ក្រុមហ៊ុនផលិតសាប៊ូក្នុងស្រុកមួយ ដាក់ផែនការបង្កើនការផលិត​

ម្ចាស់សិប្បកម្មផលិតសាប៊ូក្នុងស្រុកមួយ កំពុងដាក់ផែនការផលិតសាប៊ូលាងចាន សាប៊ូដុសខ្លួន និងសាប៊ូជាច្រើនមុខទៀត ដើម្បីធ្វើយ៉ាងណាឆ្លើយតបឱ្យទាន់តម្រូវការទីផ្សារប្រចាំថ្ងៃ។

ជាស្ថាបនិកក្រុមហ៊ុន អិល អេស វី ដែលជារោងចក្រផលិតសាប៊ូ អូកា អ្នកស្រី នុត​ សម្ផស្ស ប្រាប់ កម្ពុជាថ្មី ថា ដើម្បីឆ្លើយតបទៅនឹងតម្រូវការប្រចាំថ្ងៃ ក្រុមហ៊ុនរប​ស់អ្នកស្រី កំពុងតែដាក់ផែនការផលិតសាប៊ូជាច្រើនមុខសម្រាប់ចែកចាយ និងផ្គត់ផ្គង់ទៅកាន់ទីផ្សារក្នុងស្រុកឱ្យបានក្នុងបរិមាណច្រើនជាងមុន ខណៈបច្ចុប្បន្ន អ្នកស្រី សង្កេតឃើញថា ប្រជាជនខ្មែរ ងាកមកគាំទ្រផលិតផលក្នុងស្រុកកាន់តែច្រើនជាងមុន។

អ្នកស្រី នុត សម្ផស្ស បន្តថា សម្រាប់ពេលបច្ចុប្បន្ន ក្រុមហ៊ុនអ្នកស្រី បាននឹងកំពុងតែដុតដៃដុតជើង ពោលគឺខិតខំប្រឹងប្រែងផលិតទាំងថ្ងៃទាំងយប់ ដោយរៀបចំក្រុមការងារជា២វេន ដើម្បីផលិតសាប៊ូ ដែលមានគុណភាពជូនដល់អតិថិជន ពិសេសគឺប្រជាជនខ្មែរតែម្ដង។

សហគ្រិនឆ្នើមវ័យ ៤៥ឆ្នាំ​ រូបនេះ បញ្ជាក់ដែរថា «ការធ្វើបែបនេះ មិនមែនជាការឆ្លៀតឱកាស ឬកេងចំណេញធ្វើទីផ្សារ ស្របពេលដែលថៃបានបិទច្រកព្រំដែន និងបិទការនាំចេញទំនិញមកកម្ពុជានោះទេ!ផ្ទុយទៅវិញ អ្នកស្រី ចង់ឱ្យខ្មែរអាចមានផលិតផលដែលផលិតបានដោយខ្លួនឯង និងមានស្ដង់ដាត្រឹមត្រូវ មិនចាញ់ផលិតផលនាំចូល នោះឡើយ»។

ក្រៅពីការផលិតសាប៊ូឱ្យទាន់តម្រូវការទីផ្សារក្នុងស្រុក ថ្មីៗនេះ អ្នកស្រី នុត សម្ផស្ស ក៏បានទទួលពលករខ្មែរដែលត្រឡប់មកពីប្រទេសថៃ ឱ្យចូលបម្រើការក្នុងសង្វាក់ផលិតកម្មផលិតសាប៊ូរបស់ក្រុមហ៊ុន​ អ្នកស្រីបានមួយចំនួន ផងដែរ។

កន្លងមកក្រុមហ៊ុនរបស់ អ្នកស្រី នុត សម្ផស្ស តែងតែបានជ្រើសរើសប្រភេទបន្លែ ផ្លែឈើ និងរុក្ខជាតិ មួយចំនួនទៀត សម្រាប់យកមកច្នៃធ្វើជាសាប៊ូផ្សេងៗ ពីព្រោះតែ ប្រភេទបន្លែ និងផ្លែឈើទាំងនេះ មានសារធាតុល្អខ្លាំង សម្រាប់សុខភាពស្បែករបស់មនុស្សទូទៅ។

គួរឱ្យដឹងដែរថា ក្រុមហ៊ុន អិល អេស វី ផលិតសាប៊ូអូកា ជាក្រុមហ៊ុនដែលបង្កើតឡើងដោយសហគ្រិនខ្មែរម្នាក់ ដែលគិតមកទល់ពេលនេះ ក្រុមហ៊ុនបានបើកដំណើររយៈពេល ១២ឆ្នាំមកហើយ៕

អត្ថបទ ៖ សួស សិត