Connect with us

KPT+

ព្រះរាជជីវប្រវត្តិម្ចាស់ក្សត្រិយានី Elizabeth ទី២, ព្រះមហាក្សត្រគ្រងរាជ្យយូរបំផុតរបស់ ចក្រភពអង់គ្លេស (មានវីដេអូ)

បានផុស

នៅ

ព្រះបរមរាជវាំង Buckingham បានប្រកាសថា ម្ចាស់ក្សត្រិយានី Elizabeth ទី២ បានសោយទិវង្គតក្នុងព្រះជន្មាយុ ៩៦ព្រះវស្សា។ រជ្ជកាល​របស់ទ្រង់​មាន​រយៈពេល ៧០ ឆ្នាំ ដែល​ធ្វើ​ឲ្យព្រះនាង​ក្លាយជា​ស្តេចគ្រងរាជសម្បត្តិរបស់ចក្រភពអង់គ្លេស ​យូរ​បំផុតនៅ​ក្នុង​ប្រវត្តិសាស្ត្រ។

ព្រះនាង Elizabeth Alexandra Mary ប្រសូតក្នុងឆ្នាំ១៩២៦ ហើយបានឡើងសោយរាជ្យនៅឆ្នាំ ១៩៥២ ក្នុងព្រះជន្មាយុ ២៥ព្រះវស្សាបន្ទាប់ពីការសោយទិវង្គតរបស់ព្រះបិតាគឺ ស្តេច George ទី៦។

ព្រះនាងប្រសូតក្នុងតំបន់ Mayfair កណ្តាលទីក្រុងឡុងដ៍ មានព្រះបិតាព្រះនាម George ទី៦ និងព្រះមាតាព្រះនាម Elizabeth។

ព្រះនាង Elizabeth Alexandra Mary ប្រសូតក្នុងឆ្នាំ១៩២៦

ព្រះនាងមានព្រះជន្មត្រឹមតែ ១៣ ព្រះវស្សាប៉ុណ្ណោះនៅពេលផ្ទុះសង្រ្គាមលោកលើកទីពីរហើយត្រូវបានជម្លៀសចេញពីរាជធានី។ ក្នុងឆ្នាំ១៩៤៥ នៅព្រះជន្ម ១៨ព្រះវស្សា ព្រះនាងបានចុះឈ្មោះនៅក្នុងសេវាកម្មដែនដីជំនួយ (ATS) ដែលជាសាខានារីរបស់កងទ័ពចក្រភពអង់គ្លេសក្នុងអំឡុងពេលសង្រ្គាម ហើយបានបម្រើរហូតដល់ចុងបញ្ចប់នៃជម្លោះ។

នៅឆ្នាំ ១៩៤៧ ព្រះនាងបានរៀបអភិសេកជាមួយព្រះអង្គ Philip Mountbatten ដែលជាអតីតព្រះអង្គម្ចាស់នៃប្រទេសក្រិក និងដាណឺម៉ាក។ ព្រះមហាក្សត្រិយានី និងព្រះស្វាមី ដែលសោយទិវង្គតក្នុងព្រះជន្មាយុ៩៩ព្រះវស្សា ក្នុងខែមេសា ឆ្នាំ២០២១ មានបុត្រ៤អង្គគឺ Charles, Anne, Andrew និង Edward ហើយមានព្រះរាជនត្តា៨អង្គ។

ព្រះនាង Elizabeth រៀបអភិសេកជាមួយព្រះអង្គ Philip Mountbatten នៅឆ្នាំ ១៩៤៧

ការឡើងគ្រងរាជ្យរបស់ព្រះនាង Elizabeth នៅថ្ងៃទី២ខែមិថុនា ឆ្នាំ១៩៥៣ ត្រូវបានទស្សនាដោយមនុស្សចំនួន២៧លាននាក់នៅត្រឹមតែក្នុងចក្រភពអង់គ្លេស ហើយត្រូវបានគេចាត់ទុកថា ជាសារសំខាន់ក្នុងការជំរុញប្រជាប្រិយភាពរបស់ទូរទស្សន៍នៅក្នុងប្រទេស។ គ្រាន់តែព្រឹត្តិការណ៍នេះ ​ចំនួន​អាជ្ញាប័ណ្ណ​ទូរទស្សន៍​នៅ​ចក្រភព​អង់គ្លេសបាន​កើន​ឡើង​ដល់​បី​លាន។ នោះ​ជា​លើក​ទី​មួយ​ហើយ​ដែល​ពិធី​ឡើង​គ្រង​រាជ្យ​ត្រូវ​បាន​ ផ្សាយ​តាម​ទូរទស្សន៍។

