ក្រុមហ៊ុនចំនួន ៣៤ ចូលរួមប្រឡងចៀរជ័រកៅស៊ូនៅខេត្តត្បូងឃ្មុំ

បេក្ខជនចំនួន ៧១រូប មកពីក្រុមហ៊ុនវិនិយោគលើដំណាំកៅស៊ូចំនួន ៣៤ក្រុមហ៊ុន សហគមន៍កៅ​ស៊ូគ្រួ​សារចំនួន៥ និងចំការកៅស៊ូគ្រួសារចំនួន១ បានចូលរួមប្រឡងចៀរជ័រកៅស៊ូឆ្នាំ ២០២៤។

កម្មវិធីប្រលងចៀរជ័រកៅស៊ូ ប្រចាំឆ្នាំ២០២៤ រៀបចំឡើងដោយក្រសួងកសិកម្ម រុក្ខាប្រមាញ់ និង​នេសាទ ចាប់ផ្ដើមដំណើរការ​នៅចំការកៅស៊ូជុប ក្នុងភូមិសាស្ត្រខេត្តត្បូងឃ្មុំ នៅព្រឹកថ្ងៃទី ១៦ ខែធ្នូ​ ឆ្នាំ ២០២៤។

នេះជាការប្រឡងចៀរជ័រកៅស៊ូដំបូងបង្អស់ដែលអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ រៀបចំធ្វើ ដើម្បីចម្រាញ់ជ្រើសយកអ្នកចៀរជ័រកៅស៊ូ ដែលមាន​សមត្ថ​ភាព និងជំនាញ។

លោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍​នៅក្នុង​ពិធីបើកការប្រឡង​ចៀរជ័រកៅស៊ូ ឆ្នាំ ២០២៤ថា ការប្រលងនាពេលនេះ គឺជា​ឱកាស​ដ៏ល្អមួយ​សម្រាប់យើងទាំងអស់គ្នា ​បានឃើញ​ពីសមត្ថភាព និងជំនាញរបស់បងប្អូនកម្មករ​ដែល​បាន​មកចូលរួមប្រលង ព្រមទាំងបង្ហាញអំពីការយកចិត្ដទុកដាក់របស់ក្រសួងកសិកម្ម រុក្ខាប្រមាញ់ និងនេសាទ ចំពោះអនុវិស័យកៅស៊ូ ដើម្បីទាក់ទាញចំណាប់អារម្មណ៍ពីប្រជាពលរដ្ឋចំពោះ​រកការងារ​ធ្វើក្នុងអនុវិស័យការងារកៅស៊ូ រក្សាបាននិរន្ដរភាពកម្លាំងពលកម្ម​តាមចម្ការកៅស៊ូ រក្សា​សុខ​ភាពដើមកៅស៊ូ រយៈ​​ពេលចៀរយកផលបានយូរ ត្រឹមត្រូវ ទទួលបានទិន្នផលខ្ពស់ និងផ្ដល់ក្ដី​សង្ឃឹមដល់កម្មករចៀរជ័រឱ្យខិតខំប្រឹងប្រែងបំពេញការងារកាន់តែល្អ និងមានប្រសិទ្ធភាព​សេដ្ឋកិច្ច​កាន់តែប្រសើរឡើង។

ពិធីនេះ ក៏បានបង្ហាញនូវស្មារតីសាមគ្គីភាព ភាតរភាព និងជា​ឱកាស​នៃការជួបជុំ​បងប្អូនកម្មករមកពីបណ្ដាក្រុមហ៊ុន សហគមន៍កៅស៊ូផ្សេងៗ ឱ្យបានស្គាល់គ្នា ចែករំលែកផ្លាស់ប្ដូរបទពិសោធន៍ ផ្សាភ្ជាប់ទំនាក់ទំនងគ្នាទៅវិញទៅមក នៅក្នុងបរិបទដែល​សង្គមជាតិ​មានសុខសន្តិភាព​ពេញលេញទូទាំងប្រទេស​។

