គ្រងតំណែង Miss Grand ថៃ មិនទាន់គ្រប់អាណត្តិផង អ៊ីងហ្វា រកចំណូលបានដល់ខ្ទង់លាន

បវរកញ្ញា អ៊ីងហ្វា វ៉ារ៉ាហា (Engfa Waraha) ម្ចាស់មកុដ Miss Grand Thailand និងជាជយលាភីរងទី១នៃកម្មវិធី Miss Grand International 2022 ទើបឡើងគ្រងតំណែងមិនទាន់គ្រប់អាណត្តិស្រួលបួលផង ប៉ុន្តែបវរកញ្ញារូបនេះ មានសមត្ថភាពអាចរកចំណូលបានរាប់លានបាតចូលហោប៉ៅផ្ទាល់ខ្លួន និងកំពុងកាន់កាប់ទ្រព្យសម្បត្តិសុទ្ធដល់ខ្ទង់លានដុល្លារឯណោះ។

អ៊ីងហ្វា វ៉ារ៉ាហា កើតនៅថ្ងៃទី១៥ ខែកុម្ភៈ ឆ្នាំ១៩៩៥ នៅប្រទេសថៃ។ បច្ចុប្បន្ននាងជាតារាបង្ហាញម៉ូដ តារាចម្រៀង និងជាតារាសម្ដែង ដែលកំពុងទទួលបានប្រជាប្រិយពីស្រទាប់ទស្សនិកជនទាំងក្នុង និងក្រៅស្រុក ក្រោយពេលលេចវត្តមានចូលរួមប្រកួត MGT ឆ្នាំ២០២២ និងទទួលបានតំណែងឯក។

មុនពេលចូលរួមឆាកសម្រស់ តារាស្រីវ័យ ២៨ឆ្នាំរូបនេះ ធ្លាប់ជាបេក្ខនារីក្នុងកម្មវិធីប្រឡងចម្រៀង The Voice Thai រដូវកាលទី៧ ក្នុងឆ្នាំ២០១៩ ហើយក្នុងឆ្នាំ២០២២ នាងបានឈ្នះការប្រកួតបវរកញ្ញា Miss Grand Thailand 2022 វគ្គផ្ដាច់ព្រ័ត្ត និងបាន​តំណាង​ប្រទេស​ថៃ​ក្នុង​កម្មវិធី Miss Grand International 2022 ដោយទទួលបានតំណែងជយលាភីរងទី១។

ក្រោយក្លាយជាម្ចាស់មកុដទាំងកម្មវិធីជាតិ និងអន្តរជាតិ អ៊ីងហ្វា កាន់តែមានប្រជាប្រិយភាពក្នុងការថតស្ពត ប្រគំតន្ត្រី និងចូលរួមកម្មវិធីធំៗជាច្រើនផងដែរ។ ដោយសារភាពមមាញឹកក្នុងវិស័យសិល្បៈ អ៊ីងហ្វា អាចរកចំណូលមិនតិចនោះទេក្នុងរយៈពេលប៉ុន្មានខែមកនេះ ខណៈប្រភពពី Idol Networth រាយការណ៍ថា បច្ចុប្បន្ននាងគឺជាម្ចាស់ប្រាក់សុទ្ធប្រមាណ ១លានដុល្លារអាមេរិក៕

ប្រែសម្រួល៖ សន្យា

ចុចអាន៖ បង្កើតកម្មវិធី Miss Grand ១០ឆ្នាំហើយ លោក ណាវ៉ាត់ សល់ទ្រព្យផ្ទាល់ខ្លួនប៉ុន្មានទៅ?

ចុចអាន៖ អ្នកលេងអ៊ីនធឺរណិត​នាំគ្នាជីកកាយរូបភាព និងអត្ថន័យស្នាមសាក់របស់ Lisa