រងគ្រោះខ្លាំងរាល់ថ្ងៃ ពេលនេះ ឥណ្ឌា ក្លាយជាប្រទេសទី ៤ មានអ្នកស្លាប់ដោយកូវីដច្រើនជាងគេលើលោក

ខណៈករណីឆ្លងជំងឺកូវីដ ១៩ កំពុងកើនឡើងកាន់តែធ្ងន់ធ្ងរបំផុតនោះ ប្រទេសឥណ្ឌា ក៏មានអ្នកស្លាប់ដោយសារជំងឺនេះលើស ២០០,០០០ នាក់ផងដែរ កាលពីថ្ងៃពុធ ហើយបានក្លាយជាប្រទេសទី ៤ មានអ្នកស្លាប់ច្រើនជាងគេលើពិភពលោក ។

បើយោងតាមសាកលវិទ្យាល័យ Johns Hopkins បានឲ្យដឹងថា ចាប់តាំងពីពាក់កណ្តាលខែមីនា ករណីឆ្លងនៅក្នុងប្រទេសឥណ្ឌាបានកើតឡើងយ៉ាងគំហុក ខណៈមានករណីឆ្លងជាង ៣៦០,០០០ ករណីត្រូវបានរាយការណ៍កាលពីថ្ងៃអង្គារ ដែលជាចំនួនឆ្លងខ្ពស់បំផុតក្នុងរយៈពេលមួយថ្ងៃ សម្រាប់ប្រទេសឥណ្ឌា ។

ចាប់តាំងពីការចាប់ផ្តើម នៃជំងឺរាតត្បាត ប្រទេសឥណ្ឌា មានករណីឆ្លងលើស ១៨ លានករណី ដែលច្រើនជាងប្រទេសដទៃទៀត លើកលែងតែសហរដ្ឋអាមេរិកមួយប៉ុណ្ណោះ ។ ចំណែកចំនួនអ្នកស្លាប់នៅឥណ្ឌា បច្ចុប្បន្នមានជាង ២០៤,០០០ នាក់ ដែលជាចំនួនខ្ពស់បំផុតទី ៤ នៅលើពិភពលោក បន្ទាប់ពីសហរដ្ឋអាមេរិក មានជាង ៥៨៨,០០០ នាក់, ប្រេស៊ីល ជាង ៣៩៨,០០០ នាក់ និងម៉ិកស៊ិក មានជាង ២១៥,៥០០ នាក់ ។

ទន្ទឹមនោះក្រុមមន្រ្តីនៅទីក្រុង Delhi, Mumbai, Pune, Surat និងទីក្រុង Bangalore បានដាក់ការបិទខ្ទប់យ៉ាងតឹងរ៉ឹង លើទីក្រុងទាំងនោះ ។ កង្វះអុកស៊ីសែន និងការផ្គត់ផ្គង់វេជ្ជសាស្ត្រ កំពុងក្លាយជាបញ្ហាប្រឈម ក្នុងចំណោមប្រព័ន្ធសុខាភិបាល នៅក្នុងប្រទេសឥណ្ឌា ។

ស្របពេលជាមួយគ្នានេះ រដ្ឋបាលរបស់លោកនាយករដ្ឋមន្រ្តី Narendra Modi បាននិយាយកាលពីថ្ងៃពុធថា ខ្លួនបានទិញអុកស៊ីសែនបន្ថែមទៀត ពីមូលនិធិ Cares ។ ក្រុមមន្រ្តីនិយាយថា ពេលនេះវិធានការណ៍ចាំបាច់របស់យើង ដើម្បីធ្វើឲ្យប្រសើរឡើង ក្នុងការគ្រប់គ្រងជំងឺកូវីដ ១៩ គឺការផ្គត់ផ្គង់អុកស៊ីសែនរបស់មន្ទីរពេទ្យ ៕

ប្រែសម្រួលដោយ ៖ ជីវ័ន្ត

ប្រភព ៖ UPI

ចុចអាន ៖ ក្រុមហ៊ុនល្បីឈ្មោះមួយចេញមុខអះអាងថា វ៉ាក់សាំងរបស់ខ្លួនអាចយកឈ្នះវីរុសបំប្លែងខ្លួន ឥណ្ឌា

ចុចអាន ៖ មើលវីដេអូនេះកាន់តែខ្លោចចិត្ត! ឡានពេទ្យឥណ្ឌា ដល់ថ្នាក់ដឹកសពធ្លាក់តាមផ្លូវ រីឯអ្នកស្លាប់ត្រូវអូសយកទៅដុត ព្រោះអស់ហ្វ្រង់ការដាក់