ដំណាំ​​កៅ​ស៊ូ​​​គឺអនុវិស័យ​​ដ៏​សំខា​ន់​​មួយនៅក្នុង​វិស័យកសិកម្ម ដែលក្រសួងបានយកចិត្ត​ទុកដាក់​ជំរុញ​អភិវឌ្ឍឱ្យសម្រេចបានជោគជ័យ ស្របតាមផែនការ​យុទ្ធសាស្រ្តអភិវឌ្ឍកៅស៊ូធម្មជាតិ ឆ្ពោះទៅឆ្នាំ២០៣០។

ដោយពិនិត្យឃើញអំពីសក្តានុពល និងតួនាទីដ៏សំខាន់នៃដំណាំកៅស៊ូ ក្នុងការរួមចំណែកជួយទ្រទ្រង់សេដ្ឋកិច្ច សង្គម និងបរិស្ថាន ក្រសួងកសិកម្មបានណែនាំអគ្គនាយកដ្ឋានកៅស៊ូឱ្យរៀបចំការប្រលងចៀជ័រកៅស៊ូប្រចាំឆ្នាំ២០២៤នេះឡើង។

បច្ចេកទេសចៀរជ័រកៅស៊ូគឺជាជំនាញមួយដ៏សំខាន់នៅក្នុងសកម្មភាពទាញយកផលពីដើមកៅស៊ូ បន្ទាប់ពីចំណាយទុនវិនិយោគលើការដាំដុះនិងថែទាំក្នុងរយៈពេលដ៏វែងមួយ (៦ឆ្នាំ)។

កម្មករចៀរជ័រត្រូវមានជំនាញ និងឆ្លងកាត់វគ្គបណ្តុះបណ្តាលត្រឹមត្រូវ។ ដូច្នេះហើយបានជាបណ្តាក្រុមហ៊ុនចម្ការកៅស៊ូកសិ-ឧស្សាហកម្មនិងចម្ការកៅស៊ូគ្រួសារមួយចំនួនតម្រូវឱ្យមានក្រុមបច្ចេកទេសចុះត្រួតពិនិត្យការងារចៀរជ័រជាប្រចាំ ក្នុងន័យថែរក្សាដើមកៅស៊ូ និងផ្តល់ជាប្រាក់រង្វាន់លើកទឹកចិត្តដល់កម្មករឆ្នើមដែលអនុវត្តការចៀរជ័របានត្រឹមត្រូមត្រូវ។

យោងតាមអគ្គនាយកដ្ឋានកៅស៊ូ កម្ពុជារកចំណូលបានជាង ៥៧៣ លានដុល្លារ ពីការនាំចេញជ័រកៅស៊ូនៅក្នុងរយៈពេល ១១ ខែ ឆ្នាំ ២០២៤ ស្របពេលដែលតម្រូវការ និងតម្លៃទីផ្សារក៏មានភាពល្អប្រសើរនៅឆ្នាំនេះ។

ការនាំចេញកៅស៊ូសម្រេចបានចំនួនជាង ៣៤ ម៉ឺន​តោន កើនឡើងជិត ៨ ពាន់តោន ស្មើនឹង ៣,១២ ភាគរយ នៅក្នុងរយៈពេល ១១ ខែ ឆ្នាំ ២០២៤ ធៀបនឹងរយៈពេលដូចគ្នា នៅឆ្នាំ ២០២៣។

លោក ឃុន កក្កដា អគ្គនាយករង នៃអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និង​នេសាទបានឱ្យដឹងថា តម្លៃជ័រកៅស៊ូ​ជា​មធ្យម​ ១ ៦៦២ ដុល្លារ ក្នុងមួយតោន ឡើងថ្លៃ ៣១៩ ដុល្លារ​ក្នុងមួយតោន ស្មើនឹង ២៣,៧ ភាគរយ ធៀបនឹងរយៈពេលដូចគ្នាក្នុងឆ្នាំ ២០២៣៕