង់រហូតឈប់ដាំដុះនោះទេ ព្រោះវានឹងធ្វើឱ្យរោងចក្រគ្មានវត្ថុធាតុដើមសម្រាប់ផលិតនៅថ្ងៃក្រោយ។

អ្នកឧកញ៉ាលើកឡើងថា តម្លៃកសិផលក្នុងស្រុកក៏រងឥទ្ធិពលពីការនាំចេញផងដែរ ប្រសិនបើតម្លៃនៅក្រៅប្រទេសល្អ កសិករនឹងនាំចេញច្រើនធ្វើឱ្យតម្លៃក្នុងស្រុកឡើងថ្លៃ។

ចំណីសត្វផលិតចេញពីរោងចក្រក្រុមហ៊ុន ម៉ុង ឫទ្ធី ៧០% សម្រាប់ផ្គត់ផ្គង់ដល់ការចិញ្ចឹមសត្វរបស់ក្រុមហ៊ុន ចំណែក ៣០% ទៀតសម្រាប់លក់តាមដេប៉ូចែកចាយនៅតាមបណ្តាខេត្តនានាទូទាំងប្រទេស។

លោក លី ឡាវីល នាយកចាត់ការទូទៅផ្នែកចិញ្ចឹមសត្វរបស់ក្រុមហ៊ុន ម៉ុង ឫទ្ធី បានបញ្ជាក់ថា កាលពីមុន កសិករលក់វត្ថុធាតុដើមដូចជាពោត ដំឡូង ទៅក្រៅប្រទេសក្នុងតម្លៃថោក តែត្រូវទិញចំណីសម្រេចត្រឡប់មកវិញក្នុងតម្លៃថ្លៃ។ ការបង្កើតរោងចក្រក្នុងស្រុកជួយរក្សាធនធានទាំងនេះដើម្បីផលិតចំណីសត្វដោយខ្លួនឯង ដែលអាចកាត់បន្ថយចំណាយនិងទទួលបានចំណេញច្រើន៕