ព័ត៌មានអន្ដរជាតិ

អ្នកជំនាញ៖ ឥណ្ឌូណេស៊ីត្រូវដាក់គោលនយោបាយឱ្យស៊ីនឹងថ្នាក់ដឹកនាំអាមេរិកថ្មី

បានផុស

៤ សប្តាហ៍ មុន

នៅ

ថ្ងៃពុធ ៦ វិច្ឆិកា ២០២៤

ដោយ

អ្នកជំនាញទំនាក់ទំនងអន្តរជាតិឥណ្ឌូណេស៊ី បានលើកឡើងថា ប្រទេសឥណ្ឌូណេស៊ីត្រូវដាក់គោលនយោបាយឱ្យស៊ីនឹងគោលនយោបាយថ្នាក់ដឹកនាំថ្មីណាមួយរបស់សហរដ្ឋអាមេរិក ដើម្បីទាញយកផលប្រយោជន៍ និងកាត់បន្ថយហានិភ័យផ្សេងៗ។ នេះបើតាមការចុះផ្សាយកាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមរសៀលថ្ងៃពុធ (ម៉ោងនៅកម្ពុជា) សហរដ្ឋអាមេរិកនៅតែបន្តរាប់សន្លឹងឆ្នោតនៅឡើយ ប៉ុន្តែលទ្ធផលបឋមបានរំពឹងថា លោក ដូណាល់ ត្រាំ មកពីគណបក្សសាធារណៈរដ្ឋ នឹងឈ្នះការបោះឆ្នោតជាថ្មីក្លាយជាប្រធានាធិបតីទី ៤៧ របស់សហរដ្ឋអាមេរិក។

ខណៈការឈ្នះមិនទាន់ត្រូវបានប្រកាសជាផ្លូវការ អ្នកជំនាញច្បាប់អន្តរជាតិ លោក Hikmahanto Juwana បាននិយាយសង្កត់ធ្ងន់ មុនពេលអាចព្យាករលទ្ធផលបឋម ថា ឥណ្ឌូណេស៊ីត្រូវតែកែសម្រួលផលប្រយោជន៍ជាតិរបស់ខ្លួនឱ្យស៊ីនឹងគោលនយោបាយរបស់ លោក ត្រាំ ឬលោកស្រី ខាម៉ាឡា ហារីស ដើម្បីរក្សាទំនាក់ទំនងការទូតដ៏រឹងមាំ។ លោក Hikmahanto បានប្រាប់សារព័ត៌មាន Beritasatu.com ថា៖ «យើងមិនអាចជ្រើសរើសអ្នកណាឈ្នះ ឬចាញ់នោះទេ។ មិនថាលទ្ធផលយ៉ាងណានោះទេ យើងត្រូវតែសម្របតាមគោលនយោបាយរបស់រដ្ឋបាលថ្មី»។

លោក Hikmahanto បានចង្អុលបង្ហាញថា ជំហរ «អាមេរិកមុនគេ» ឬ «America First» និងការគាំទ្រសម្រាប់ការលក់សម្ភារៈយោធារបស់លោក ត្រាំ អាចផ្តល់អត្ថប្រយោជន៍ដល់តម្រូវការការពារជាតិរបស់ឥណ្ឌូណេស៊ី។ លោកបានពន្យល់ថា៖ បើ ត្រាំ ឈ្នះ ឥណ្ឌូណេស៊ីអាចកាន់តែងាយស្រួលក្នុងការទិញឧបករណ៍ការពារជាតិពីសហរដ្ឋអាមេរិក»។

ទោះបីជាយ៉ាងណាក៏ដោយ លោកបានសម្តែងការព្រួយបារម្ភថា គោលនយោបាយការបរទេសរបស់លោក ត្រាំ អាចនាំឱ្យមានអស្ថិរភាពពិភពលោកកាន់តែខ្លាំង ជាពិសេសនៅក្នុងតំបន់ដូចជា ហ្គាហ្សា និងអ៊ុយក្រែន ដែលអាចរារាំងដល់គោលដៅកំណើនសេដ្ឋកិច្ចរបស់ប្រទេសឥណ្ឌូណេស៊ី។

លោកបានបន្ថែមថា៖ «ភាពចលាចលភូមិសាស្ត្រនយោបាយ អាចធ្វើឱ្យគោលដៅរបស់ប្រទេសឥណ្ឌូណេស៊ីក្នុងការសម្រេចបាននូវកំណើនសេដ្ឋកិច្ច ៨ ភាគរយកាន់តែពិបាក»។ លោកថ្លែងបែបនេះ ដោយសំដៅទៅលើចក្ខុវិស័យរបស់ប្រធានាធិបតី លោក ប្រាបូវូ ស៊ូប៊ីយ៉ានតូ (Prabowo Subianto) សម្រាប់អនាគតសេដ្ឋកិច្ចរបស់ប្រទេសនៅពេលលោកកាន់អំណាច។

លើសពីនេះ អ្នកជំនាញទំនាក់ទំនងអន្តរជាតិម្នាក់ទៀត គឺលោកស្រី Suzie Sudarman បានព្រមានថា ប្រសិនបើ ត្រាំ ជាប់ឆ្នោត ឥណ្ឌូណេស៊ីត្រូវតែមានការប្រុងប្រយ័ត្នចំពោះសកម្មភាពរបស់ខ្លួនក្នុងប្លុក BRICS ដែលឥណ្ឌូណេស៊ីទើបចូលជាសមាជិកនាពេលថ្មីៗ»។ លោកស្រីបានបន្តគូសបញ្ជាក់ថា ការប្រឆាំងរបស់លោក ត្រាំ ចំពោះ BRICS ជាពិសេសលើកិច្ចខិតខំប្រឹងប្រែងកាត់បន្ថយការពឹងផ្អែកលើប្រាក់ដុល្លារអាមេរិករបស់ប្លុកនេះ អាចធ្វើឱ្យស្មុគស្មាញដល់ជំហររបស់ឥណ្ឌូណេស៊ី។

លោកស្រីបានលើកឡើងថា៖ «លោកប្រធានាធិបតី ប្រាបូវូ ត្រូវតែចេះបត់បែន និងមានយុទ្ធសាស្រ្ត ក្នុងការធ្វើឱ្យមានតុល្យភាពរវាងទំនាក់ទំនងជាមួយ BRICS និងសហរដ្ឋអាមេរិក» ដោយសមាជិកភាព BRICS មិនមែនជាឧបករណ៍ធ្វើឱ្យទំនាក់ទំនងជាមួយអាមេរិកធ្លាក់ចុះនោះទេ ប៉ុន្តែធានាផលប្រយោជន៍ផ្សេងៗ ដូចជាការនាំចូលប្រេងថោកៗពីរុស្ស៊ីជាដើម៕