កូវីដ-១៩

ខេត្តកណ្តាលរកឃើញអ្នកពាក់ព័ន្ធ ក្នុងព្រឹត្តិការណ៍សហគមន៍២០កុម្ភៈកើនឡើងដល់ ជិត៤ម៉ឺននាក់

បានផុស

៥ years មុន

នៅ

ថ្ងៃសុក្រ ៧ ឧសភា ២០២១

ដោយ

គិតត្រឹមថ្ងៃទី៦ ខែឧសភា ឆ្នាំ២០២១នេះ ខេត្តកណ្តាលមានអ្នកពាក់ព័ន្ធផ្ទាល់និងប្រយោលទៅនឹងព្រឹត្តិការណ៍សហគមន៍២០កុម្ភៈចំនួនជិត៤ម៉ឺននាក់ ក្នុងនោះមានអ្នកវិជ្ជមានកូវីដ១៩ ជិត២ពាន់នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល បានមានប្រសាសន៍នៅព្រឹកថ្ងៃទី៧ឧសភាថា ខេត្តកណ្តាលមានអ្នកជាប់ពាក់ព័ន្ធព្រឹត្តិការណ៍សហគមន៍២០កុម្ភៈចំនួន៣៦៥៨៧នាក់ ក្នុងនោះមានវិជ្ជមានកូវីដ១៩ ចំនួន១៨៥៦នាក់ ជាសះស្បើយចំនួន៦០០នាក់ អ្នកជំងឺកំពុងសម្រាកពេទ្យចំនួន១២៥៦នាក់ និងអ្នកស្លាប់បាត់ជីវិតចំនួន៥នាក់ ក្នុងនោះស្លាប់នៅពេទ្យរុស្សីចំនួន២នាក់ និងនៅមន្ទីរពេទ្យបង្អែក ក្រុងតាខ្មៅចំនួន៣នាក់។ អ្នកកំពុងធ្វើចត្តាឡីស័ក នៅតាមមណ្ឌលចំនួន១៤៣៩នាក់ និងកំពុងធ្វើចត្តាឡីស័ក នៅតាមផ្ទះចំនួន១៨០៣២នាក់។

លោកបានបន្តទៀតថា ចំណែកអ្នកដែលបានបញ្ចប់ការធ្វើចត្តាឡីស័កវិញ មានចំនួន១៧១១៦នាក់ ក្នុងនោះនៅមណ្ឌលចំនួន៤២៩៦នាក់ និងនៅតាមផ្ទះចំនួន១២៨២០នាក់។ លោកបានបន្ថែមថា បច្ចុប្បន្ននេះ ខេត្តកណ្តាលមានមណ្ឌលព្យាបាលជំងឺកូវីដ១៩ ប្រមាណជិត២០កន្លែង ក្នុងនោះនៅស្រុកអង្គស្នួល បានបង្កើតកន្លែងព្យាបាលចំនួន៥កន្លែង ដោយសារមានឆ្លងករណីជំងឺកូវីដច្រើន រហូតដល់ទៅជាង៥៥០នាក់។

គួរបញ្ជាក់ថា ព្រឹត្តិការណ៍សហគមន៍២០កុម្ភៈនេះ ខេត្តកណ្តាលជាខេត្តជាប់លំដាប់ថ្នាក់ទី៣បន្ទាប់ពីរាជធានីភ្នំពេញ និងខេត្តព្រះសីហនុ ដែលមានអ្នកឆ្លងជំងឺកូវីដ១៩ច្រើនជាងគេ។ គិតត្រឹមព្រឹកថ្ងៃទី០៧ ខែឧសភា ឆ្នាំ២០២១ កម្ពុជាមានអ្នកឆ្លងកូវីដ១៩ សរុបចំនួន១៨១៧៩នាក់ អ្នកជាសះស្បើយចំនួន៦៨៨៤ នាក់និងអ្នកស្លាប់ចំនួន១១៤នាក់៕

អត្ថបទ៖ សំអឿន

សូមចុចអាន៖ ខេត្តព្រះសីហនុ ប្រកាសអ្នកឆ្លងថ្មី រយៈពេល ២៤ ម៉ោង

Related Topics:ខេត្តកណ្ដាល