នាយករដ្ឋមន្ត្រីឱ្យសិក្សាសាងសង់ផ្លូវក្រោមទឹកតភ្ជាប់ពីកោះនរាទៅអរិយក្សត្រ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឱ្យវិស័យឯកជនសិក្សា សាងសង់ស្ពាន និងផ្លូវក្រោមទឹកតភ្ជាប់ពីកោះនរា ទៅអរិយក្សត្រ បន្ថែមទៀត ដើម្បីបើកច្រកសម្រាប់ការធ្វើដំណើររបស់ប្រជាពលរដ្ឋ។

សម្ដេចធិបតី ហ៊ុន ម៉ាណែត មានប្រសាសន៍នៅក្នុងពិធីបើកការដ្ឋាន​សាងសង់គម្រោង​ទីក្រុង​មេគង្គឃី ក្នុងភូមិ​សាស្ត្រ​ ​ក្រុង​អរិយក្សត្រ ខេត្តកណ្តាល នៅព្រឹកថ្ងៃទី ១៧ ខែធ្នូ ឆ្នាំ ២០២៤។

សម្ដេចធិបតី ហ៊ុន ម៉ាណែតមានប្រសាសន៍ថា៖ «ខ្ញុំបានឱ្យវិស័យឯកជនសិក្សាមើល តភ្ជាប់​តំ​បន់​អភិវឌ្ឍអរិយក្សត្ររវាងកោះនរា សិក្សា ២ ជម្រើស ទាំងផ្លូវខាងលើ និងក្រោមទឹក ដើម្បីធ្វើ​យ៉ាង​​ណាតភ្ជាប់ ព្រោះដើម្បីភ្ជាប់បើកច្រកប្រជាពលរដ្ឋ ដែលរស់នៅទីនេះ  ថ្ងៃក្រោយ គឺថា អាច​ឆ្លង​ទៅផ្លូវជាតិលេខ ១ ដោយមិនចាំបាច់ទៅណាឆ្ងាយ ឬមួយក៏ឡើងទៅដល់កោះនរា មាន​ស្ពានទៅកោះពេជ្រ ឡើងទៅដល់នោះស្រាប់ អញ្ចឹងការតភ្ជាប់នេះ គឺជាការល្អ ហើយបើ​បាន​អា​ក្រោមទឹក កាន់តែល្អតែម្ដង ហើយសង្ឃឹមថា យើងមាននៅខាងក្រោមទឹក»។

សម្ដេចធិបតីបន្ថែមថា សោភ័ណភាពទន្លេចតុមុខ គឺនៅខាងក្រោម ប៉ុន្តែត្រូវគិតអំពីចរាចរណ៍ ខណៈ​នឹងមានផ្លូវបន្ថែមទៀតនៅពេលខាងមុខ ហើយសម្ដេចសង្ឃឹមថា សក្ដានុពល​នៃការ​តភ្ជាប់​នេះ នឹងនាំការរីកចម្រើននៅខាងកើតទន្លេ មិន​មែនតែនៅក្រុង​អរិយក្សត្រ គឺតំបន់ខាង​កើត​តែ​ម្ដង ដែលអាចហៅបានថាទីក្រុង​ខាងកើតទន្លេ៕

អត្ថបទ៖ ឡេង ដេត