តំបន់សេដ្ឋកិច្ចពិសេសចំនួន ៥ កំពុងដំណើរការនៅខេត្តព្រះសីហនុ

ខេត្តព្រះសីហនុមានគម្រោងសាងសង់តំបន់សេដ្ឋកិច្ចពិសេសចំនួន ១២ គម្រោង ក្នុងនោះមាន ៥ គម្រោង កំពុងដំណើរការ ២ គម្រោងកំពុងស្ថិរនៅក្នុងដំណើរការសាងសង់ និង ៥ គម្រោងទៀត នៅមិនទាន់មានសកម្មភាពនៅឡើយ។ នេះបើយោងតាមរបាយការណ៍របស់​រដ្ឋបាលខេត្ត​ព្រះ​សីហនុ។

លោក ម៉ាង ស៊ីណាត អភិបាលខេត្តព្រះសីហនុបានឱ្យដឹងនៅថ្ងៃទី ២៦ ខែមីនា ឆ្នាំ ២០២៥ នេះថា​ នៅខេត្តព្រះសីហនុមានរោងចក្រសហគ្រាស សរុបចំនួន ៣ ៨០០ ទីតាំង។ ​ក្នុងនោះមានគម្រោង​វិនិយោគចំនួន ២៩០ ដែលមានទុនវិនិយោគប្រមាណ ២ ៨៥០ លានដុល្លារ។ បច្ចុប្បន្នមានរោងចក្រកំពុងដំណើរការ ១៨១ ទីតាំង និងបុគ្គលិកកម្មករ និយោជិក​ប្រមាណជាង ៥ ម៉ឺននាក់ ដែលទទួលបានប្រាក់ខែប្រមាណ ១៦,៥ លានដុល្លារ ក្នុងមួយខែ។

យោងតាមក្រសួងឧស្សាហកម្ម គិតត្រឹមដំណាច់ឆ្នាំ ២០២៤ កម្ពុជាមានតំបន់សេដ្ឋកិច្ចពិសេសដែលមានរោងចក្រដំណើរការមាន​​​ចំនួន ៣០ ស្ថិតនៅក្នុង ១២ រាជធានី-ខេត្ត កើនឡើង ៤ តំបន់ ស្មើនឹង ១៥,៣៨ ភាគរយ បើធៀបនឹងឆ្នាំ ២០២៣។

តំបន់សេដ្ឋកិច្ចទាំងនោះរួមមាន ខេត្តស្វាយរៀង កំពុងដំណើរការចំនួន ៩ ខេត្តព្រះសីហនុកំពុងដំណើរការចំនួន ៥ ខេត្តកណ្ដាល កំពុងដំណើរការចំនួន ៣ ខេត្តកោះកុងកំពុងដំណើរការចំនួន ៣ ខេត្តបន្ទាយមានជ័យ កំពុងដំណើរការចំនួន ៣ កំពង់ចាម ១ កំពង់ឆ្នាំង ១ កំពត ១ ក្រចេះ ១ ពោធិ៍សាត់ ១ រាជធានីភ្នំពេញ ១។

ទុនវិនិយោគសរុបនៅក្នុង​វិស័យ​ឧស្សា​ហ​កម្ម មានចំនួនជាង ២០,៤៥ ពាន់​លាន​ដុល្លារ នៅក្នុងឆ្នាំ ២០២៤ កើនឡើង ១០,១៨ ភាគរយ ធៀបនឹងឆ្នាំ ២០២៣។

លោក វង្សី វិស្សុត​ ឧបនាយករដ្ឋមន្ដ្រីប្រចាំការ រដ្ឋមន្ដ្រីទទួលបន្ទុកទីស្ដីការ​គណៈ​រដ្ឋ​មន្ដ្រីមានប្រសាសន៍កាលពីពេលថ្មីៗនេះថា ​ការនាំចេញរបស់កម្ពុជានៅឆ្នាំ២០២៤ សម្រេច​បានកំណើន ១៥,៧% ហើយផលិត​ផល​​កម្ពុជា​កាន់​តែច្រើនកំពុងបោះជំហាន​ចូល​ទៅ​កាន់​ទីផ្សារតំបន់ និងអន្តរ​ជាតិ ដែលកម្ពុជាត្រូវពង្រឹង និងពន្លឿន​​​​ឧស្សា​ហូបនីយកម្ម រចនាសម្ព័ន្ធ និងមូលដ្ឋានសេដ្ឋកិច្ច នៅក្នុងដំណើរត្រៀមខ្លួនចាកចេញពីឋានៈ​ជាប្រ​ទេស​អភិវឌ្ឍន៍​តិចតួចនៅថ្ងៃទី១៩ ខែធ្នូ ឆ្នាំ២០២៩៕

អត្ថបទ៖ ឡេង ដេត