តម្លៃប្រេងធ្លាក់ចុះ ២ ដុល្លារ ពេលបិទការជួញដូរ

តម្លៃប្រេងអន្តរជាតិ បាន​ធ្លាក់ចុះ ២ ដុល្លារ ពេល​បិទការជួញដូរ​កាលពីថ្ងៃសុក្រ ដោយសារតែលទ្ធភាព​នៃការបង្កើនផលិតកម្មប្រេងរបស់អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) និងកង្វល់ពីកម្សោយការងារនៅសហរដ្ឋអាមេរិក ដែលអាច​ប៉ះពាល់ដល់កំណើន​។ នេះបើតាមការចុះផ្សាយរបស់សារព័ត៌មាន​រ៉យទ័រ។

តម្លៃ​ប្រេងឆៅនាពេលអនាគត ម៉ាក​ Brent បានបិទការជួញដូរនៅតម្លៃ ៦៩,៦៧ ដុល្លារ​/បារ៉ែល ដោយ​ធ្លាក់ចុះ ២,០៣ ដុល្លារ ឬ ២,៨៣ ភាគរយ។ ចំណែកឯប្រេងអាមេរិក ម៉ាក​ West Texas Intermediate (WTI) បានបិទការជួញដូរ​នៅតម្លៃ ៦៧,៣៣ ដុល្លារ/បារ៉ែល ដោយធ្លាក់ចុះ ១,៩៣ ដុល្លារ ឬ ២,៧៩ ភាគរយ​។

យ៉ាង​ណា​មិញ ក្នុងអត្រាប្រចាំសប្ដាហ៍ តម្លៃប្រេងម៉ាក​ Brent បានកើនឡើងជិត ៦ ភាគរយ ខណៈតម្លៃប្រេង​ម៉ាក WTI បានកើនឡើង ៦,២៩ ភាគរយ​។

ប៉ុន្តែ ការធ្លាក់ចុះនៅថ្ងៃសុក្រ កើតឡើងក្រោយ​ប្រភពដែល​ដឹងពីការប្រជុំរបស់ OPEC+ បាន​និយាយថា សមាជិកប្លុក អាចឈានដល់កិច្ចព្រមព្រៀងនៅថ្ងៃអាទិត្យ ដើម្បី​បង្កើនផលិតកម្ម ៥៤៨ ០០០ បារ៉ែល/ថ្ងៃ នៅខែកញ្ញា។ ​ជាមួយគ្នានោះ ក្រសួងការងារសហរដ្ឋអាមេរិកឯណោះវិញ បាននិយាយថា សហរដ្ឋអាមេរិ​កបានបន្ថែមការងារថ្មី ចំនួន ៧៣ ០០០ នៅក្នុងខែកក្កដា ដោយ​ទាបជាង​ការព្យាកររបស់អ្នកសេដ្ឋកិច្ច ហើយ​បង្កើនអត្រាអត់ការងារធ្វើជាតិដល់ ៤,២ ភាគរយ ពី ៤,១ ភាគរយ​។ នេះបង្ហាញពីភាព​មិនអំណោយ​ផលនៃសេដ្ឋកិច្ច ដែល​អាច​ប៉ះពាល់ដល់តម្រូវការប្រេង។