សេដ្ឋកិច្ច

តម្លៃមាសមាននិន្នាការធ្លាក់ចុះ នៅថ្ងៃអង្គារនេះ

បានផុស

១១ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

អ្នកជំនាញនៅក្នុងវិស័យហិរញ្ញវត្ថុបានលើកឡើងថា ហាងឆេងមាសបានបន្តធ្លាក់ចុះនៅថ្ងៃអង្គារនេះមកនៅតម្លៃ ៤ ០១៥ ដុល្លារក្នុងមួយតម្លឹង ដោយសារតែមានការបញ្ជាលក់ច្រើន ខណៈសម្ពាធពន្ធរបស់សហរដ្ឋអាមេរិកបានថមថយ។សម្រាប់ហាងឆេងមាសក្នុងស្រុកតាមបណ្ដាហាងនានានៅរាជធានីភ្នំពេញ លក់ចេញក្នុងតម្លៃ ៤០២ ដុល្លារក្នុងមួយជី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities បានប្រាប់ឱ្យដឹងថា មិនមានកត្តាធំដុំដែលធ្វើឱ្យមាសប្រែប្រួលនោះទេ ប៉ុន្តែតាមបែបបច្ចេកទេស មាសបានទម្លាក់ខ្លួនចុះមកវិញ បន្ទាប់ពីហក់ឡើងខ្ពស់បំផុតដល់ ៤ ០៩៨ ដុល្លារ ក្នុងមួយតម្លឹង កាលពីដើមខែសីហានេះ។

លោក ឡុង សំណាង បានបន្ថែមថា មានរឿងមួយចំនួន ដែលមាសបានធ្លាក់ចុះ ដោយសារតែការបញ្ជាលក់ច្រើននៅតាមគេហៈទំព័រជាច្រើន ប៉ុន្តែវាមិនមែនជាការបញ្ជាលក់តាមទ្រង់ទា្រយធំៗ លក្ខណៈជាធនាគារប្រចាំប្រទេសនីមួយៗ ឬក៏វិនិយោគិនធំៗទេ ពោលគឺជាអតិថិជនទូទៅដែលគាត់បញ្ជាលក់យកចំណេញ ដែលធ្វើឱ្យមាសធ្លាក់ចុះ។

លោក ឡុង សំណា យល់ឃើញថា៖ «ពាក់ព័ន្ធនឹងសម្ពាធពន្ធរបស់សហរដ្ឋអាមេរិក មួយរយៈនេះ លោក ដូណាល់ ត្រាំ ហាក់ដូចជាបន្ធូរបន្ថយ ឬមិនសូវមានឥទ្ធិពលគាបសង្កត់ទៅលើបណ្ដាប្រទេសមួយចំនួន នៅប៉ែកអាស៊ី និងអឺរ៉ុប មិនដូចពេលដំបូង ដែលតម្រូវឱ្យប្រទេសទាំងអស់ទៅចរចានៅអាមេរិក អញ្ចឹងគាត់ដូចជាតម្លាក់ដៃបន្តិច ដែលធ្វើឱ្យសម្ពាធពន្ធធូរថយ»។

លោក ដូណាល់ ត្រាំ ប្រហែលងាកមកធ្វើឱ្យសេដ្ឋកិច្ចពិភពលោកឱ្យកាន់តែប្រសើរឡើង ខណៈបណ្ដាប្រទេសមួយចំនួន តែងតែលើកសរសើរលោក ពីសន្តិភាព ដែលជាឱកាសឱ្យបណ្ដាប្រទេសមួយចំនួនធ្វើការចរចាកាន់តែស្រួល។

បើតាមលោក ឡុង សំណាង រយៈពេលខ្លី តម្លៃមាសនឹងធ្លាក់ចុះ ប៉ុន្តែនៅអំឡុងខែ តុលា រហូតដល់ដំណាច់ឆ្នាំ ២០២៥ តម្លៃមាសនឹងអាចងើបឡើងវិញ ដោយសារការកាត់បន្ថយអត្រាការប្រាក់របស់សហរដ្ឋអាមេរិក នៅពេលដែលសេដ្ឋកិច្ចល្អប្រសើរឡើង៕

អត្ថបទ៖ ឡេង ដេត