ព័ត៌មានអន្ដរជាតិ

ឥណ្ឌូណេស៊ីព្យាករពីអតិរេកផលិតកម្មស្រូវជាង ៣ លានតោនឆ្នាំនេះ ដោយមិនចាំបាច់នាំចូល

បានផុស

៩ ខែ មុន

នៅ

ថ្ងៃសុក្រ ១២ កញ្ញា ២០២៥

ដោយ

អនុរដ្ឋមន្ត្រីក្រសួងកសិកម្មឥណ្ឌូណេស៊ី លោក Sudaryono បានបញ្ជាក់ថា ផលិតកម្មស្រូវជាតិនៅឆ្នាំ ២០២៥ រំពឹងថានឹងកើនលើសតម្រូវការ ៣,៥ លានតោន ដែលធានាបាននូវការផ្គត់ផ្គង់ក្នុងស្រុកគ្រប់គ្រាន់ ដោយមិនចាំបាច់នាំចូលរហូតដល់ដំណាច់ឆ្នាំ។ នេះបើតាមការចុះផ្សាយរបស់ភ្នាក់ងារសារព័ត៌មានរដ្ឋ Antara។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឱ្យដឹងយ៉ាងដូច្នេះអំឡុងពេលបើកសិក្ខាសាលាថ្នាក់ជាតិរបស់និស្សិតកសិកម្មកាលពីថ្ងៃពុធ ដោយស្រង់ទិន្នន័យព្យាករត្រឹមដំណាច់ខែធ្នូ ឆ្នាំ ២០២៥ របស់ស្ថិតិឥណ្ឌូណេស៊ី (BPS)។ លោកនិយាយថា៖ «ប្រសិនបើអ្វីៗដំណើរការដូចការគ្រោងទុក យើងនឹងមិនចាំបាច់នាំចូលអង្ករនៅឆ្នាំនេះទេ»។

លោក Sudaryono បានបន្តយ៉ាងដូច្នេះថា៖ «ផ្អែកលើការគណនាបឋម ទិន្នផលស្រូវនៅឆ្នាំនេះនឹងមានចំនួនប្រហែល ៣៣-៣៤ លានតោន ជាមួយនឹងអតិរេកជាង ៣ លានតោន ស្របតាមការព្យាករណ៍»។

កាលពីចុងខែធ្នូ ឆ្នាំមុន រដ្ឋមន្ត្រីក្រសួងកសិកម្មឥណ្ឌូណេស៊ី Andi Amran Sulaiman បានប្រកាសថា ផលិតកម្មស្រូវក្នុងស្រុកសរុប បានកើនលើសពី ៣០ លានតោន គិតត្រឹមឆ្នាំ។

លោក Sudaryonoបានកត់សម្គាល់ថា ការដាំស្រូវកាន់តែច្រើន សក្ដានុពលនៃការប្រមូលផលកាន់តែខ្លាំង ដោយនិន្នាការផលិតកម្មនឹងកើនឡើងធៀបនឹងឆ្នាំមុនៗ។ កត្តាជាច្រើនបានជួយជំរុញកំណើននេះ រួមមានការប្រើប្រាស់គ្រឿងយន្តកសិកម្មទំនើប ការចែកចាយជីដោយរលូន ការស្រោចស្រពប្រកបដោយប្រសិទ្ធភាពតាមរយៈប្រព័ន្ធបូមទឹក និងលក្ខខណ្ឌអាកាសធាតុអំណោយផលសម្រាប់សកម្មភាពធ្វើស្រែចម្ការ។

គួរគូសបញ្ជាក់ថា កន្លងមក រដ្ឋាភិបាលឥណ្ឌូណេស៊ីរបស់លោកប្រធានាធិបតី ប្រាបូវូ ស៊ូប៊ីយ៉ានតូ បានប្ដេជ្ញាជំរុញផលិតកម្មស្រូវក្នុងស្រុក ដើម្បីផ្គត់ផ្គង់តម្រូវការក្នុងស្រុកដោយខ្លួនឯងឱ្យគ្រប់គ្រាន់ ហើយមិនចាំបាច់នាំចូល។ ការណ៍នេះរួមចំណែកយ៉ាងសំខាន់ដល់ការធ្លាក់ចុះនៃតម្លៃអង្ករអន្តរជាតិ រាប់តាំងពីដើមឆ្នាំមក៕