កម្ពុជានាំចេញផ្លែមៀនប៉ៃលិន សម្រេចបានទឹកប្រាក់ជិត ២៤ លានដុល្លារ

កម្ពុជានាំចេញផ្លែមៀនស្រស់​សម្រេច​បាន​ជិត ២ ម៉ឺនតោន​ នៅក្នុងរយៈពេល ៥ ខែ ឆ្នាំ ២០២៥ (មករា-ឧសភា)​ គិតជាទឹកប្រាក់ ២៣,៩២ លានដុល្លារ កើន ៨,១១% ធៀបនឹងរយៈពេល​ដូច​គ្នា​​កាលពីឆ្នាំមុន។ នេះបើយោងតាមរបាយការណ៍របស់ក្រសួងពាណិជ្ជកម្ម។

លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន​ប្រាប់​កម្ពុ​ជា​ថ្មី​ថា រដូវប្រមូលផលផ្លែមៀន​ប៉ៃលិនបាន​បញ្ចប់ហើយ ខណៈទិន្នផល និងទីផ្សារតម្លៃ​មានភាពល្អ​ប្រ​សើរ​​​​ដែលក្រុមហ៊ុនបានចុះ​កិច្ច​សន្យា​ទិញពីកសិករ ៣០០០ រៀល ក្នុងមួយគីឡូក្រាម។​

គិតត្រឹម​ខែ​មិថុនា ឆ្នាំ ២០២៥ ខេត្តប៉ៃលិននាំចេញផ្លែមៀនស្រស់ទៅចិនចំនួន ១៤ ២០៤ តោន។ ចិនជា​ទីផ្សារ​ផ្លែ​មៀនធំជាងគេសម្រាប់កម្ពុជា។

លោក​ សួន ជុំ អនុប្រធានសមាគមមៀនប៉ៃលិនបានលើកឡើងថា តម្លៃ ៣០០០ រៀល ក្នុងមួយ​គីឡូ​ក្រាម អាចទទួល​យកបាន ប្រសិនបើកសិករចេះថែទាំមៀនត្រូវតាមក្បួនខ្នាត​បច្ចេក​ទេស​នោះ​​​គឺ​កសិករ​នឹងអាចចំណេញ។

យោងតាមក្រសួងពាណិជ្ជកម្ម នៅក្នុងឆ្នាំ ២០២៤ កម្ពុជារកចំណូលបានជាង ២៧ លានដុល្លារ ពីការនាំចេញផ្លែមៀនប៉ៃលិន កើនឡើងជាង ៥០%៕

អត្ថបទ៖ ឡេង ដេត