ក្នុងចំណោម៥រោងចក្រនៅអង្គស្នួល ជាបឋមរកឃើញកម្មករ២នាក់វិជ្ជមានកូវីដ-១៩

ខេត្តកណ្តាល៖ រដ្ឋបាលខេត្តកណ្ដាលបានប្រកាសថា កម្មកររោងចក្រ២នាក់វិជ្ជមានកូវីដ-១៩ ក្នុងចំណោម៥រោងចក្រ នៅស្រុកអង្គស្នួល។​

រដ្ឋបាលខេត្តកណ្ដាលបានឱ្យដឹងថា ព្រឹកនេះលទ្ធផល ទទួលបានគឺវិជ្ជមាន០២នាក់ នឹងបញ្ជូនទៅសម្រាកព្យាបាលនៅ មណ្ឌលព្យាបាលវិទ្យាល័យ ថ្នល់ទទឹង ក្នុងស្រុកអង្គស្នួល ខេត្តកណ្តាល។

រោងចក្រទាំង៥នោះរួមមាន រីជេន ហូលីវ៉ែល ញ៉ូវអាយឃីត ម៉ាស្ទ័រ និង ហ្រ្វែង សឹងរោចក្រ ប៉ូវឃ័រ។

គួរបញ្ជាក់ថា កាលព្រឹកថ្ងៃទី០៩ ខែឧសភា ឆ្នាំ២០២១ លោក នៃ ចារី អភិបាលរងខេត្តកណ្ដាល និងលោក ខុន សេរីរដ្ឋា អភិបាលស្រុកអង្គស្នួល បានចុះពិនិត្យការយកសំណាករបស់កម្មករ ចំនួន៧៨នាក់ ដើម្បីយកសំណាកធ្វើតេស្តរកវីរុសកូវីដ-១៩ តាមរយៈឧបករណ៍ រ៉ាភីដ តេស (Rapid Test) ដែលមកពីរោចក្រចំនួន០៥ក្នុងស្រុកអង្គស្នួល ខេត្តកណ្តាល ក្នុងបរិវេណ អនុវិទ្យាល័យ បែកចាន។

កម្មករ ដែលបានយកសំណាករួច ហើយលទ្ធផលអវិជ្ជមាន នឹងត្រូវអនុញ្ញាតឱ្យធ្វើចត្តាឡីស័កនៅផ្ទះ ចំណែកអ្នកទទួលបានលទ្ធផលវិជ្ជមាននឹងត្រូវបញ្ជូនទៅមណ្ឌលព្យបាលវិទ្យាល័យ ថ្នល់ទទឹង ក្នុងស្រុកអង្គស្នួល ខេត្តកណ្តាល៕

អត្ថបទ៖ ច័ន្ទ វីរៈ