រោងចក្រចំនួន ៦ កំពុងរៀបចំហេដ្ឋារចនាសម្ព័ន្ធ នាំចេញផលិតផលមៀនស្ងួតទៅទីផ្សារចិន

លោកឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រម៉ាញ់ និងនេសាទ បានឱ្យដឹងថា ជុំវិញការបើកពិធីសារបើកផ្លូវឱ្យកម្ពុជានាំចេញផ្លែមៀនក្រៀមទៅកាន់ទីផ្សារប្រទេសចិននេះ ក្រសួងកសិកម្មបានចំណាយពេលចរចាជាមួយរដ្ឋបាលគយចិនជិតមួយឆ្នាំ ពោលបើគិតចាប់តាំងពីកម្ពុជាបានដាក់លិខិតស្នើសុំចាប់តាំងពីខែសីហា ឆ្នាំ២០២៥ មុននឹងសម្រេចបានជាផ្លូវការនៅខែនេះ។

ក្រសួងកសិកម្ម ​រុក្ខា​ប្រមាញ់ ​និង​នេសាទ ​និង​អគ្គរដ្ឋបាលគយ​នៃសាធារណរដ្ឋប្រជាមានិតចិនកាលពីថ្ងៃទី ០៣ មិថុនា ២០២៦ ​បានចុះហត្ថលេខាលើពិធីសារស្តីពីលក្ខខណ្ឌតម្រូវអនាម័យ និង​ភូត​គាម​អនាម័យ​ សម្រាប់​ការនាំចេញ​ មៀន​សម្ងួត​ពី​កម្ពុជា​ទៅកាន់​ទីផ្សារ​ចិន​។​

លោក ឃឹម ហ្វីណង់ បានបន្តថា ពិធីសារមួយនេះ មានអត្ថន័យធំធេងសម្រាប់បងប្អូន​កសិករដាំមៀន​ ដោយកន្លង​មក យើងមានពិធិសារស្តីពីការនាំចេញមៀនស្រស់រួចមកហើយ ប៉ុន្តែ​ការបន្ថែម​ការនាំចេញ​មៀន​ក្រៀមនេះ គឺជាការបើកច្រកទីផ្សារថ្មីមួយទៀត សម្រាប់ផលិតផលកែច្នៃ​មានតម្លៃបន្ថែមខ្ពស់ជាងមុន។

លោក ឃឹម ហ្វីណង់ បញ្ជាក់ថា អត្ថប្រយោជន៍ធំបំផុតនោះគឺថា ផលិតផលមៀនក្រៀមអាចរក្សាទុកបានរយៈពេលយូរ នឹងជួយស្រូបយកទិន្នផលមៀនស្រស់របស់កសិករយើង ដែលនៅសល់ក្នុងប្រការណាមួយ នៅ​ពេល​ដែលរដូវប្រមូលផលជន់ជោរ និងកាត់បន្ថយនូវការកកស្ទះទុកកុំឱ្យថ្លៃធ្លាក់ចុះ និងជួយធានាស្ថិរភាពថ្លៃទីផ្សារយ៉ាងល្អ។

ម្យ៉ាងទៀត ការនាំចេញទៅចិន គឺមិនមានកូតាកំណត់នោះទេ ដូច្នេះយើងជឿថា យើងមានវត្ថុធាតុដើមគ្រប់គ្រាន់សម្រាប់ការគាំទ្រដល់ការកែច្នៃដើម្បីនាំចេញមៀនក្រៀមនេះ។

លោក ឃឹម ហ្វីណង់ បន្ថែមថា៖ «សម្រាប់ការអនុវត្តន៍នីតិវិធីនាំចេញ ក្រសួងកសិកម្ម បានដើរមួយជំហានរួចមកហើយ ដោយបានធ្វើការយ៉ាងជិតស្និតស្និទ្ធជាមួយនឹងវិស័យឯកជន ដែលរហូតមកទល់ពេលនេះ យើងមានរោងចក្រចំនួន៦ ក្នុងនោះ រោងចក្រ២នៅខេត្តបាត់ដំបង់ និង៤ទៀត នៅខេត្តប៉ៃលិន ដែលបានកំពុងរៀបចំហេដ្ឋារចនាសម្ព័ន្ធរបស់ខ្លួន។ សម្រាប់ជំហានបន្ទាប់ អគ្គនាយកដ្ឋានក្សេត្រសាស្ត្រ នឹងសម្របសម្រួលឱ្យមានការចុះទៅវាយតម្លៃរោងចក្រទាំងអស់នេះ ដើម្បីរៀបចំជាសំណុំឯកសារ និងស្នើសុំការចុះបញ្ជីនៅអគ្គនាយកដ្ឋានគយចិន»។

មន្ត្រីដដែលរូបនេះ បញ្ជាក់ថា បន្ទាប់ពីនោះ ខាងគយចិននឹងធ្វើការត្រួតពិនិត្យ អាចតាមរយៈ​អន​ឡាញ ឬការចុះមកវាយតម្លៃផ្ទាល់ ហើយនៅពេលដែលការវាយតម្លៃជាប់ជាផ្លូវការ រោងចក្រទាំង៦នោះអាចចាប់ផ្តើមធ្វើការនាំចេញបានតែម្តង។

ជារួមសមិទ្ធផលទាំងអស់នេះ​គឺជាការគិតគូជាយុទ្ធសាស្ត្ររបស់ក្រសួងកសិកម្មក្នុងការបន្តបើកផ្លូវ និងស្វែង​រក​ទីផ្សារថ្មីៗដើម្បីជួយដោះស្រាយការប្រឈមរបស់បងប្អូនកសិករយើងដើម្បីធ្វើយ៉ាងណាជួយឱ្យបងប្អូនកសិករយើងចាប់បាននូវឱកាសសេដ្ឋកិច្ចពិតប្រាកដ។

គិតត្រឹមត្រីមាសទី១ ​២០២៦ កម្ពុជា​រកប្រាក់ចំណូលបានជាង ១៤ លានដុល្លារ ពីការនាំចេញ​ផ្លែមៀនប៉ៃលិន ធ្លាក់ចុះ ២៨,៣% ធៀបនឹងរយៈពេលដូចគ្នាកាលពីឆ្នាំមុន។​

​យោងតាមក្រសួងពាណិជ្ជកម្ម ​នៅក្នុងឆ្នាំ ​២០២៥ ​កម្ពុជា​រកប្រាក់ចំណូលបានជិត​ ៤០ លានដុល្លារ ​ពីការនាំចេញ​ផ្លែមៀនប៉ៃលិន​នៅក្នុងឆ្នាំ ២០២៥ ​កើនឡើង​ ២២,៨២% ​ប្រៀបធៀបនឹងឆ្នាំ ២០២៤៕