ខ្សែភាពយន្ត “The Crown” ក្លាយជាភាពយន្តមានអ្នកទស្សនាច្រើនជាងគេបំផុតក្នុងតារាងកំពូលទាំង ១០ របស់ Netflix បន្ទាប់ពីម្ចាស់ក្សត្រី អេលីហ្សាប៊ែត ទី២ សោយទិវង្គត។

ស៊េរី​រឿងភាគ “The Crown” បានកើនប្រជាប្រិយភាពខ្លាំងក្លាជាថ្មីម្ដងទៀត និង​កំពុងជាប់ចំណាត់​​ថ្នាក់​ទី៧ ក្នុងបញ្ជីកំពូលទាំង១០ ដោយមាន​អ្នក​ចូល​មើលសរុប ១៧.៦លាន​ម៉ោង ត្រឹមប៉ុន្មានថ្ងៃ ក្រោយមហាក្សត្រី ​អេលីហ្សាប៊ែត ទី២ យាងចូលទិវង្គត។ ក្នុងនោះចំនួនអ្នកទស្សនានៅចក្រភពអង់គ្លេសបានកើនឡើងជាង ៨០០ភាគរយ ខណៈនៅសហរដ្ឋអាមេរិកក៏កើនឡើងខ្ពស់មិនធម្មតាដែរ។

“The Crown” ជាខ្សែភាពយន្តរៀបរាប់អំពីជីវិតរបស់ព្រះមហាក្សត្រីចក្រភពអង់គ្លេសអស់ជាច្រើនទសវត្សរ៍ ដោយរដូវកាលទី១ ចាប់ផ្តើមពីចុងទសវត្សរ៍ឆ្នាំ ១៩៤០ មុនពេលព្រះបិតារបស់ទ្រង់គឺស្ដេច George VI សោយទិវង្គត ហើយព្រះនាងបានឡើងសោយរាជ្យបន្តក្នុងឆ្នាំ ១៩៥២។

ចំពោះ “The Crown” រដូវកាលទី៤ រៀបរាប់ពីការរៀបអភិសេករបស់ស្តេច Charles និងព្រះនាង Diana ។ រីឯរដូវកាលទី ៥ វិញគ្រោងនឹងចាក់បញ្ចាំងនៅខែវិច្ឆិកា ឆ្នាំ២០២២ នេះ។ ក្នុងនោះ តារាស្រី Imelda Staunton នឹងដើរតួជាម្ចាស់ក្សត្រី Elizabeth តារាសម្ដែងលោក Jonathan Pryce នឹងសម្តែងជាព្រះអង្គម្ចាស់ Philip លោក Dominic West នឹងសម្តែងជាព្រះអង្គម្ចាស់ Charles និង Elizabeth Debicki សម្តែងជាព្រះនាង Diana ។

ដោយឡែក រឿង “The Crown” រដូវកាលទី៦ បច្ចុប្បន្នបានផ្អាកការផលិតបណ្ដោះអាសន្ន ដោយសារការសោយទិវង្គតរបស់ម្ចាស់ក្សត្រី៕

ប្រែសម្រួល៖ សន្យា

ចុចអាន៖ ព្រះរាជជីវប្រវត្តិម្ចាស់ក្សត្រិយានី Elizabeth ទី២, ព្រះមហាក្សត្រគ្រងរាជ្យយូរបំផុតរបស់ ចក្រភពអង់គ្លេស (មានវីដេអូ)

ចុចអាន៖ Nicki Minaj ខឹងសម្បារលើអ្នកសរសេរប្លុកម្នាក់ រឿងបរិហារកេរ្ត៍នាងថាជាមនុស្សញៀនថ្នាំ