តម្រូវការផលិតសាច់ក្រក និងត្រីងៀតកំពុងមានទីផ្សារ​​ខ្ពស់

សិប្បកម្មផលិតអាហារក្រៀមស្ថិតនៅខេត្តសៀមរាបមួយ ដាក់ផែនការពង្រីការផលិតសាច់ក្រក និងត្រីងៀតបន្ថែមដើម្បីធ្វើយ៉ាងណាអាចឆ្លើយតបទៅនឹងតម្រូវការទីផ្សារតាមបណ្ដាខេត្ត និងរាជធានីភ្នំពេញ។

ជាម្ចាស់សិប្បកម្ម លឹម សេង ហ្វូត លោកស្រី ឡេង ដាលី ប្រាប់ កម្ពុជាថ្មី ថា ឆ្នាំ២០២៦នេះ សិប្បកម្មរបស់លោកស្រីបានដាក់ផែនការបន្ថែម ដើម្បីផលិតសាច់ក្រក និងត្រីងៀត រួមទាំងអាហារក្រៀមជាច្រើនមុខទៀត សម្រាប់ផ្គត់ផ្គង់ទីកាន់ទីផ្សារតាមប​ណ្ដាខេត្ត និងរាជធានីភ្នំពេញជាដើម។

ម្ចាស់សិប្បកម្មរូបនេះ បញ្ជាក់ដែរថា តាមរយៈព្រឹត្ដិការណ៍តាំងពិព័រណ៍ផលិតផលខ្មែរកន្លងមក ផលិតផលរបស់សិប្បកម្មលោកស្រីក៏កាន់តែទទួលបានការគាំទ្រ ពិសេសគឺបានធ្វើឱ្យប្រជាជនខ្មែរបានស្គាល់អំពីផលិតផលដែលផលិតក្នុងស្រុកកាន់ច្រើនជាងមុនផងដែរ។

យ៉ាងណាមិញ ស្របពេលដែលផលិតផលក្នុងសិប្បកម្ម លឹម សេង ហ្វូត កាន់តែទទួលបានការគាំទ្រ លោកស្រី ឡេង ដាលី ក៏បានលើកឡើងអំពីកខ្វះខាតកម្លាំងពលកម្ម សិប្បកម្មទាំងមូលនៅតែបន្តជ្រើសរើសកម្មករបន្ថែម ដើម្បីបង្រៀនពួកគាត់ឱ្យចេះជំនាញដោតសាច់ចង្កាក់ និងការផលិតអាហារក្រៀមជាច្រើនទៀត ដោយផ្ដល់ជូនប្រាក់ខែសមរម្យជូនផងដែរ។ សិប្បកម្មរបស់លោកស្រី ឡេង ដាលី បច្ចុប្បន្នក៏នៅតែបន្តដាក់ផែនការពង្រីកការផលិតអាហារក្រៀម ដែលមានដូចជា៖ សាច់ក្រក ត្រីងៀត និងអាហរកញ្ចប់ផ្សេងៗ ប្រមាណជាង ១០តោន ក្នុង១ថ្ងៃ ដើម្បីផ្គត់ផ្គង់ទៅកាន់ទីផ្សារ។

សម្រាប់ពេលបច្ចុប្បន្ន សិប្បកម្មរបស់លោកស្រី ឡេង ដាលី មានបុគ្គលិកបម្រើការប្រមាណជាង ១៨០នាក់ ក្នុងនោះមានជនភៀសសឹកដែលមិនទាន់អាចត្រឡប់ទៅកាន់ផ្ទះវិញប្រមាណជាង២០នាក់ ក៏បានទទួលឱ្យចូលធ្វើការក្នុងសិប្បកម្មមកទល់សព្វថ្ងៃនេះ។ បច្ចុប្បន្ន សិប្បកម្មមានទីតាំងស្ថិតភូមិតាវៀន ឃុំសាលាកំរើក ស្រុកសៀមរាប ខេត្តសៀមរាប៕

អត្ថបទ ៖ សួស សិត