ព័ត៌មានអន្ដរជាតិ

ត្រាំ គ្រោងដាក់លក់ទិដ្ឋាការ «ប័ណ្ណមាស» ៥ លានដុល្លារ ឱ្យអ្នកមានបរទេស

បានផុស

២ ខែ មុន

នៅ

ថ្ងៃពុធ ២៦ កុម្ភៈ ២០២៥

ដោយ

លោកប្រធានាធិបតី ដូណាល់ ត្រាំ បានឱ្យដឹងកាលពីថ្ងៃអង្គារថា សហរដ្ឋអាមេរិកនឹងដាក់លក់ទិដ្ឋាការ «Gold Card» (ប័ណ្ណមាស) ក្នុងតម្លៃ ៥ លានដុល្លារ ដល់អ្នកមានបរទេស ដោយផ្តល់ឱ្យពួកគេនូវសិទ្ធិក្នុងការរស់នៅ និងធ្វើការនៅសហរដ្ឋអាមេរិកជាអចិន្ត្រៃយ៍ និងអាចឈានទៅដល់ការទទួលបានសញ្ជាតិអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយយ៉ាងដូច្នេះថា៖ «យើងនឹងលក់ប័ណ្ណមាស ។ បើអ្នកមានកាតបៃតង នោះហើយគឺប័ណ្ណមាស។ យើងនឹងដាក់លក់ក្នុងតម្លៃប្រហែល ៥ លានដុល្លារ ហើយវានឹងផ្ដល់ឱ្យអ្នកនូវឯកសិទ្ធិកាតបៃតង ដោយបន្ថែមជាមួយគ្នានោះ វាគឺជាវិធីឆ្ពោះទៅរកការទទួលបានសញ្ជាតិ»។ លោកបន្តថា៖ «អ្នកមានៗនឹងចូលមកប្រទេសយើងដោយទិញប័ណ្ណនេះ» ហើយអាមេរិកក៏អាចលក់ឱ្យមហាសេដ្ឋីរុស្ស៊ីផងដែរ។

ប័ណ្ណមាសដែលលោក ត្រាំ លើកឡើង គឺសំដៅទៅលើប្រភេទមួយនៃ «កាតបៃតង» ដែលត្រូវបានគេស្គាល់ជាផ្លូវការថាជា «ប័ណ្ណស្នាក់នៅអចិន្ត្រៃយ៍ (PRC)» ពោលគឺឯកសារផ្តល់ឱ្យបុគ្គលណាម្នាក់មានសិទ្ធិក្នុងការរស់នៅ និងធ្វើការនៅសហរដ្ឋអាមេរិកជាអចិន្ត្រៃយ៍។

ប្រធានាធិបតីដដែលបានឱ្យដឹងថា សហរដ្ឋអាមេរិកនឹងដាក់លក់ប័ណ្ណមាសក្នុងរយៈពេល ២ សប្ដាហ៍ខាងមុខ ហើយរំពឹងថានឹងលក់បានរហូតដល់ ១០ លាន ប័ណ្ណ។ លោកបន្តថា៖ «ពួកគេនឹងចំណាយប្រាក់ច្រើន ហើយបង់ពន្ធច្រើន ហើយផ្ដល់ការងារដល់មនុស្សច្រើន ហើយយើងគិតថាវានឹងទទួលបានជោគជ័យខ្លាំងណាស់» ខណៈនឹងកាត់បន្ថយឱនភាពថវិកាជាតិ។

ប្រធានាធិបតី ដែលមានគម្រោងនិរទេសជនអន្តោប្រវេសន៍គ្មានឯកសាររាប់លាននាក់រូបនេះ បានបន្ថែមយ៉ាងដូច្នេះថា៖ «មនុស្សជាច្រើនចង់នៅក្នុងប្រទេសនេះ ហើយពួកគេនឹងអាចធ្វើការ និងផ្តល់ការងារ និងបង្កើតក្រុមហ៊ុន។ វាសម្រាប់អ្នកមានលុយ»។

លេខាធិការក្រសួងពាណិជ្ជកម្ម លោក Howard Lutnick បាននិយាយថា «ប័ណ្ណមាស ត្រាំ» នឹងត្រូវជំនួសឱ្យទិដ្ឋាការ EB-5 ឬទិដ្ឋាការវិនិយោគិនបរទេស ក្នុងរយៈពេល ២ សប្តាហ៍ខាងមុខ។ EB-5s ត្រូវបានដាក់ចេញដោយសភាក្នុងឆ្នាំ ១៩៩០ ដើម្បីបង្កើតការវិនិយោគពីបរទេស។ អ្នកដែលអាចទទួលបានវា ត្រូវចំណាយប្រាក់ប្រមាណ ១ លានដុល្លារ បង្កើតក្រុមហ៊ុនដែលមានបុគ្គលិកយ៉ាងហោចណាស់ ១០ នាក់។

គួររំឭកថា សេវាស្រាវជ្រាវសភាបានរាយការណ៍កាលពីឆ្នាំ ២០២១ ថា ទិដ្ឋាការ EB-5 បង្កហានិភ័យនៃការក្លែងបន្លំផ្សេងៗ រួមទាំងការព្រួយបារម្ភជុំវិញពីប្រភពនៃមូលនិធិ ថាតើវាស្របច្បាប់ ឬយ៉ាងណា។

យ៉ាងណាមិញ ទិដ្ឋាការវិនិយោគិន គឺជារឿងធម្មតានៅជុំវិញពិភពលោក។ ក្រុមហ៊ុនប្រឹក្សា Henley & Partners បាននិយាយថា ប្រទេសជាង ១០០ ជុំវិញពិភពលោកផ្តល់ «ទិដ្ឋាការមាស» ដល់បុគ្គលដែលមានទ្រព្យសម្បត្តិ រួមទាំងសហរដ្ឋអាមេរិក ចក្រភពអង់គ្លេស អេស្ប៉ាញ ក្រិក ម៉ាល់តា អូស្ត្រាលី កាណាដា និងអ៊ីតាលី ជាដើម៕