កូវីដ-១៩

អាជ្ញាធរខេត្តកណ្ដាលបន្តដាក់ភូមិចំនួន២ នៃឃុំបែកចានជាតំបន់លឿង

បានផុស

៥ years មុន

នៅ

ថ្ងៃសៅរ៍ ២៩ ឧសភា ២០២១

ដោយ

អាជ្ញាធរខេត្តកណ្ដាលបានបន្តដាក់វិធានការរដ្ឋបាលផ្នែកខ្លះនៃភូមិសាស្ត្រភូមិស្វាយជ្រុំនិងភូមិអណ្ដូងនៅឃុំបែកចានស្រុកអង្គស្នួលជាតំបន់លឿងរយៈពេល៧ថ្ងៃជាបន្តទៀតដើម្បីទប់ស្កាត់ការឆ្លងរាលដាលនៃជំងឺកូវីដ ១៩។

លោក គង់ សោភ័ណ្ឌ អភិបាលខេត្តកណ្តាលបានឲ្យដឹងនៅក្នុងសេចក្តីជូនដំណឹងថា « ត្រូវបន្តអនុវត្តវិធានការរដ្ឋបាលសម្រាប់ផ្នែកខ្លះនៃភូមិសាស្ត្រភូមិស្វាយជ្រុំនិងភូមិអណ្ដូងនៅឃុំបែកចានស្រុកអង្គស្នួលខេត្តកណ្ដាលដោយត្រូវកំណត់ជាតំបន់រឿង ដើម្បីទប់ស្កាត់ការឆ្លងរាលដាល នៃជំងឺកូវីដ ១៩ រយៈពេល៧ ថ្ងៃបន្តទៀតគិតចាប់ពីថ្ងៃទី២៩ ខែឧសភាឆ្នាំ២០២១រហូតដល់ថ្ងៃទី០៤ ខែមិថុនាឆ្នាំ២០២១»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អភិបាលខេត្តបានបន្តថា ក្នុងនោះកំណត់ជាតំបន់លឿងផ្នែកខ្លះភូមិស្វាយជ្រុំលើកលែងផ្នែកខ្លះនៃប៉ែកខាងជើងចាប់ពីផ្លូវចូលភូមិផ្នែកខាងកើតជាប់ផ្លូវជាតិលេខ៤ស្ថិតនៅក្នុងភូមិស្វាយជ្រុំឃុំបែកចានស្រុកអង្គស្នួលខេត្តកណ្ដាល និងផ្នែកខ្លះនៃភូមិអណ្ដូងលើកលែងផ្នែកខ្លះនៃប៉ែកខាងត្បូងចាប់ពីផ្លូវបេតុងកែងនិងដេប៉ូតេលាស្ថិតក្នុងភូមិអណ្ដូងឃុំបែកចាន ស្រុកអង្គស្នួលខេត្តកណ្ដាល។

លោក អភិបាលខេត្ត បានបន្តទៀតថា ក្នុងអំឡុងពេលនៃការអនុវត្តវិធានការរដ្ឋបាលបន្តចំពោះការកំណត់ផ្នែកខ្លះនៃភូមិសាស្ត្រភូមិស្វាយជ្រុំនិងភូមិអណ្ដូងឃុំបីចានស្រុកអង្គស្នួលខេត្តកណ្ដាលជាតំបន់លឿងត្រូវអនុលោមតាមប្រកាសកាលពីថ្ងៃទី៣០ ខែមេសាឆ្នាំ ២០២១ របស់រដ្ឋបាលខេត្តកណ្ដាល។

ក្រៅពីនេះអាជ្ញាធរខេត្តកណ្តាលបានបិទខ្ទប់ផ្នែកខ្លះនៃភូមិសាស្រ្តភូមិថ្មី ភូមិព្រែកតាទួន និងភូមិពាមរាំងលើ នៃឃុំពាមរាំង ស្រុកលើកដែក ខេត្តកណ្ដាល ត្រូវបានកំណត់ជា ”តំបន់ក្រហម” “តំបន់លឿងទុំ” និង “តំបន់លឿង” ។

បន្តដាក់ភូមិមួយចំនួនទៀតជាតំបន់ក្រហមនិងតំបន់លឿងទុំដូចជានៅភូមិជ្រៃធំឃុំសំពៅពូនស្រុកកោះធំរយៈពេល១៤ថ្ងៃចាប់ពីថ្ងៃទី២២ឧសភាដល់ថ្ងៃទី៤មិថុនា។ដាក់ផ្នែកខ្លះនៃភូមិព្រែករ័ត្ននិងភូមិពោធិបាននៃឃុំពោធិបានស្រុកកោះធំរយៈពេល១៤ថ្ងៃចាប់ពីថ្ងៃទី២១ឧសភាដល់ថ្ងៃទី៣មិថុនា។

ដាក់ភូមិចំនួន៤នៃឃុំបែកចាននិងភូមិចំនួន៤នៃឃុំបែបចានរួមមានភូមិស្វាយជុំ ភូមិ អណ្តូង ភូមិ ពងទឹកនិងភូមិត្នោតម្ពើម និងភូមិ ព្រៃពពាល ឃុំពើកនៃស្រុកអង្គស្នួលជាតំបន់លឿងទុំនិងតំបន់លឿងរយៈពេល៧ថ្ងៃចាប់ពីថ្ងៃទី២២ រហូតដល់ថ្ងៃទី២៨ខែឧសភាឆ្នាំ២០២១នេះ។

គួរបញ្ជាក់ថា គិតត្រឹមព្រឹកថ្ងៃទី២៩ឧសភានេះ ខេត្តកណ្ដាលមានអ្នកឆ្លងជំងឺកូវីដ ១៩សរុបចំនួន ៣,៥៣៥ នាក់អ្នកជាសះស្បើយចំនួន ២,១៥០ នាក់ អ្នកជំងឺកំពុងសម្រាកពេទ្យចំនួន១៣៨៥នាក់៕

សំអឿន