មីយ៉ាន់ម៉ាប្រាប់ថៃឱ្យប្រើផ្លូវវាងរាប់ពាន់គីឡូម៉ែត្រ បើ​ចង់ដឹកជញ្ជូនទំនិញចូលស្រុកខ្លួន

មីយ៉ាន់ម៉ាប្រាប់ឱ្យអ្នកនាំចេញទំនិញថៃប្រើប្រាស់ផ្លូវវាងកាត់តាមខេត្តរ៉ានង ​ដើម្បីដឹកជញ្ជូនទំនិញចូលទៅក្នុងប្រទេសមីយ៉ាន់ម៉ា ក្រោយ​របបយោធាបិទច្រកព្រំដែនសំខាន់តាមស្ពានមិត្តភាព Mae sot-Myawaddy 2 កាលពីខែមុន ដើម្បីរៀបចំហេដ្ឋារចនាសម្ព័ន្ធគ្រប់គ្រងការនាំចូលឡើងវិញ។ នេះបើតាមការចុះផ្សាយរបស់កាសែតបាងកកប៉ុស្តិ៍។

អគ្គនាយិកានៃនាយកដ្ឋានពាណិជ្ជកម្មបរទេសថៃ លោកស្រី Arada Fuangtong បាន​ឱ្យ​ដឹងកាលពីថ្ងៃចន្ទថា តំណាងក្រសួងពាណិជ្ជកម្មថៃ បានជួបពិភាក្សាជាមួយលោក Zaw Zaw Soe ឯកអគ្គរដ្ឋ​ទូត​មីយ៉ាន់ម៉ាប្រចាំប្រទេសថៃ ដើម្បីសម្រួលដល់ការអនុវត្ត​ពាក់ព័ន្ធអាជ្ញាប័ណ្ណនាំចូលរបស់​មីយ៉ាន់ម៉ា​។

លោកស្រីបាននិយាយថា អាជ្ញាធរ​មីយ៉ាន់ម៉ាបានណែនាំដល់ក្រុមហ៊ុននាំចេញ​ថៃ ដែលមានគម្រោងប្រើប្រាស់ស្ពានមិត្តភាពថៃ-មីយ៉ាន់ម៉ា Mae sot-Myawaddy 2 ​នៃខេត្ត Tak ឱ្យ​ដឹកជញ្ជូនទំនិញរបស់ពួកគេពីកំពង់ផែខេត្ត រ៉ាណង ​(ថៃ) ចូលទៅកាន់កំពង់ផែក្រុង Kawthoung (មីយ៉ាន់ម៉ា) ឬតាមច្រកព្រំដែន ​Mae Sai-Tachileik ជំនួសវិញ។

កំពង់ផែក្រុង Kawthoung គឺជាចំណុចភាគខាងត្បូងបំផុតនៃដីទ្វីបរបស់មីយ៉ាន់ម៉ា ដែល​មាន​ប្រវែងជាង ១ ៤០០ គីឡូម៉ែត្រ ពីរដ្ឋធានី ណៃពិដោ និង ១ ២៧០ គីឡូម៉ែត្រ ពីទីក្រុង យ៉ាងហ្គូន។ ចំណែកឯច្រកព្រំដែន ​Mae Sai-Tachileik ស្ថិតនៅភាគខាងជើងបំផុតនៃប្រទេសថៃ ដោយ​មានប្រវែងប្រហែល ៨០០ គីឡូម៉ែត្រ ពីក្រុងណៃពិដោ​។

ច្រក Mae sot-Myawaddy 2 មាន​ចម្ងាយត្រឹមតែ ប្រហែល ៤០០ គីឡូម៉ែត្រប៉ុណ្ណេះ ពីទីក្រុង យ៉ាងហ្គូន។

ការប្រើប្រាស់ផ្លូវវាងមាន​ន័យថា ក្រុមហ៊ុន​នាំចេញថៃត្រូវចំណាយលើសពីទ្វេដងលើថ្លៃដឹកជញ្ជូនទំនិញទៅមីយ៉ាន់ម៉ា។

គួរគូសបញ្ជាក់ថា ការបិទព្រំដែនសំខាន់របស់មីយ៉ាន់ម៉ា ធ្វើឡើងចំពេលដែលការនាំចេញថៃទៅមីយ៉ាន់ម៉ាធ្លាក់ចុះរួចស្រាប់ទៅហើយ។ ក្នុងរយៈពេល ៦ ខែ ដើមឆ្នាំនេះ ពាណិជ្ជកម្មទ្វេភាគីមានចំនួនសរុប ១០៥,១ ប៊ីលាន​បាត ដោយធ្លាក់ចុះ ២៤,៩ ភាគរយ ធៀប​នឹ​ងរយៈពេលដូចគ្នាកាលពីឆ្នាំមុន។ ​នឹងឆ្នាំមុន។ ការនាំចេញរបស់ថៃ បានធ្លាក់ចុះ ១៦,៣ ភាគរយ មកនៅត្រឹម ៦៣,៥ ប៊ីលាន​បាត។​ មែនទែនទៅ ច្រក Mae Sot រួមចំណែកពាណិជ្ជកម្មធំជាងគេបំផុត ក្នុងទំហំប្រមាណ ៤៥,៥ ប៊ីលាន​បាត​៕

​

​

​