​តម្លៃមាស​ធ្លាក់​ចុះ​ក្រោម ៥ ​ពាន់ដុល្លារ ​មួយតម្លឹង​

តម្លៃហាងឆេងមាស​បាន​ធ្លាក់ចុះវិញ​ពោល​គឺ​នៅ​តម្លៃក្រោម ៥ ពាន់ដុល្លារ (​៤៩៤០) ​ក្នុង​មួយ​តម្លឹង​ នៅថ្ងៃពុធ ទី ២៤ ​មិថុនា ២០២៦ ​ដោយសារ​តែ​កម្លាំង​នៃ​ប្រាក់ដុល្លារ ​និង​គោល​នយោ​បាយ​គាំទ្រ​របស់​ធនាគារ​កណ្ដាល​អាមេរិក​។​

​លោក​ឧកញ៉ា ចិន សំណាង ​ថៅកែហាងពេជ្រ​ CSNJ ​មានប្រសាសន៍ថា​​ តម្លៃមាសធ្លាក់ចុះ ​ដោយ​សារ​តែ​គោល​នយោបាយរបស់​ធនាគារ​កណ្ដាល​​របស់​សហរដ្ឋ​អា​មេរិក។​

​លោកបញ្ជាក់ថា ​​គោលនយោបាយ​របស់​លោក​ Kevin Warsh​ ខុសពីលោក ​Jerome Powell​ ដែល​គោល​នយោបាយ​របស់គាត់​គឺធ្វើ​ឱ្យ​តម្លៃ​មាស ​ងាយស្រួលនឹងឡើង​ ចំណែកឯ លោក Kevin ​ដាក់​គោល​នយោ​បាយ​មក ​គាត់ចង់​ឱ្យ​អតិផរ​ណា​ចុះ​នៅ​ត្រឹម​ ២% ​ខណៈ​បច្ចុប្បន្ន​នៅ​ ៤% ហើយ​ពេល​ដែល​អតិផរ​ណា​ចុះដល់ ២% ​គាត់​នឹង​ដំឡើង​អត្រា​ការ​ប្រាក់។​

​លោកបន្ថែមថា ​កត្តាទាំងនេះធ្វើឱ្យប្រាក់ដុល្លារកើនឡើង ​រុញច្រានឱ្យតម្លៃមាសធ្លាក់ចុះ ​ហើយថា ប្រសិន​បើធនា​គារកណ្ដាលដំឡើងអត្រាការប្រាក់​ តម្លៃមាសនឹង​បន្តតធ្លាក់​ចុះទៀត។

​លោក ឡុង សំណាង ​នាយក​អភិវឌ្ឍ​អាជីវកម្មនៃក្រុមហ៊ុន ​PP Link securities ​យល់ឃើញថា ​តម្លៃ​ហាង​ឆេង​មាស​បន្តធ្លាក់ចុះ ​បន្ទាប់ពីមានព័ត៌មាន​ពាក់ព័ន្ធនឹងអត្រាការប្រាក់របស់​ធនាគារ​កណ្ដាល​អាមេរិក ​ខណៈ​អាមេរិក​បន្តរក្សាការប្រាក់ ៣.៧៥% ដដែល។​

​លោក ឡុង សំណាងលើកឡើងថា៖ ​«ការដែលអាមេរិករក្សាអត្រាការប្រាក់ដដែល ដោយសារតែ​អត្រា​ការ​ប្រាក់ខ្ពស់ហើយ មិនចាំបាច់ដំឡើងក៏បាន ដុល្លារល្អហើយ មិនបាច់ចាំដំឡើងក៏បានដែរ ស្ថិត​ក្នុង​កាលៈ​ទេសៈ​នេះ ​ចំណុចដែករក្សាអត្រការប្រាក់នៅដដែល គឺដុល្លារល្អបាត់ហើយ ខណៈ​សន្ទុះ​ប្រាក់​ដុល្លារខ្លាំង ​រុញច្រានឱ្យមាស​ថមថយ»៕​

​អត្ថបទ៖ ឡេង ដេត