សេដ្ឋកិច្ច

កម្ពុជា រកចំណូលបានជិត $៤០ លាន ពីការនាំចេញផ្លែមៀនស្រស់ កើនជិត ២៣%

បានផុស

៣ ខែ មុន

នៅ

ថ្ងៃអង្គារ ២៧ មករា ២០២៦

ដោយ

កម្ពុជារកប្រាក់ចំណូលបានជិត ៤០ លានដុល្លារ ពីការនាំចេញផ្លែមៀនប៉ៃលិននៅក្នុងឆ្នាំ ២០២៥ កើនឡើង ២២,៨២% ប្រៀបធៀបនឹងរយៈពេលដូចគ្នាកាលពីឆ្នាំមុន ដែលសម្រេចបានទំហំទឹកប្រាក់ ៣២ លានដុល្លារ។ នេះបើយោងតាមរបាយការណ៍របស់ក្រសួងពាណិជ្ជកម្ម។

យោងតាមក្រសួងកសិកម្ម រុក្ខាប្រមាញ់ និងនេសាទ នៅក្នុងឆ្នាំ ២០២៥ បរិមាណនៃការនាំចេញផ្លែមៀនស្រស់ សម្រេចបាន ៣២ ៩៦៣ តោន កើនឡើង ៣១,៣២% ធៀបនឹងឆ្នាំ ២០២៤។

ទិន្នផល និងទីផ្សារតម្លៃមៀនប៉ៃលិនមានភាពល្អប្រសើរនៅឆ្នាំ ២០២៥ ក្រុមហ៊ុនដែលនាំចេញផ្លែមៀនទៅចិនបានចុះកិច្ចសន្យាទិញពីកសិករក្នុងតម្លៃ ៣០០០ រៀល ក្នុងមួយគីឡូក្រាម។

លោក សួន ជុំ អនុប្រធានសមាគមមៀនប៉ៃលិនមានប្រសាសន៍ថា កសិករអាចលក់មៀនប៉ៃលិនទៅឱ្យក្រុមក្រុមហ៊ុន ក្នុងតម្លៃ ៣០០០ រៀល ក្នុងមួយគីឡូក្រាម ដែលលោកអះអាងថា កសិករអាចទទួលយកបាន ប្រសិនបើកសិករចេះថែទាំមៀនត្រូវតាមក្បួនខ្នាតបច្ចេកទេសនោះគឺកសិករនឹងអាចចំណេញ។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើង នៅក្នុងរបាយការណ៍ថា នៅក្នុងឆ្នាំ ២០២៥ ការនាំចេញផលិតផលដំណាំ មានលក្ខណៈល្អប្រសើរ កើនឡើង ២៧,៨៣% ធៀបនឹងឆ្នាំ ២០២៤។

ផលិតកម្មស្រូវ អង្ករ ដំណាំរួមផ្សំ ឈើហូបផ្លែ បន្លែ ត្រី សាច់សត្វ មានលទ្ធភាពគ្រប់គ្រាន់សម្រាប់ផ្គត់ផ្គង់តម្រូវការក្នុងស្រុក និងអាចធានបាននូវសន្តិសុខស្បៀងសម្រាប់ប្រជាពលរដ្ឋ៕