តារាសម្ដែង Weir បន្តផ្អាកការងារសិល្បៈ ព្រោះរវល់មើលថែកូនស្រី

ទោះបីកូនស្រីដំបូងមានអាយុជាង ៣ខែហើយក្ដី Weir Sukollawat នៅតែមិនដាច់ចិត្តទុកប្រពន្ធកូនចោល ដោយលោកបន្តប្រកាសផ្អាកការងារសិល្បៈបន្ថែមទៀត ដើម្បីទុកពេលថែទាំគ្រួសារឱ្យបានគ្រប់គ្រាន់។

ក្រោយដឹកដៃគ្នាចូលរោងការជាង ៥ខែ កាលពីព្រឹកថ្ងៃទី១៩ ខែធ្នូ ឆ្នាំ២០២២កន្លងទៅ ភរិយាតារាសម្ដែង Weir បានសម្រាលកូនស្រីដំបូង ដែលទារិកាតូចមានឈ្មោះថា​ Wylyn ។ មកទល់នឹងពេលនេះ Wylyn មានអាយុជាង ៣ខែហើយ ប៉ុន្តែបើនិយាយចំពោះ Weir លោកមិនអាចទុកកូនស្រីឱ្យភរិយាសំណព្វមើលថែតែឯងបានទេ ដោយលោកនឹងមិនទាន់វិលចូលសិល្បៈវិញឡើយ ដរាបណាកូនប្រពន្ធមិនទាន់រឹងដៃរឹងជើង។

ថ្លែងនៅក្នុងបទសម្ភាសន៍ជាមួយអ្នកសារព័ត៌មាននាពេលថ្មីនេះ Weir និយាយថា ខ្លួនពិតជារវល់ខ្លាំងជាមួយនាងច្រមក់ដែលទើបនឹងកើត សឹងរកពេលដេកពួនមិនបាន។ ប៉ុន្តែទោះជាយ៉ាងនេះក្ដី លោកពិតជាសប្បាយចិត្ត និងទទួលបានសុភមង្គលពេញប្រៀប ដែលមានវត្តមាន Wylyn នៅក្នុងគ្រួសារ។ ជាមួយគ្នានោះតារាប្រុសវ័យ ៣៨ឆ្នាំរូបនេះ បន្ថែមថា រាល់ថ្ងៃលោក និង Vicky ដាក់វេនគ្នាមើលថែកូន ម្នាក់ៗអស់កម្លាំងណាស់ ដូច្នេះបើសិនលោកចូលធ្វើការវិញ ភរិយារបស់លោកនឹងកាន់តែហត់នឿយ។

នៅពេលសួរដល់រឿងជួលមេដោះ លោកថា ប្រហែលជានឹងមាន ប៉ុន្តែពេលនេះក្នុងនាមជាឪពុកម្ដាយ លោកនិងភរិយានឹងនៅថែទាំកូនដោយដៃខ្លួនឯងសិន។ Weir ក៏បានបញ្ជាក់បន្ថែមថា ខ្លួនអាចត្រឡប់ចូលថតភាពយន្តវិញចន្លោះពេល ៥-៦ខែទៀត៕

ប្រែសម្រួល៖ សន្យា

ចុចអាន៖ គ្រងតំណែង Miss Grand ថៃ មិនទាន់គ្រប់អាណត្តិផង អ៊ីងហ្វា រកចំណូលបានដល់ខ្ទង់លាន

ចុចអាន៖ ទស្សនិកជនរាប់លាននាក់សម្រុកគ្នាចូលមើល វីដេអូឃ្លីប Pinky ញ៉ាំខ្ទឹមក្រហម