ក្រសួងកសិកម្មថៃ៖ ការបិទបន្លែ-ផ្លែឈើថៃរបស់កម្ពុជា ប៉ះពាល់តិចដល់ថៃ

រដ្ឋមន្ត្រីក្រសួងកសិកម្ម និងសហករណ៍ថៃ លោកស្រី Narumon Pinyosinwat បាននិយាយកាលពីថ្ងៃព្រហស្បតិ៍ថា ការបិទព្រំដែនមានផលប៉ះពាល់តិចតួចដល់ប្រទេសថៃ​ ក្រោយអាជ្ញាធរកម្ពុជាបិទច្រកនាំចូលសម្រាប់បន្លែ-ផ្លែឈើថៃ ដើម្បីឆ្លើយតបនឹង​ការបិទ/កំណត់ម៉ោងចេញចូលព្រំដែនជាឯកតោភាគី​របស់យោធាថៃ។

តាមការចុះផ្សាយរបស់កាសែត The Nation លោកស្រី Narumon បាន​ពន្យល់ថា ការរំពឹងពីផលប៉ះពាល់តិចតួចនេះ គឺដោយសារតែ ទំនិញនាំថៃនាំទៅកម្ពុជា ភាគច្រើនជាទំនិញក្រៅ​កសិកម្ម។ លោកស្រី​បានកត់សម្គាល់ថា ផលប៉ះពាល់ចម្បងនឹងកើតមានលើ​កម្ពុជា ដោយសារ​ថៃបាននាំចូលដំឡូងមីតម្លៃប្រហែល ៩ ប៊ីលានបាត ពីកម្ពុជា ដើម្បីផ្គត់ផ្គង់វត្ថុធាតុដើមសម្រាប់ឧស្សាហកម្មក្នុងស្រុក​។ យ៉ាងណាមិញ លោកស្រីថា ប្រសិនស្ថានការណ៍កាន់តែដុនដាបទៅៗ ថៃគ្រោង​នាំចូលដំឡូងមីពីតំបន់ផ្សេងទៀតដូចជាឡាវ ឬប្តូរទៅដាំដំណាំផ្សេង​ជំនួសវិញ​។

លោកស្រី Narumon ថ្លែងយ៉ាងដូច្នេះថា​៖ «ខ្ញុំចង់ធានាដល់សាធារណជន និងកសិករថា បញ្ហានេះនឹងមិនប៉ះពាល់ខ្លាំងដល់វិស័យកសិកម្មទេ មានតែកសិករមួយចំនួននៅក្នុងតំបន់ជាក់លាក់ប៉ុណ្ណោះដែលអាចរងផលប៉ះពាល់ដោយផ្ទាល់ ហើយខ្ញុំបានណែនាំដល់ស្ថាប័នពាក់ព័ន្ធឱ្យតាមដានស្ថានភាព និងផ្តល់ជំនួយរួចហើយ»។

លោកស្រី Narumon បានបន្ថែមថា បន្លែ និងផ្លែឈើតាមរដូវ ដែលអាចរងផលប៉ះពាល់ពីការបិទច្រកព្រំដែន ត្រូវបានសម្របសម្រួលជាមួយក្រុមពាណិជ្ជកម្មទំនើបដើម្បីទិញ និងចែកចាយឡើងវិញ។ ក្រសួងកសិកម្មបានចាប់ផ្តើមដំណើរការនេះរួចហើយ ដោយនាយកដ្ឋានជំរុញកិច្ចសហប្រតិបត្តិការបានទិញផលិតផលមួយចំនួនដោយខ្លួនឯង។

លោក​ស្រី​បន្ត​ថា​៖ «​ការ​នាំ​ចេញ​​ទៅ​កម្ពុជា​ជា​ចម្បង​រួម​បញ្ចូល​បន្លែ​ដែល​មាន​តម្លៃ​ប្រហែល ១០ ម៉ឺន​បាត ដែល​មិន​មាន​អ្វី​សំខាន់​នោះ​ទេ។​ ទៅ​មុខទៀត យើង​ប្រហែល​ជា​ត្រូវ​កែ​សម្រួល​ផ្លូវ​ដឹក​ជញ្ជូន និង​ពិចារណា​លើ​ការ​ដឹក​ជញ្ជូន​តាម​សមុទ្រ ដែល​អាច​បង្កើន​ថ្លៃ​ដើម ប៉ុន្តែ​យើង​ត្រូវ​តែ​សម្រប​ខ្លួន»។ លោកស្រីមិនបាន​បញ្ជាក់ថា បន្លែ ១០ ម៉ឺនបាត នាំចូលមកកម្ពុជាក្នុងរយៈពេល ១ ថ្ងៃឬយ៉ាងណា ឬ​ក៏តាមច្រកព្រំដែនណាទេ។

លោកស្រី Narumon សន្និដ្ឋានថា ក្រសួងកសិកម្មមិនទប់ស្កាត់ការនាំចូលពីកម្ពុជា ​ហើយក៏មិនឆ្លើយតបនឹងការចរចានយោបាយដែរ ព្រោះវាស្ថិតនៅក្រោមការទទួលខុសត្រូវរបស់ក្រសួងការពារជាតិ៕