របរចិញ្ចឹមកន្ធាយ នៅតែមានទីផ្សារល្អ ខណៈ១គីឡូ អាចលក់បាន១៥ដុល្លារ

កសិដ្ឋានចិញ្ចឹមកន្ធាយ​ក្នុងខេត្តព្រៃវែងមួយ នៅតែរក្សាបានទីផ្សារបានយ៉ាងល្អ ខណៈអាចលក់ចេញទៅកាន់ទីផ្សារបានចន្លោះពី ១០ដុល្លារ ទៅ ១៥ដុល្លារ ក្នុង១គីឡូក្រាម។

ជាម្ចាស់កសិដ្ឋានចិញ្ចឹមកន្ធាយខ្មែរ ស្ថិតនៅស្រុកកំចាយមារ ខេត្តព្រៃវែង លោក ចន បូរិន ប្រាប់ កម្ពុជាថ្មី ថា បច្ចុប្បន្នរបរចិញ្ចឹមកន្ធាយនៅក្នុងកសិដ្ឋានរបស់លោក នៅតែរក្សាបានទីផ្សារយ៉ាងល្អ ខណៈនៅលើទីផ្សារអាចលក់ចេញបានចន្លោះពី ១០ដុល្លារ ទៅ១៥ដុល្លារ ក្នុង១គីឡូក្រាម។

លោក បន្តថា មូលហេតុដែលកន្ធាយនៅតែមានទីផ្សារខ្ពស់ នេះក៏ព្រោះតែនៅតាមបណ្ដាភោជនីយដ្ឋាន ពិសេសនៅតាមផ្សារទំនើបនានានៅតែត្រូវការប្រភេទកន្ធាយចិញ្ចឹមយកទៅលក់បន្តជាប្រចាំ។ ក្រៅពីនេះ បច្ចុប្បន្ន លោក បូរិន មើលឃើញថា ប្រជាជនខ្មែរមួយចំនួនធំ ក៏និយមបរិភោគសាច់កន្ធាយដែលចិញ្ចឹមតាមកសិដ្ឋានច្រើនជាងពេលកន្លងទៅ។

បូរិន បានឱ្យដឹងទៀតថា មួយរយៈពេលចុងក្រោយដែលប្រទេសកម្ពុជាមានជម្លោះរឿងព្រំដែនជាមួយថៃនេះ ប្រជាជនខ្មែរទាំងចាស់ទាំងក្មេង បានមកងាកមកគាំទ្រផលិតផលខ្មែរស្ទើរតែទាំងស្រុង ដែលនេះអាចចាត់ទុកថាជាការលើកទឹកចិត្តដល់ម្ចាស់កសិដ្ឋាន និងសិប្បកម្ម សហគ្រាសក្នុងស្រុកផ្សេងៗទៀត អាចមានលទ្ធភាពខ្ពស់ក្នុងការផលិតសម្រាប់ផ្គត់ផ្គង់សម្រាប់ទីផ្សារក្នុងស្រុកបានផងដែរ។

សម្រាប់ពេលបច្ចុប្បន្ននេះ កសិដ្ឋានរបស់អតីតពលករធ្វើការនៅប្រទេសថៃមួយនេះ កំពុងតែដំណើរការយ៉ាងល្អ ក្នុងការចិញ្ចឹមកន្ធាយ កង្កែប និងពស់ចាស់ល្មម សុទ្ធសឹងតែជាប្រភេទសត្វចិញ្ចឹមដែលកំពុងមានទីផ្សារល្អ នាពេលប​ច្ចុប្បន្ននេះ។

យ៉ាងណាមិញ លោក ចន បូរិន ក៏សូមលើកទឹកចិត្តដល់ប្រជាជនខ្មែរ ពិសេសអតីតពលករខ្មែរ ដែលត្រឡប់មកពីធ្វើការនៅប្រទេសថៃ ប្រសិនបើអាចសុំចាប់យករបរចិញ្ចឹមកន្ធាយ កង្កែប ឬក៏មាន់ទា តាមដែលអាចធ្វើទៅបាន គ្រាន់ទុកជាមុខរបរបន្ទាប់បន្សំមួយទៀត នឹងក៏អាចរកចំណូលពីការចិញ្ចឹមសត្វទាំងនេះ បានផងដែរ។

គួរឱ្យដឹងថា កសិដ្ឋានចិញ្ចឹមកន្ធាយខ្មែរ របស់លោក ចន បូរិន បានបើកដំណើរតាំងពីឆ្នាំ ២០១៨មកម្ល៉េះ។ បច្ចុប្បន្នកសិដ្ឋានមានទីតាំងស្ថិតនៅគីឡូម៉ែត្រលេខ ១១៥ តាមបណ្ដាផ្លូវជាតិលេខ៨ ស្រុកកំចាយមារ ខេត្តព្រៃវែង៕

អត្ថបទ ៖ សួស សិត