តារាស្រីជប៉ុនម្នាក់ លាតត្រដាងភាពខ្មៅងងឹតក្រោយខ្នងនៃឧស្សាហកម្មកម្សាន្តកូរ៉េ

តារាស្រីជប៉ុន Miya ដែលជាអតីតសមាជិកក្រុមចម្រៀងស្រី GWSN បាននិយាយលាតត្រដាងភាពខ្មៅងងឹតនៃខាងក្រោយខ្នងឧស្សាហកម្មកម្សាន្ត Kpop និងការពិតខ្លះៗនៃការក្លាយជាតារានៅក្នុងប្រទេសកូរ៉េ ។

នៅថ្ងៃទី ២២ ខែឧសភា Miya បានចែករំលែកជីវិតរបស់នាងក្នុងនាមជាតារាកូរ៉េជាមួយកាសែត Asahi Shimbun របស់ប្រទេសជប៉ុន។ នាងបានពណ៌នាពេលវេលារបស់នាងក្នុងនាមជាអ្នកហ្វឹកហាត់ថាដូចជា«ការរស់នៅក្នុងគុក» តារាជប៉ុនរូបនេះបានសង្កត់ធ្ងន់ថា “យើងចាប់ផ្ដើមហាត់ភ្លាមៗពេលត្រឡប់មកផ្ទះនិងពីសាលា”។

នាងបានរកឃើញថាវាមិនមែនជារឿងធំនោះទេ ព្រោះមនុស្សជាច្រើនត្រូវឆ្លងកាត់រឿងដូចគ្នាដើម្បីក្លាយជាតារា ទោះជាយ៉ាងណាក៏ដោយ របបអាហារដ៏ហួសហេតុ គឺជាអ្វីដែលធ្វើឱ្យនាងភ័យខ្លាច។ រាល់ពេលដែលពួកគេទៅហាត់ Miya និងអ្នកផ្សេងទៀតបានថ្លឹងថ្លែងនៅចំពោះមុខអ្នកគ្រប់គ្រង បន្ទាប់មកពួកគេត្រូវរាយការណ៍អំពីរបបអាហាររបស់ពួកគេប្រចាំថ្ងៃ ដោយពួកគេតែងតែញ៉ាំចេក ស៊ុតឆ្អិនប៉ុណ្ណោះ ។

ក្នុងនោះ Miya បាននិយាយចែករំលែកថា”ខ្ញុំមានអារម្មណ៍ថាខ្ញុំឆ្កួតហើយ។ ក្រុមហ៊ុនរបស់យើងតឹងតែងណាស់។ ខ្ញុំគ្មានពេលទំនេរ គ្មានលុយ ហើយទូរស័ព្ទដៃរបស់ខ្ញុំត្រូវបានរឹបអូស។ ខ្ញុំស្ទើរតែមិនអាចទាក់ទងគ្រួសាររបស់ខ្ញុំបាន”។ នាងបានបន្ថែមទៀតថា “សមាជិកក្រុមកាន់តែស្និទ្ធស្នាលពេលពួកគេលួចញ៉ាំនំជាមួយគ្នា និងពេលពួកគេទទួលបានពីអាហារសម្រាប់បុគ្គលិកអំឡុងពេលថត MV “។

យ៉ាងណាមិញ GWSN គឺជាក្រុមចម្រៀងកូរ៉េមានចម្រុះជាតិសាសន៍ដែលមានសមាជិក ៧ នាក់គឺ Miya, Seoky oung, Seoryoung, Anne, Minju, Soso និង Lena ។ តារាស្រីទាំងពីរបានបង្ហាញខ្លួន ដំបូងក្នុងខែកញ្ញា ឆ្នាំ ២០១៨ បន្ទាប់មកពាក់កណ្តាលទីពីរនៃឆ្នាំ ២០២១ ក្រុមចម្រៀងនេះបានប្តឹងផលិតកម្ម The Wave Music ដោយសុំឱ្យបញ្ចប់កុងត្រា ក្រោយពីឈ្នះក្តី Miya មានបំណងអភិវឌ្ឍខ្លួនជាម៉ូដែល ឬតារាសម្ដែង ដោយនាងបានចុះកិច្ចសន្យាជាមួយក្រុមហ៊ុនជប៉ុន ៕

ប្រែសម្រួល៖នាងតូច

ចុចអាន៖V នឹងមិនចូលរួមកម្មវិធីមហោស្រពភាពយន្ត Cannes ក្រោយផ្ទុះរឿងអាស្រូវជាមួយ Jennie