កម្ពុជារំពឹងទទួលបានគម្រោងវិនិយោគជាង ៥០០ នៅឆ្នាំ ២០២៥

កម្ពុជារំពឹងទទួលបានការអនុម័តគម្រោងវិនិយោគជាង ៥០០ គម្រោង និងអាចបង្កើតការងារជាង ៣០ ម៉ឺន​​​កន្លែង នៅក្នុងឆ្នាំ ២០២៥។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍​កម្ពុជា បាន​លើក​ឡើង​​នៅថ្ងៃទី ០១ ខែសីហា ឆ្នាំ ២០២៥ថា គិតត្រឹមថ្ងៃទី ២៥ ខែកក្កដា ក្នុងឆ្នាំ ២០២៥ គម្រោងវិនិយោគ​ចំនួន ៤២៦ ត្រូវបានអនុម័ត ដែលអាចបង្កើតការងារជាង ៣០ ម៉ឺនកន្លែងដែលជាង ៩០% លើ​វិស័យ​​ឧស្សា​ហកម្ម។

លោកឧបនាយករដ្ឋមន្ត្រី ស៊ុន ចាន់ថុល អំពាវនាវឱ្យពលករខ្មែរដែលធ្វើការចំណាកស្រុក ត្រឡប់មកធ្វើការនៅកម្ពុជាវិញ ស្រប​​ពេលដែលគម្រោងបង្កើតរោងចក្រនៅក្នុងវិស័យឧស្សាហកម្មបានកើនឡើងជាបន្តបន្ទាប់។

នៅឆមាសទី១ ឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៣៧៣ កើនឡើង ១៨៣ គម្រោង ក្នុងទំហំទុនវិនិយោគប្រមាណ ៥,៨ ពាន់លានដុល្លារកើន ២,៥ ពាន់លានដុល្លារ ស្មើនឹង ៧៧% ឆ្នាំ២០២៥ និងអាចបង្កើតការងារបានប្រមាណ ២៥៥​ពាន់​កន្លែង។

នៅក្នុងឆ្នាំ ២០២៤ កម្ពុជាបានអនុម័តគម្រោង​វិនិយោគសរុបចំនួន ៤១៤គម្រោង ក្នុងនោះគម្រោងវិនិយោគថ្មីចំនួន ៣៨៧គម្រោង និងគម្រោងពង្រីកផលិតកម្មចំនួន ២៧គម្រោង ដែលមានទុនវិនិយោគសរុបប្រមាណ ៦,៩ពាន់លានដុល្លារ អាម៉េរិក និងអាចបង្កើតការងារបានប្រមាណជិត ៣២ម៉ឺនកន្លែង៕