មុនកិច្ចប្រជុំកំពូល អាមេរិក ដាស់តឿន​ឲ្យ ណាតូ ​ក្រើន​រំឭកសមាជិក​​ពន្លឿន​​​បង្កើនការចំណាយ​​​ តាមត្រាំចង់​បាន​

ឯកអគ្គរដ្ឋទូតសហរដ្ឋអាមេរិកប្រចាំអង្គការណាតូ បានព្រមាន​ជា​ថ្មី​ទៀត​ កាលពីថ្ងៃទី ១ ខែកក្កដា ថា ប្រទេសអឺរ៉ុប​មួយចំនួនមិនទាន់​ធ្វើការងារគ្រប់គ្រាន់ ដើម្បីបំពេញតាមការសន្យាចំណាយលើវិស័យការពារជាតិនៅឡើយទេ ដែលការព្រមាននេះធ្វើឡើងនៅមុនកិច្ចប្រជុំកំពូលមួយក្នុងទីក្រុងអង់ការ៉ា ជាមួយប្រធានាធិបតី លោក ដូណាល់ ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រេសិត​អាមេរិក ប្រចាំ​អង្គការ​ណាតូ​ លោក Matthew Whitaker បានប្រាប់អ្នកយកព័ត៌មានថា «សម្ព័ន្ធមិត្តខ្លះ​កំពុងធ្វើការងារបានច្រើនជាងសម្ព័ន្ធមិត្តដទៃទៀត ហើយយើងមានប្រទេសដូចជា ប៉ូឡូញ បណ្តាប្រទេស​​អឺរ៉ុបខាងជើង (ណូឌីក) បណ្តាប្រទេសបាល់ទិក និងអាល្លឺម៉ង់ ដែលកំពុងនាំមុខគេ។ ប៉ុន្តែមានប្រទេសមួយចំនួន​ដែលកំពុងដើរយឺតយ៉ាវ គឺពួកគេមិនទាន់បានចំណាយថវិកាគ្រប់គ្រាន់នៅពេលបច្ចុប្បន្ន ឬក៏មិនទាន់មានផែនការច្បាស់លាស់ដើម្បីឈានទៅសម្រេចបាននូវការប្តេជ្ញាចិត្តការពារជាតិក្នុងទីក្រុងឡាអេនោះទេ»។នេះ​​បើតាម​ការចេញ​​ផ្សាយ​លើ​បណ្តាញ Yahoo​ ។​

លោក Whitaker បាននិយាយទៀតថា លោក ត្រាំ រំពឹងយ៉ាងពេញទំហឹងថា សម្ព័ន្ធមិត្តទាំងអស់នឹងឈានជើងឡើងភ្លាមៗ ហើយដើរលើផ្លូវឆ្ពោះទៅរកការចំណាយ ៥ ភាគរយ ព្រមទាំងធ្វើវាដោយការយកចិត្តទុកដាក់បំផុត។

លោក Whitaker ក៏បានចង្អុលបង្ហាញប្រទេសអេស្ប៉ាញថា បានធ្វើឲ្យលោកត្រាំ «ខកចិត្ត» ជុំវិញបញ្ហាប្រទេសអុីរ៉ង់ និងចំពោះភាពមិនចង់បង្ហាញផែនការច្បាស់លាស់ដើម្បីឈានទៅសម្រេចការចំណាយ ៥ ភាគរយ។ យ៉ាងណា លោកក៏មិនបានរំពឹងឲ្យមានការប៉ះទង្គិចគ្នានៅក្នុងកិច្ចប្រជុំកំពូលរវាងត្រាំ និងនាយករដ្ឋមន្ត្រីអេស្ប៉ាញ លោក Pedro Sanchez នោះដែរ​។

ខណៈដែលការចំណាយលើវិស័យការពារជាតិកំពុងកើនឡើងនៅទូទាំងសម្ព័ន្ធភាព លោក Whitaker បាននិយាយថា ពេលនេះអឺរ៉ុបត្រូវតែបង្ហាញថា ខ្លួនកំពុងបំប្លែងសាច់ប្រាក់ដែលកើនឡើងទាំងនោះ ឲ្យទៅជាសមត្ថភាពការពារជាតិពិតប្រាកដ។

លោក Whitaker បាននិយាយ បន្ថែមថា អាមេរិកស្វាគមន៍ចំពោះកិច្ចខិតខំប្រឹងប្រែងរបស់សហភាពអឺរ៉ុបក្នុងការបង្កើនផលិតកម្ម​​អាវុធ​​ ប៉ុន្តែបានព្រមានប្រឆាំងនឹងការបង្កើតរបាំងរារាំងសម្រាប់ក្រុមហ៊ុន​ផលិត​អាវុធ​​អាមេរិក។ យើងពិត​ជា​មិន​គាំទ្រ​ភាសាបែបគាំពារនិយម ដែលជារឿយៗគំនិតផ្តួចផ្តើម​ក្នុង​វិស័យ​ការពារជាតិរបស់អឺរ៉ុបជាច្រើនបានដាក់បញ្ចូល​ ដែល​វា​នឹង​កាត់ផ្តាច់សម្ព័ន្ធមិត្តចេញនោះទេ។ នោះគឺជាចំណុចមួយដែលអាចនឹងត្រូវលើកយកមកពិភាក្សាក្នុងកិច្ចប្រជុំកំពូល ហើយយើងរំពឹងថា យើងអាចឈានទៅដល់កិច្ចព្រមព្រៀងណាមួយលើបញ្ហាប្រឈមនោះ។

គួរបញ្ចាក់ថា កាលពីឆ្នាំ២០១៤ ណាតូបានព្រមព្រៀងគ្នាឲ្យសមាជិកទាំងអស់ចំណាយយ៉ាងហោចណាស់ ២% នៃ GDP លើវិស័យការពារជាតិ។ ប៉ុន្តែ ប្រទេសជាច្រើន ជាពិសេស អាល្លឺម៉ង់ អេស្ប៉ាញ និងអ៊ីតាលី តែងតែចំណាយមិនគ្រប់។ ក្រោមសម្ពាធយ៉ាងខ្លាំងពីប្រធានាធិបតី ត្រាំ នៅក្នុងកិច្ចប្រជុំមួយកាលពីឆ្នាំមុន នៅឯទីក្រុងក្រុងឡាអេ មេដឹកនាំណាតូបានសម្រេចដំឡើងគោលដៅនេះរហូតដល់ ៥% នៃ GDP ត្រឹមឆ្នាំ២០៣៥ ដែលនេះគឺជាតួលេខខ្ពស់បំផុតមិនធ្លាប់មាន៕

អត្ថបទ ៖ សាង ស្រីល័ក្ខ