បុរសម្នាក់ចាប់យករបរចិញ្ចឹមដង្កូវដួង កំពុងមានទីផ្សារល្អ ខណៈលក់បាន១គីឡូ២០ដុល្លារ

បុរសម្នាក់ចាប់យកមុខរបរចិញ្ចឹមដង្កូវដួងនៅក្រោយផ្ទះរបស់ខ្លួន កំពុងមានទីផ្សារល្អ ខណៈលក់បាន១គីឡូ ចន្លោះ ១៥ដុល្លារ ទៅ២០ដុល្លារ បានយ៉ាងងាយស្រួល។

ស្ថិតនៅក្នុងវ័យ ៤៣ឆ្នាំ លោក សេង ស៊ីម ជាអ្នកចិញ្ចឹមដួង ស្ថិតនៅស្រុកបរសេដ្ឋ ខេត្តកំពង់ស្ពឺ ប្រាប់ កម្ពុជាថ្មី ថា មុខរបរចិញ្ចឹមដួងនេះ លោកបានចាប់ផ្ដើមធ្វើវាឡើងមកតាំងពីឆ្នាំ ២០២៤មកម្ល៉េះ គិតមកទល់ពេលនេះអាចចាត់ទុកថាមានរយៈពេលជាង១ឆ្នាំមកហើយ។

លោក បន្តថា ដង្កូវដួង ជាសត្វមួយប្រភេទដែលពុំសូវមានអ្នកចិញ្ចឹមច្រើន ដូចកាលពីជាង៥ឆ្នាំមុន។ នេះក៏ដោយសារតែអ្នកចិញ្ចឹមខ្លះនៅខ្វះខាតបច្ចេកទេសក្នុងការចិញ្ចឹមវាផងដែរ។ បច្ចុប្បន្ន លោក សេង ស៊ីម អាចចិញ្ចឹមដួង លក់ទៅកាន់ទីផ្សារបានចន្លោះពី ១៥ដុល្លារ ទៅ២០ដុល្លារ។

ទាក់ទងនឹងបច្ចេកទេសចិញ្ចឹមវិញ អតីតអ្នកជំនាញកាត់តវីដេអូរូបនេះ បានឱ្យដឹងថា ប្រភេទដង្កូវដួង អាចប្រើរយៈពេលចន្លោះពី ១០ថ្ងៃ ទៅ១៥ថ្ងៃ ទើបអាចចាប់វាលក់បាន។ តែបើសួរថា ដួងត្រូវចិញ្ចឹមយ៉ាងដូចម្ដេច? លោក សេង​ ស៊ីម បង្ហើបឱ្យដឹងដែរថា ចំណីរបស់វាមានត្រឹមតែសំបកដូងខ្ចី ចេកទុំ និងដំឡូងមីលាយជាកន្ទួក បន្ដិចបន្ដិចគឺគ្រប់គ្រាន់ហើយ។

ដង្កូវដួង មានអត្ថប្រយោជន៍ច្រើនដូចជា៖ សម្បូរទៅដោយប្រូតេអ៊ីន ជាតិសសៃហ្វាយប័រ និងជួយសម្រួលដល់សម្ពោធឈាមក្នុងរាងកាយឱ្យដើរស្រួលផងដែរ។ នេះជាការបញ្ជាក់របស់ លោក សេង ស៊ីម។

គួបផ្សំជាមួយបទពិសោធន៍ក្នុងការចិញ្ចឹមសត្វកន្លងមកដែរនោះ ទើបធ្វើឱ្យលោក សេង ស៊ីម អាចចិញ្ចឹមដួងបានជោគជ័យ និងកំពុងទទួលបានការគាំទ្រខ្លាំងតាមរយៈបណ្ដេញសង្គមហ្វេសប៊ុក ដែលក្នុងមួយថ្ងៃលោកថា​មានអ្នកកម្មុងដួងយកទៅចម្អិនធ្វើម្ហូបមិនតិចជាង២០គីឡូ ក្នុងមួយថ្ងៃ។

ដើម្បីឆ្លើយតបទៅនឹងតម្រូវការទីផ្សារ លោក សេង ស៊ីម ក៏មានបំណងបង្កើតជាសហគមន៍ចិញ្ចឹមដួងនៅក្នុងភូមិរបស់លោកឱ្យបានកាន់តែច្រើនជាងមុន ដោយលោកក៏មានការផ្ដល់ពូជនឹងបច្ចេកទេសចិញ្ចឹមដល់កសិករដទៃទៀតដែលមានបំណងចិញ្ចឹមដួង ដើម្បីស្វែងរកប្រាក់ចំណូលបន្ថែមក្រៅពីរបរធ្វើស្រែច​ម្ការសព្វថ្ងៃ៕

អត្ថបទ ៖​ សួស សិត