អ្នកជំនាញថៃបារម្ភពីការបិទ SME និង​ការពិបាក​រក​ការងារធ្វើរបស់និស្សិតទើប​រៀនចប់

ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ (NESDC) បានសម្តែងការព្រួយបារម្ភយ៉ាងខ្លាំងចំពោះស្ថានភាពទីផ្សារការងាររបស់ប្រទេស ជាពិសេសផលប៉ះពាល់នៃការបិទសហគ្រាសធុនតូច និងមធ្យម (SME) លើការងារ និងភាពកាន់តែលំបាកសម្រាប់​និស្សិតទើប​បញ្ចប់ការសិក្សា ក្នុងការរកការងារធ្វើ។ នេះបើតាមការចុះផ្សាយកាសែតក្នុងស្រុកថៃកាលពីថ្ងៃចន្ទ ៩ មិថុនា។

ក្រុមប្រឹក្សាបានកត់សម្គាល់ថា SME ជាង ២៤ ០០០ និង​រោងចក្រចំនួន ១ ២៣៤ កន្លែង ​បាន​បិទដំណើរការនាពេលថ្មីៗនេះ ដែលជះឥទ្ធិពលយ៉ាងខ្លាំងដល់ការបង្កើតការងារ។ កង្វល់សំខាន់សម្រាប់ NESDC គឺតម្រូវការបន្ទាន់សម្រាប់ការសម្របខ្លួនអាជីវកម្ម ជាពិសេសក្នុងចំណោម SME ដែលផ្ដល់ការងារធ្វើខ្ពស់។

នៅក្នុងរបាយការណ៍ «ទស្សនវិស័យសង្គមប្រចាំត្រីមាសទី ១ ឆ្នាំ ២០២៥» ​ដែលចេញផ្សាយកាលពីថ្ងៃចន្ទ NESDC បានកត់សម្គាល់​ពីការ​ថយចុះ​នៃអត្រាគ្មានការងារធ្វើ ដល់ ០,៨៨ ភាគរយ ពី ១,០១ ភាគរយ ក្នុងរយៈពេលដូចគ្នាកាលពីឆ្នាំមុន។ ​ប៉ុន្តែតួលេខនេះមិនបង្ហាញពី «ការថប់អារម្មណ៍ពាក់ព័ន្ធនឹងសុត្ថិភាពការងារ និងការងារនាពេលអនាគត» នោះទេ​។

លោក Danucha Pichayanan អគ្គលេខាធិការ NESDC បានធ្វើបទបង្ហាញអំពីការរកឃើញស្ថានភាពសង្គមសម្រាប់ត្រីមាសទី ១ នៃឆ្នាំ ២០២៥ ដោយបង្ហាញថា ចំនួនប្រជាជនដែលមានការងារធ្វើសរុបមានចំនួន ៣៩,៤ លាន​នាក់ ធ្លាក់ចុះ ០,៥ ភាគរយ គិតត្រឹមរយៈពេលដូចគ្នាកាលពីឆ្នាំំមុន។ ​

ខណៈពេល​ការងារ​ក្នុងវិស័យ​កសិកម្មនៅតែមានស្ថិរភាព ចំនួនការងារ​ក្នុងវិស័យមិនមែនកសិកម្ម រួមទាំងការផលិត បដិសណ្ឋារកិច្ច និងការលក់រាយ បានធ្លាក់ចុះ។ ទោះបីជាមានការងើបឡើងវិញជាបន្តបន្ទាប់​ក្នុងវិស័យទេសចរណ៍ក៏ដោយ ក៏ការងារពាក់ព័ន្ធសម្រាប់វិស័យនេះ ជាពិសេស​ក្នុងសណ្ឋាគារ និងភោជនីយដ្ឋានបានបន្តធ្លាក់ចុះ ​ដោយ​ប៉ះពាល់ខ្លាំងជាងគេដល់បុគ្គលិកបណ្តោះអាសន្ន។ និន្នាការ​នេះរួមចំណែកភាគច្រើនដោយកម្សោយនៃសេដ្ឋកិច្ចថៃ។ ​

ក្រុមប្រឹក្សា NESDC បាន​ស្នើឱ្យ​រដ្ឋាភិបាល​ជំរុញ​ការ​អនុម័ត​បច្ចេកវិទ្យា ការ​បង្កើត​ថ្មី និង​ការ​បង្កើន​ជំនាញ​កម្លាំង​ការងារ ដើម្បី​ត្រៀម​ខ្លួន​សម្រាប់​ការ​ផ្លាស់​ប្តូរ​ទីផ្សារ​ការងារ​នា​ពេល​អនាគត។ គំនិតផ្តួចផ្តើមសម្រាប់ការរៀនសូត្រពេញមួយជីវិត និងការអភិវឌ្ឍន៍ជំនាញ នឹងត្រូវបានតាមដានយ៉ាងដិតដល់ ដើម្បីធានាថានិស្សិតដែលទើបបញ្ចប់ការសិក្សា​មានជំនាញពិតប្រាកដ​៕

​