ការឡើងគ្រងរាជ្យរបស់ព្រះនាង Elizabeth នៅថ្ងៃទី២ខែមិថុនា ឆ្នាំ១៩៥៣

បន្ទាប់ពីការសោយទិវង្គតរបស់ព្រះបិតា ព្រះនាង Elizabeth បានក្លាយជារាជាធិបតេយ្យ មិនត្រឹមតែនៅចក្រភពអង់គ្លេសប៉ុណ្ណោះទេ ប៉ុន្តែក៏នៅប្រទេសឯករាជ្យចំនួនប្រាំមួយផ្សេងទៀតផងដែរដូចជា កាណាដា អូស្ត្រាលី នូវែលសេឡង់ អាហ្វ្រិកខាងត្បូង ប៉ាគីស្ថាន និងស៊ីឡន (ស្រីលង្កា) ព្រមទាំងជាប្រមុខនៃ Commonwealth។ ទោះនៅពេលដែលមរតកអាណាចក្រត្រូវធ្លាក់ចុះក៏ដោយ ចក្រភពអង់គ្លេសនៅតែគ្រប់គ្រងទឹកដីជាង៧០នៅក្រៅប្រទេស។ ក្នុងឆ្នាំ២០២២ ព្រះមហាក្សត្រិយានីនៅតែជាប្រមុខរដ្ឋសម្រាប់ប្រទេសចំនួន១៥រួមទាំងចក្រភពអង់គ្លេសផងដែរ។

ព្រឹត្តិការណ៍ធំៗដែលកើតឡើងក្នុងរជ្ជកាលរបស់ព្រះនាងមានដូចជា ការចូលជាសមាជិកសហភាពអឺរ៉ុបរបស់ចក្រភពអង់គ្លេស, ការដកខ្លួនចេញពីសហភាពអឺរ៉ុប និងការផ្លាស់ប្តូរនយោបាយសំខាន់ៗដូចជាការវិវឌ្ឍន៍នៃអំណាចនៅក្នុងចក្រភពអង់គ្លេស និងបញ្ហានៅអៀរឡង់ខាងជើងជាដើម។

ព្រះអង្គ Louis Mountbatten ត្រូវបានសម្លាប់ក្នុងឆ្នាំ ១៩៧៩

បងប្អូនជីដូនមួយរបស់ព្រះមហាក្សត្រិយានី គឺព្រះអង្គ Louis Mountbatten ត្រូវបានសម្លាប់ក្នុងឆ្នាំ ១៩៧៩ រួមជាមួយមនុស្សបីនាក់ទៀត នៅពេលដែលគ្រាប់បែក IRA បានបំផ្ទុះព្រះទីន័ងនាវារបស់ទ្រង់នៅឯឆ្នេរសមុទ្រ Co. Sligo ក្នុងប្រទេសអៀរឡង់។

ក្នុង​នាម​ជា​ប្រមុខរដ្ឋ មហាក្សត្រិយានី Elizabeth ​ត្រូវ​បាន​បម្រើ​ដោយ​នាយក​រដ្ឋមន្ត្រី​ចំនួន ១៥ រូប ដែល​ដំបូង​គេ​គឺលោក Sir Winston Churchill និង​ចុងក្រោយ​គឺលោកស្រី Liz Truss។

ការសោយទិវង្គតរបស់មហាក្សត្រិយានី Elizabeth បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីព្រះនាងតែងតាំងលោកស្រី Truss ជានាយករដ្ឋមន្ត្រីចក្រភពអង់គ្លេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ មហាក្ស ត្រិយានី Elizabeth ទី២ សោយទិវង្គត ក្នុងព្រះជន្មាយុ ៩៦ ព្រះវស្សា

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម