ពងទាមានតម្លៃល្អឡើងវិញ ខណៈអាជ្ញាធរហាមឃាត់ពងទាខុសច្បាប់ពីប្រទេសជិតខាង

តម្លៃពងទាក្នុងស្រុកកើនឡើងបន្ដិច ខណៈមានការហាមឃាត់ពងទាខុសច្បាប់ពីប្រទេសជិតខាង ដ្បិតកសិករអះអាងថា តម្លៃកើនឡើងបន្ដិចតែក៏មិនទាន់ថាចំណេញខ្លាំងនោះដែរ។

លោក សៀវ វិសុទ្ធ ជាម្ចាស់កសិករចិញ្ចឹមទាយកពង ខ្មែររីករាយ ស្ថិតនៅស្រុកខ្សាច់កណ្ដាល ខេត្តកណ្ដាល ប្រាប់ កម្ពុជាថ្មី ថា បច្ចុប្បន្នពងទាដែលផលិតបានក្នុងកសិដ្ឋានរបស់លោក និងក៏ដូចជារបស់កសិករដទៃទៀត អាចចាត់ទុកថាមានតម្លៃល្អគួរសម្យ ប្រសិនបើធៀបនឹងប៉ុន្មានខែមុនដែលពងទាគឺធ្លាក់ថ្លៃយ៉ាងគំហុកនាំឱ្យអ្នកចិញ្ចឹមខាតបង់ស្ទើរតែបោះបង់ចោលរបរមួយនេះទៅហើយ។

ម្ចាស់កសិដ្ឋានរូបនេះ បានបញ្ជាក់ដែរថា បន្ទាប់ពីមានការបិទខ្ទប់ និងហាមឃាត់ពងទាខុសច្បាប់ពីប្រទេសជិតខាងរួចមក តម្លៃពងទាដែលចិញ្ចឹមក្នុងស្រុកនៅលើទីផ្សារ គឺមានតម្លៃល្អជាងមុនបន្ដិច ដោយពងទា១គ្រប់ អាចលក់ចេញបានចន្លោះពី ៣០០រៀល ទៅ ៣៥០រៀល។

ទោះបីជាពងទាមានតម្លៃប្រសិនជាងមុនបន្ដិចក៏ពិតមែន ប៉ុន្ដែលោក សៀវ វិសុទ្ធ នៅតែអះអាងថា តម្លៃប៉ុននេះ កសិករនៅពុំទាន់អាចចំណេញបាន នេះក៏ព្រោះតែការផលិតថ្លៃដើមខ្ពស់ ដូចជា៖ ការប្រើប្រាស់ចំណី ពិសេសតម្លៃប្រេងសាំងក៏មានកើនឡើងខ្ពស់ ដែលកត្តាទាំងនេះធ្វើឱ្យកសិករមិនអាចចំណេញបានច្រើនដូចកាលពីមុននោះឡើយ។

ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ ប្រាប់ កម្ពុជាថ្មី ថា សម្រាប់ពេលបច្ចុប្បន្ននេះ វិស័យចិញ្ចឹមសត្វនៅកម្ពុជាអាចចាត់ទុកថាគ្រប់គ្រាន់ និងស្របពេលជាមួយរដ្ឋាភិបាល ក៏ដូចជាក្រសួងកសិកម្មតាមរយៈអគ្គនាយដ្ឋាន ក៏បានដាក់ចេញនៅវិធានការហាមឃាត់ការនាំចូលពងទា និងពងមាន់ខុសច្បាប់ពីប្រទេសជិតខាងបានឆាប់រហ័ស និងទាន់ពេលវេលា។

ប្រធានសមាគមរូបនេះ បញ្ជាក់បន្ថែមថា ជាលទ្ធភាពនៃការហាមឃាត់ពងទា និងពងមាន់ពីប្រទេសជិតខាងរួចមកឃើញថា កសិករដែលជាអ្នកចិញ្ចឹមទា និងអ្នកចិញ្ចឹមមាន់យកពងក្នុងស្រុកទាំងអស់ អាចលក់ផលិតផលរប​ស់ខ្លួនបានក្នុងតម្លៃល្អសមរម្យ គឺចាប់ពី ១គ្រាប់ ៣០០រៀល ឡើងទៅ៕

អត្ថបទ ៖ សួស សិត